လါမ့ၤ(၂၇)သီ,၂၀၂၅နံၣ် သုးကီၣ်ကးကတဲၥ်ကတီၤ၀ဲလၢကမၤတၢ်ဃုထၢအံၤန့ၣ် မ့တမ့ၢ်လၢထံဖိကီၢ်ဖိဒီးတၢ်ကရၢကရိလၢအဘၣ်ထွဲတဖၣ်ပၥ်ဃုၥ်ဘၣ်န့ၣ် အဘျုးအဖှိၣ်တအိၣ်ဘၣ်ဒီးကမ့ၢ်ဒၣ်တၢ်ကလီကလီအဂ့ၢ် မလ့ရှါထံဂုၤကီၢ်ဂၤကိတိၥ်မိၣ်ဟၣ်မဲးဟၣ်ဆၣ်ထၢနုၥ်တဲ၀ဲ ဖဲလါမ့ၤ(၂၅)သီအနံၤတၢ်မၤအၣ်စံၣ်ယၣ်ထံဂုၤကီၢ်ဂၤကိတိၥ်တၢ်အိၣ်ဖှိၣ်အဆၢကတီၢ်န့ၣ်လီၤ. ဖဲ(၂၀၂၅)နံၣ်အကတၢၢ်လၢတၢ်ကမၤတၢ်ဃုထၢအဂီၢ် သုးကီၣ်ကးကတဲၥ်ကတီၤ၀ဲအဆၢကတီၢ် မလ့ရှါထံဂုၤကီၢ်ဂၤကိတိၥ်တဲထီၣ်၀ဲဒ်အံၤန့ၣ်လီၤ.သုးကီၣ်ကးအတၢ်ဃုထၢန့ၣ်တၢ်ကရၢကရိလၢအထီဒါအီၤတဖၣ်ဒီးထံရူၢ်ကီၢ်သဲးဂံၢ်ဘါကရူၢ်တဖၣ် ထီဒါ၀ဲ၀ံၤတကီၢ်ခါသုးဂ့ၢ်၀ီတၢ်သဘံၣ်သဘုၣ်ဆူၣ်ထီၣ်အကတီၢ် ကြၢးမၤဆိ၀ဲလၢတၢ်ပတုၥ်တၢ်ခးအဂ့ၢ်တဲ၀ဲစ့ၢ်ကီးန့ၣ်လီၤ. ဟီၣ်ခိၣ်ဟူးအဃိ ကီၢ်ပယီၤထံဖိကီၢ်ဖိလၢအတူၢ်ဘၣ်တၢ်ဘၣ်ဒိဘၣ်ထံးတဖၣ်အဂီၢ် တၢ်သူၣ်ထီၣ်က့ၤတၢ်ဖံးတၢ်မၤတဖၣ် တၢ်မၤအီၤဆူညါကန့ၢ်လၢတၢ်ဆၢကတီၢ်ယံၥ်အဂီၢ်ကီၢ်ပယီၤ သုးကီၣ်ကးတကပၤကဘၣ်ပၥ်ပတုၥ်တၢ်ဃုတၢ်အ့ၣ်လိၥ်ဆိးက့လိၥ်,တၢ်ဒုးတၢ်ယၤတဖၣ်၀ံၤ တၢ်ပတုၥ်တၢ်ခးလိၥ်သးတဖၣ်ကဘၣ်ထုးထီထီၣ်၀ဲအသးသမူဆူညါဒီးဘၣ်ထွဲဒီးတၢ်ဂ့ၢ်အံၤတဖၣ် ကမၤ၀ဲတုၤလီၤတီၤလီၤအဂီၢ် မ့ၢ်ပတၢ်ဃ့ထီၣ်အဂ့ၢ်မိၣ်ဟၣ်မဲးဟၣ်ဆၣ်ထၢနုၥ်တဲ၀ဲ ဖဲတၢ်အိၣ်ဖှိၣ်စးထီၣ်တၢ်ကတိၤလီၤတၢ်အဆၢကတီၢ်န့ၣ်လီၤ. ထံဖိကီၢ်ဖိလၢတူၢ်ဘၣ်ဟီၣ်ခိၣ်ဟူးတၢ်ဘၣ်ဒိဘၣ်ထံးတဖၣ်တၢ်က့ၤသူၣ်ထီၣ်အဂီၢ် သုးကီၣ်ကးထုးထီၣ်ပၥ်ဖျါ၀ဲလၢမၤထီထီၣ် တၢ်ပတုၥ်တၢ်ခးတလါသနၥ်က့ဟဲဒုးတၢ်ဒီးကဘီယူၤတလီၢ်လီၢ်စ့ၢ်ကီးန့ၣ်လီၤ.

လါမ့ၤ(၂၆)သီ,၂၀၂၅နံၣ် ကီၢ်ကၠီၣ်တဲၣ်န့ၣ်ဖဲအပူၤကွံၥ်အနံၣ်(၁၀)ဘျဲၣ်အဆၢကတီၢ် ထံကီၢ်ပၢပြးအတၢ်ဆီၣ်ထွဲမၤစၢၤဟုသးတၢ်ရဲၣ်တၢ်ကျဲၤအဂီၢ် ကၠီၣ်တဲၣ်ကိတိၥ်ခိၣ်ကျၢၢ်လီၢ်လံၤယ့ၣ်လးရှ့ၣ်န၀းန့ၣ် ကဘၣ်ဟ့ၣ်၀ဲပှၤလၢဘၣ်ဒိဘၣ်ထံးတဖၣ်ဒီလၣ်အကကွဲၢ်(၃၀၀)အဂ့ၢ်စံၣ်ညီၣ်ကွီၢ်၀ဲၤဒၢးဟ့ၣ်လီၤ၀ဲတၢ်ကလုၢ်န့ၣ်လီၤ. ယ့ၣ်လးပဒိၣ်ကရူၢ်အံၤဘၣ်ထွဲဒီးတၢ်အၢၣ်လီၤတူၢ်လိၥ်ဘုဟုတၢ်အၢၣ်လီၤတဖၣ်ကမၤထွဲ၀ဲအဂီၢ် လီၤတူၢ်လီၤကၥ်ဒီးတၢ်မၤတတီတလိၤတဖၣ် ပၢဆှၢ၀ဲတန့ၢ်အဂ့ၢ်စံၣ်ညီၢ်ကွီၢ်၀ဲၤဒၢးတဲဖျါ၀ဲန့ၣ်လီၤ. တၢ်ရဲၣ်တၢ်ကျဲၤတခါအံၤအတၢ်မုၢ်လၢ်ကွၢ်စိန့ၣ်မ့ၢ်ဒ်သိးတၢ်ကဟ့ၣ်၀ဲဒၣ်ပှၤထူစံၣ်ဖိတဖၣ်အဘုဟုအပှ့ၤအါန့ၢ်ဒံးတၢ်ဘၣ်ဟ့ၣ်အီၤအပှ့ၤဒီးဆီၣ်ထွဲမၤစၢၤပှၤထူစံၣ်ဖိတဖၣ်အဂီၢ်န့ၣ်လီၤ. တၢ်ရဲၣ်တၢ်ကျဲၤအံၤမ့ၢ်တၢ်တိၥ်ကျဲၤသနူတခါလၢအအိၣ်ဖျိအိၣ်ဖျါသနၥ်က့ ဘုဟုတဖၣ်တၢ်တဆါဘၣ်အီၤဒီးတၢ်ဘၣ်ပၥ်ကီၤဃၥ်အီၤအိၣ်၀ဲအါမးန့ၣ်လီၤ.ကၠီၣ်တဲၣ်ကိတိၥ်ခိၣ်ကျၢၢ်လီၢ်လံၤယ့ၣ်လးတခီတဲ၀ဲလၢအတၢ်ပညိၣ်တအိၣ်လၢကမၤဘၣ်ဒိထံကီၢ်အတၢ်ဟဲနုၥ်ဘၣ်ဒီးလၢတၢ်မ့ၢ်တၢ်တီအဂီၢ်ကဒုးကဒီးတၢ်အဂ့ၢ်တဲ၀ဲန့ၣ်လီၤ. ယ့ၣ်လးန့ၣ်မ့ၢ်၀ဲ ကၠီၣ်တဲၣ်ထံကီၢ်ပိၥ်မုၣ်ကိတိၥ်ခိၣ်ကျၢၢ်အဆိကတၢၢ်တဂၤ၀ံၤမ့ၢ်၀ဲကီၢ်ကၠီၣ်တဲၣ်ပှၤထူးပှၤတီၤဖးဒိၣ်ဒီးကိတိၥ်ခိၣ်ကျၢၢ်လီၢ်လံၤသဲးဆ့ၣ်ရှ့ၣ်န၀းအပုၢ်ပိၥ်မုၣ်န့ၣ်လီၤ.သဲးဆ့ၣ်အဖိမုၣ်ပ့ၣ်ထိၣ်ထၣ်စ့ၢ်ကီးကတီၢ်ခဲအံၤမ့ၢ်၀ဲ ကၠီၣ်တဲၣ်ကိတိၥ်ခိၣ်ကျၢၢ်န့ၣ်လီၤ. ယ့ၣ်လးထံကီၢ်ပဒိၣ်ကရူၢ်အံၤ လၢတၢ်ဆီၣ်ထွဲမၤစၢၤပှၤထူစံၣ်ဖိတဖၣ်ဒီးဟံၣ်ဖိဃီဖိလၢကျိၣ်စ့အတၢ်ဟဲနုၥ်စှၤတဖၣ်အဂီၢ်မၤ၀ဲတၢ်ဆီၣ်ထွဲမၤစၢၤဟုသးတၢ်ရဲၣ်တၢ်ကျဲၤသနၥ်က့ဖဲ(၂၀၂၄)နံၣ်တချုးသုးဟံးန့ၢ်တၢ်စိတၢ်ကမီၤအဆၢကတီၢ် ဘၣ်တၢ်ထုးထီၣ်ကွံၥ်အီၤလၢမူဒါ၀ံၤတၢ်ပၥ်ဖျါထီၣ်တၢ်ပၥ်သးလၢတၢ်ထီဒါထံကီၢ်ပဒိၣ်တဖၣ်စ့ၢ်ကီးကဲထီၣ်၀ဲန့ၣ်လီၤ. ယ့ၣ်လးန့ၣ်ဘၣ်ထွဲဒီးတၢ်ရဲၣ်တၢ်ကျဲၤအံၤ ဘၣ်တၢ်လိၥ်ဘၢလိၥ်ကွီၢ်အီၤအဃိ တၢ်တချုးဟ့ၣ်လီၤတၢ်ကလုၢ်လၢကဘၣ်လီၤဃိၥ်(၅)နံၣ်အကတီၢ် ဃ့ၢ်ဟးထီၣ်လၢကၠီၣ်တဲၣ်ထံကီၢ် ၀ံၤလဲၤအိၣ်၀ဲဒၣ်လၢထံဂၤကီၢ်ဂၤန့ၣ်လီၤ. Ref:NHK