လါမ့ၤ(၂၈)သီ,၂၀၂၅နံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၂),တီအူကီၢ်ရ့ၣ်,ဒီၣ်ဖးခိၣ်ကီၢ်ဆၣ်,ဒီၣ်ဖးခိၣ်ကလံၤစိး(ဟီၣ်က၀ီၤလီၤဆီ)အပူၤ ကယါပၠံၣ်သ့းကရၢအတၢ်မၤလဲၢ်ဟီၣ်က၀ီၤဟဲသူၣ်ထီၣ်သုးကလၢၤတဖၣ်တၢ်ဂ့ၢ်အဖီခိၣ်ပှၤဘၣ်မူဘၣ်ဒါလၢဘၣ်ထွဲတဖၣ်တခီ လၢချူးဆၢချူးကတီၢ်ကထုးကွံၥ်သုးကလၢၤတဖၣ်အဂီၢ် သုးက့(၂),ဒီၣ်ဖးခိၣ်ကလံၤစိးသုးရ့ၣ်လီၤဆီ ဒုးသ့ၣ်ညါဟ့ၣ်ပလီၢ်ဃၥ်၀ဲန့ၣ်လီၤ.
ဒီၣ်ဖးခိၣ်ကလံၤစိးဟီၣ်က၀ီၤလီၤဆီကရၢအဟီၣ်က၀ီၤအပူၤ ကယါပၠံၣ်သ့းပၣ်တံၣ်မၤလဲၢ်ထီၣ်ဟၣ်က၀ီၤဒီးဟဲသူၣ်ထီၣ်သုးကလၢၤ,ဆီလီၤတၢ်သမံသမိးတြဲၤတဖၣ်ဟဲအိၣ်ထီၣ်၀ဲ၀ံၤသုးဂ့ၢ်၀ီတၢ်ဟူးတၢ်ဂဲၤတဖၣ်အဖီခိၣ် တၢ်ဘၣ်တံၢ်တၥ်တဖၣ်ကဲထီၣ်အဃိ ပှၤဘၣ်မူဘၣ်ဒါလၢဘၣ်ထွဲတဖၣ်ဒ်သိးကဟံးစုနဲၣ်ကျဲအပှၤသုးကရၢတဖၣ်အဂီၢ် ဘၣ်ထုးထီၣ် ပၥ်ဖျါ၀ဲအဂ့ၢ် စံး၀ဲန့ၣ်လီၤ.
“တၢ်ပၥ်ဂၢၢ်ပၥ်ကျၢၤ၀ဲန့ၢ်လီၤ.လီၢ်က၀ီၤဘၣ်မူဘၣ်ဒါလၢဘၣ်ထွဲတဖၣ်န့ၣ် ဟီၣ်က၀ီၤပူၤတၢ်လၢအကဲထီၣ်သးဒီးတၢ်အိၣ်သးတဖၣ်အဖီခိၣ် ကဟံးထီၣ်ဖီၣ်ထီၣ်ကဘှါရှဲ၀ဲ”အဂ့ၢ် ဒီၣ်ဖးခိၣ်ကလံၤစိးသုးရ့ၣ်လီၤဆီ အလံၥ်ဘိးဘၣ်ရၤလီၤအဖီခိၣ် KNUပှၤကတိၤတၢ်ပၢ ပဒိၣ်စီၤတီနံၤ စံးဆၢဃၥ်၀ဲဆူတၢ်ကစီၣ်သန့တခါအအိၣ်န့ၣ်လီၤ.
ကတီၢ်ခဲအံၤ ကယါပၠံၣ်သ့းကရၢတၢ်သမံသမိးတြဲၤသုးကလၢၤတဖျၢၣ်လၢဟဲဆီလီၤဃၥ်၀ဲဖဲ ဒီၣ်ဖးခိၣ်ကီၢ်ဆၣ်, ငွ့ၣ်တီၣ်သ၀ီအပူၤအံၤန့ၣ် လၢတနွံအတီၢ်ပူၤ တၢ်ကထုးကွံၥ်အီၤအဂီၢ် ဒီၣ်ဖးခိၣ်ကလံၤစိးသုးရ့ၣ်လီၤဆီ ထုးထီၣ်တဲဖျါဃၥ်၀ဲန့ၣ်လီၤ.
ကညီဒီကလုၥ်စၢဖှိၣ်ကရၢ(KNU)တခီ ဒ်သိးကမၤဆူၣ်ထီၣ် တၢ်ဒုးတၢ်ယၤတဖၣ်အဂီၢ် တဲဖျါထီၣ်ဃၥ်၀ဲ၀ံၤ အခဲအံၤတၢ်ဟ့ၣ်ပလီၢ်လၢတၢ်ကဘၣ်ထုးကွံၥ်သုးကလၢၤတၢ်ဂ့ၢ်အဖီခိၣ် တၢ်မ့ၢ်တလူၤပိၥ်မၤထွဲ၀ဲဘၣ်ဒီးတၢ်မ့ၢ်မၤတံၢ်တၥ်လၢ သုးဂ့ၢ်၀ီတၢ်ဟူးတၢ်ဂဲၤတဖၣ်အပူၤန့ၣ် တၢ်ကရၢကရိဖဲလဲၣ်တဖုမ့ၢ်ဂ့ၤန့ၣ် ကမၤရှဲပျီကွံၥ်အဂ့ၢ် ပၥ်ဖျါဃၥ်၀ဲန့ၣ်လီၤ.
3
