လါမ့ၤ(၂၆)သီ,၂၀၂၅နံၣ်
တနီသရံၣ်ကီၢ်ခီ, ဘျံးကီၢ်ရ့ၣ်, တနီသရံၣ်ကီၢ်ဆၣ်, အနီးမီၣ်တိသ၀ီကရူၢ်ဒီးသၣ်ရၣ်ဘွ့သ၀ီကရူၢ်အပူၤ သုးကီၣ်ကးအသုး လဲၤတ့ၢ်လီၤမ့ၣ်ပိၢ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
မီၣ်တိသ၀ီအိၣ် သုးကီၣ်ကး(၃၀၆)မျိၥ်သုးအံၤ ဖဲလါမ့ၤ(၂၂)သီအနံၤ, ဂီၤ(၉)နၣ်ရံၣ်ဃၣ်ဃၣ်အဆၢကတီၢ် လဲၤတ့ၢ်လီၤဒြိမ့ၣ်ပိၢ်(၄)ဖျၢၣ်ဆူ အနီးမီၣ်တိသ၀ီကရူၢ်ဒီး ညီၣ်စ့ၣ်တီၣ်သ၀ီ တီၤကၠိအဃိ တၢ်သိၣ်လိကၠိတၢ်သူၣ်ထီၣ်တဖၣ် ဘၣ်ဟးဂီၤကွံၥ်၀ဲအဂ့ၢ် လီၢ်က၀ီၤပိၥ်ခွါတဂၤ စံး၀ဲန့ၣ်လီၤ.
“ဟဲတ့ၢ်လီၤဖှိၣ်၀ဲလၢ တၢ်လီၢ်တလီၢ်အပူၤန့ၣ်လီၤ. တၢ်တအိၣ်နီမံၤဘၣ်ဆၣ် ဟဲတ့ၢ်လီၤမ့ၣ်ပိၢ်န့ၣ်လီၤ. ဖဲအနံၤန့ၣ် ကၠိတထီၣ်ဘၣ်အဃိ ဖိသၣ်တဖၣ်တၢ်ဘူၣ်ဂ့ၤလီၤ. ဖဲတချူးဘၣ်အနံၤန့ၣ် ကၠိဖိတဖၣ်ဟဲထီၣ်ကၠိအဂ့ၢ်” လီၢ်က၀ီၤဖိစံး၀ဲန့ၣ်လီၤ.
တၢ်ဒုးကဲထီၣ်သးတအိၣ်ဘၣ်ဒီးဟဲတ့ၢ်လီၤမ့ၣ်ပိၢ်အဃိ တၢ်သိၣ်လိကၠိအဒူၣ်တဖၣ်ဘၣ်ဟးဂီၤကွံၥ်၀ဲ၀ံၤ မ့မ့ၢ်လၢပှၤကညီတၢ်ဘၣ်ဒိဘၣ်ထံးတခီတအိၣ်ဘၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ဖဲလၢအနံၤတနံၤအတီၢ်ပူၤန့ၣ် သုးကီၣ်ကးကဘီယူၤဒုးသုး ဟဲတ့ၢ်လီၤမ့ၣ်ပိၢ်ဆူ တနီသရံၣ်ကီၢ်ဆၣ်, သၣ်ရၣ်ဘွ့သ၀ီကရူၢ်, ကၠီးတီၣ်သ၀ီပူၤအဃိ တၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲဘၣ်ဆၣ် တၢ်တသ့ၣ်ညါလီၤတံၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါမ့ၤ(၂၁)သီအနံၤစ့ၢ်ကီး သုးကီၣ်ကးအသုး ဟဲတ့ၢ်လီၤမ့ၣ်ပိၢ်ဆူ လဲၢ်သ့းသ၀ီမုၢ်နုၥ်တကပၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
တနွံညါအံၤအတီၢ်ပူၤန့ၣ် သုးကီၣ်ကးအသုးအံၤ တနီသရံၣ်ကီၢ်ဆၣ်အပူၤ မၤကလံၤကျါတၢ်ဒုးဟဲတ့ၢ်လီၤ၀ဲမ့ၣ်ပိၢ်တဖၣ် အိၣ်ထီၣ်၀ဲတပယူၥ်ဃီ၀ံၤ ပညိၣ်ဒုး၀ဲဒူသ၀ီဒီး တၢ်သိၣ်လိကၠိတဖၣ် အိၣ်ထီၣ်၀ဲတပယူၥ်ဃီအဂ့ၢ် လီၢ်က၀ီၤတၢ်ပၢၢ်ဆၢကရၢတဖၣ် စံး၀ဲန့ၣ်လီၤ.
