လါမ့ၤ(၂၇)သီ,၂၀၂၅နံၣ်
သုးကီၣ်ကးကတဲၥ်ကတီၤ၀ဲလၢကမၤတၢ်ဃုထၢအံၤန့ၣ် မ့တမ့ၢ်လၢထံဖိကီၢ်ဖိဒီးတၢ်ကရၢကရိလၢအဘၣ်ထွဲတဖၣ်ပၥ်ဃုၥ်ဘၣ်န့ၣ် အဘျုးအဖှိၣ်တအိၣ်ဘၣ်ဒီးကမ့ၢ်ဒၣ်တၢ်ကလီကလီအဂ့ၢ် မလ့ရှါထံဂုၤကီၢ်ဂၤကိတိၥ်မိၣ်ဟၣ်မဲးဟၣ်ဆၣ်ထၢနုၥ်တဲ၀ဲ ဖဲလါမ့ၤ(၂၅)သီအနံၤတၢ်မၤအၣ်စံၣ်ယၣ်ထံဂုၤကီၢ်ဂၤကိတိၥ်တၢ်အိၣ်ဖှိၣ်အဆၢကတီၢ်န့ၣ်လီၤ.
ဖဲ(၂၀၂၅)နံၣ်အကတၢၢ်လၢတၢ်ကမၤတၢ်ဃုထၢအဂီၢ် သုးကီၣ်ကးကတဲၥ်ကတီၤ၀ဲအဆၢကတီၢ် မလ့ရှါထံဂုၤကီၢ်ဂၤကိတိၥ်တဲထီၣ်၀ဲဒ်အံၤန့ၣ်လီၤ.သုးကီၣ်ကးအတၢ်ဃုထၢန့ၣ်တၢ်ကရၢကရိလၢအထီဒါအီၤတဖၣ်ဒီးထံရူၢ်ကီၢ်သဲးဂံၢ်ဘါကရူၢ်တဖၣ် ထီဒါ၀ဲ၀ံၤတကီၢ်ခါသုးဂ့ၢ်၀ီတၢ်သဘံၣ်သဘုၣ်ဆူၣ်ထီၣ်အကတီၢ် ကြၢးမၤဆိ၀ဲလၢတၢ်ပတုၥ်တၢ်ခးအဂ့ၢ်တဲ၀ဲစ့ၢ်ကီးန့ၣ်လီၤ.
ဟီၣ်ခိၣ်ဟူးအဃိ ကီၢ်ပယီၤထံဖိကီၢ်ဖိလၢအတူၢ်ဘၣ်တၢ်ဘၣ်ဒိဘၣ်ထံးတဖၣ်အဂီၢ် တၢ်သူၣ်ထီၣ်က့ၤတၢ်ဖံးတၢ်မၤတဖၣ် တၢ်မၤအီၤဆူညါကန့ၢ်လၢတၢ်ဆၢကတီၢ်ယံၥ်အဂီၢ်ကီၢ်ပယီၤ သုးကီၣ်ကးတကပၤကဘၣ်ပၥ်ပတုၥ်တၢ်ဃုတၢ်အ့ၣ်လိၥ်ဆိးက့လိၥ်,တၢ်ဒုးတၢ်ယၤတဖၣ်၀ံၤ တၢ်ပတုၥ်တၢ်ခးလိၥ်သးတဖၣ်ကဘၣ်ထုးထီထီၣ်၀ဲအသးသမူဆူညါဒီးဘၣ်ထွဲဒီးတၢ်ဂ့ၢ်အံၤတဖၣ် ကမၤ၀ဲတုၤလီၤတီၤလီၤအဂီၢ် မ့ၢ်ပတၢ်ဃ့ထီၣ်အဂ့ၢ်မိၣ်ဟၣ်မဲးဟၣ်ဆၣ်ထၢနုၥ်တဲ၀ဲ ဖဲတၢ်အိၣ်ဖှိၣ်စးထီၣ်တၢ်ကတိၤလီၤတၢ်အဆၢကတီၢ်န့ၣ်လီၤ.
ထံဖိကီၢ်ဖိလၢတူၢ်ဘၣ်ဟီၣ်ခိၣ်ဟူးတၢ်ဘၣ်ဒိဘၣ်ထံးတဖၣ်တၢ်က့ၤသူၣ်ထီၣ်အဂီၢ် သုးကီၣ်ကးထုးထီၣ်ပၥ်ဖျါ၀ဲလၢမၤထီထီၣ် တၢ်ပတုၥ်တၢ်ခးတလါသနၥ်က့ဟဲဒုးတၢ်ဒီးကဘီယူၤတလီၢ်လီၢ်စ့ၢ်ကီးန့ၣ်လီၤ.
အၣ်စံၣ်ယၣ်အတၢ်အၢၣ်လီၤ(၅)ထံၣ်န့ၣ် ပယီၤသုးတကပၤအ၀ဲသ့ၣ်အနီၢ်ကစၢ်ဒၣ်၀ဲ အၢၣ်လီၤတူၢ်လိၥ်ဆဲးလီၤစုမုၢ်အဃိ လိၣ်၀ဲလၢကဘၣ်မၤထွဲ၀ဲအဂ့ၢ်တဲဆီၣ်သနံး၀ဲစ့ၢ်ကီးန့ၣ်လီၤ.
အပူၤကွံၥ်လါအ့ဖြ့ၣ်(၁၇)သီစ့ၢ်ကီးမလ့ရှါကိတိၥ်ခိၣ်ကျၢၢ်အၣ်၀ၣ်အံၣ်ဘရၣ်ဟ့ၣ်ဒီးသုးကီၣ်ကးအခိၣ်မ့အီၣ်လဲၣ်ထံၣ်လိၥ်သးလီၤလီၤဆီဆီ ဖဲကီၢ်ကၠီၣ်တဲၣ်၀့ၢ်ဘီကီးအဆၢကတီၢ် ဒ်သိးကမၤ၀ဲခံကပၤတၢ်ပတုၥ်တၢ်ခးလိၥ်သးအဂီၢ်စ့ၢ်ကီး တဲဆီၣ်သနံး၀ဲဒံးန့ၣ်လီၤ.
ထံၣ်လိၥ်သးဒီးသုးကီၣ်ကးအခိၣ်၀ံၤအလီၢ်ခံ လၢခံတသီလါအ့ဖြ့ၣ်(၁၈)သီအနံၤန့ၣ် ဒီကလုၥ်ဃူဖိးပဒိၣ်(NUG)ကိတိၥ်ခိၣ်ကျၢၢ်မါ၀့ခဲၣ်သါဒီးမလ့ရှါကိတိၥ်ခိၣ်ကျၢၢ်ထံၣ်လိၥ်သးလၢအီၣ်လါအဖီခိၣ်၀ံၤ ကမၤဘၣ်ထွဲလိၥ်သးအါထီၣ်ဒီးထံကီၢ်လၢအအိၣ်လၢအၣ်စံၣ်ယၣ်ကရူၢ်ပူၤတဖၣ်အဂီၢ်ဒီးဘၣ်ထွဲဒီးဟီၣ်ခိၣ်ဖိတၢ်ဒိသူၣ်ဒိသးတၢ်ဟ့ၣ်တၢ်မၤစၢၤအဂ့ၢ်တဖၣ်တၢၣ်ပီၣ်တဲသကိး၀ဲဒံးန့ၣ်လီၤ.
Ref: The Strait Times
