လါမ့ၤ(၂၆)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်ရ့ၣ်ချၢၣ်လွံၢ်ထူၣ်,လၢၢ်ဒိၣ်ကီၢ်ဆၣ်,ကၠိကၠံသ၀ီတၢ်တ့တၢ်ဖျီမူးတၢ်ရဲၣ်တၢ်ကျဲၤအပူၤ ခီဖျိသုးကီၣ်ကးအသုး ဟဲတ့ၢ်လီၤပီၣ်(၅၀၀)အိၣ်မ့ၣ်ပိၢ်အဃိ တလးမူးပိၥ်မုၣ်ပၣ်ဃုၥ်ဖိသၣ်ဒီးလီၢ်က၀ီၤဖိလၢ ဟဲထီၣ်မူးတၢ်ရဲၣ်တၢ်ကျဲၤ သံ၀ဲ(၇)ဂၤဒီးပှၤ(၂၅)ဂၤဘျဲၣ် ဘၣ်ဒိ၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
မဟါအနံၤလါမ့ၤ(၂၅)သီအနံၤ, ဂီၤအဆၢကတီၢ်န့ၣ် ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်ဆူ တၢ်တ့တၢ်ဖျီမူးတၢ်ရဲၣ်တၢ်ကျဲၤပူၤအဃိ လီၤတဲၥ်ပိၢ်ဖးထီၣ်၀ဲဒၣ်ဖဲ တၢ်ဖျီအလီၢ်ဒီးတၢ်ဖီအီၣ်တ့ၢ်အီၣ်အလီၢ်အဃိ သံဒီးဘၣ်ဒိဘၣ်ထံးတဖၣ်အိၣ်အါထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ကတီၢ်ခဲအံၤန့ၣ် ပှၤသံအိၣ်ထီၣ်(၇)ဂၤလီၤ. ပှၤလၢဘၣ်ဒိတဖၣ် တၢ်လဲၤဆှၢအီၤဆူ တၢ်ဆါဟံၣ်ကတီၢ် အသံလၢကျဲတီၤတဖၣ်စ့ၢ်ကီးအိၣ်၀ဲအဃိ တၢ်သံတၢ်ပှၢ်အိၣ်အါထီၣ်သ့န့ၣ်လီၤ. ပှၤသံလၢကျဲတီၤတနီၤန့ၣ် တၢ်ဘၣ်စိၣ်သီအီၤလၢတၢ်လီၢ်အဘူးဒီးဖဲန့ၣ်န့ၣ်လီၤ.မ့မ့ၢ်လၢတၢ်ဘၣ်ဒိဘၣ်ထံးတခီအိၣ်ထီၣ်၀ဲ(၂၅)ဂၤဘျဲၣ်အဂ့ၢ်န့ၣ်လီၤ. ကအိၣ်အါန့ၢ်ဒံးအဂ့ၢ်” ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်ကးအသုးအံၤ ထံကီၢ်ဒီတဘ့ၣ်အပူၤ ပညိၣ်လိၤလိၤကမျၢၢ်ဒ်တၢ်ခးပနီၣ်အသိး၀ံၤ မၤ၀ဲကလံၤကျါတၢ်ဒုးတဖၣ်န့ၣ်လီၤ. ၂၀၂၅နံၣ်,လါဖ့ၤဘြူၤအါရံၤ(၂၅)သီအနံၤစ့ၢ်ကီး မၠဲၣ်ကီၢ်ဆၣ်, ဆိၣ်ကိသ၀ီသီခါဖၠၣ်အပူၤ လီၢ်က၀ီၤတၢ်ဒီသဒၢသုးအပှၤကရၢဖိတဂၤအတၢ်တ့တၢ်ဖျီအပူၤ ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်အဃိ ပှၤ(၁၄)ဂၤဘၣ်သံတ့ၢ်၀ဲန့ၣ်လီၤ.
လၢန့ၣ်အမဲၥ်ညါ ၂၀၂၄နံၣ်, လါယူၤ(၃)သီအနံၤစ့ၢ်ကီး သုးကီၣ်ကးအသုး လဲၤတ့ၢ်မ့ၣ်ပိၢ်ဆူ စကဲကီၢ်ခီ, မ့က့ကီၢ်ဆၣ်, မတီသ၀ီတၢ်တ့တၢ်ဖျီမူးတၢ်ရဲၣ်တၢ်ကျဲၤပူၤအဃိ ဖိသၣ်တဖၣ်ပၣ်ဃုၥ် လီၢ်က၀ီၤကမျၢၢ်(၃၀)ဘျဲၣ် ဘၣ်သံ၀ဲဒၣ်န့ၣ်လီၤ.
