လါဒံၣ်စ့ဘၢၣ်(၁၈)သီ,၂၀၂၅နံၣ်
ကရ့ၣ်နံၣ်ကီၫ်စဲၣ်,ကီၫ်ဆၣ်ဘီၣ်လခဲအပူၤ သုးခီၣ်မံးရှၢၣ်သုးကျိၤ ဘၣ်တၫ်ဒုးအီၤလၢတၫ်ဘၢၣ်စၢၤအဃိ သံ၀ဲအိၣ်ဒီးသုးဖိလၢဃ့ၫ်ဖျိးတဖၣ်တၫ်ဖီၣ်န့ၫ်ဃုာ်၀ဲအဂ့ၫ် သုးဂ့ၫ်၀ီဂ့ၫ်ခီၣ်ထံးတၫ်ကစီၣ်ဒီးသုးဖိတဖၣ်တဲ၀ဲလီၤ.
ကီၫ်ဆၣ်ဘီၣ်လခဲအပူၤ တၫ်ပၢၫ်ဆၢသုးပာ်ဖှိၣ် အတၫ်ဒီသဒၢသုးကလၢၤတဖၣ် သုးခီၣ်မံးရှၢၣ်ဟဲထီၣ်ဒုး၀ဲအဃိ အဆိကတၢၫ်တနွံအပူၤ ဒုး၀ဲလၢတၫ်ဘၢၣ်စၢၤန့ၣ်လီၤ.
“ဒုးသုးကျိၤလၢတၫ်ဘၢၫ်စၢၤလီၤ.ဟဲနုာ်လီၤဆူတၫ်ဒီသဒၢတၫ်လီၫ်အဃိဒုး၀ဲအဂ့ၫ်”ကရ့ၣ်နံၣ်ကမျၢၫ်တၫ်ဒီသဒၢသုးမုၫ်ဒိၣ် ပှၤဘၣ်မူဘၣ်ဒါတဂၤ တဲ၀ဲလီၤ.
တၫ်ဒုး၀ဲန့ၣ်အပူၤ သုးခီၣ်မံးရှၢၣ်အပှၤသုးဖိသံအိၣ်၀ဲဒီးတၫ်ဒိးန့ၫ်တၫ်စုက၀ဲၤအိၣ် ၀ဲန့ၣ်လီၤ.အသုးဖိ(၃)ဂၤ လၢဃ့ၫ်ဖျိး တဖၣ်စ့ၫ်ကီးတၫ်ဖှီၣ်န့ၫ်၀ဲလီၤ.
ကီၫ်ဆၣ်ဘီၣ်လခဲအပူၤ သုးဂ့ၫ်၀ီဖ့ၣ်ဆၢအဖၢမုၫ်လီၤဒီးသုးကီၣ်ကးသူ၀ဲသုးကျိၤ(၄)ကျိၤအဂ့ၫ် ကရ့ၣ်န့ၣ်သုးဂ့ၫ်၀ီဂ့ၫ်ခီၣ် ထံးတၫ်ကစီၣ်တဲ၀ဲလီၤ.
သုးကျိၤတဖၣ်န့ၣ် လၢအက့ၫ်ဂီၤပှဲၤပှဲၤဃုာ်ဒီးဂံၫ်ဘါ(၈၀၀)ဂၤဃၣ်ဃၣ်ပာ်ဃုာ် ဒ်သိးကမၤန့ၫ်ဟီၣ်က၀ီၤတၫ်ဒိၣ်စိဖဲ၀့ၫ် ဘီၣ်လခဲက၀ီၤဒီးဖရူၫ်ဆိၣ်-ဘီၣ်လခဲကျဲမုၫ်တကပၤအဂီၫ် ဂဲၤလိာ်၀ဲအဂ့ၫ် တၫ်သ့ၣ်ညါဘၣ်လီၤ.
၀့ၫ်ဘီၣ်လခဲအပူၤ သုးခီၣ်မံးရှၢၣ် အသုးတၫ်တိာ်ကူၣ်ကျဲၤ ခမရ(၄၂၉),ခမရ(၄၃၀)ဒီးခလရ(၃၃၇) တကးဘၣ်,မၤပှဲၤ ဃာ်အဂ့ၫ်အဘါလၢယိၤဒိၣ်ကီၫ်စဲၣ် စကခ(၂)ဒုးယၤ၀ဲၤလီၫ်ခိၣ်သ့ၣ် အစုတီၤဖီလာ် သုးရ့ၣ်တနီၤန့ၣ်လီၤ.
သုးခီၣ်မံးရှၢၣ်န့ၣ် ကရ့ၣ်န့ၣ်ကီၫ်စဲၣ်အပူၤ မ့တမ့ၫ်လၢမဲၫ်စဲး,ဖါဆီဒီးကီၫ်ဆၣ်ရှါတီတဖၣ်န့ၣ် ကီၫ်ဆၣ်လၢအိၣ်တ့ၫ်တဖၣ် ရဲၣ်ကျဲၤ၀ဲလၢကမၤတၫ်ဃုထၢန့ၣ်လီၤ.
