လါဒံၣ်စ့ဘၢၣ် ၁၈သီ, ၂၀၂၅နံၣ်
ပကိကီၢ်ခီ, ၀ီကီၢ်ဆၣ်, ပရဲလိၥ်ကျိကၢၢ်နံၤအကပၤအိၣ် လဲးပၣ်သ၀ီသုးကလၢၤလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် နုၥ်လီၤဒုး၀ဲအဃိ ပၠူၣ်စီထံသံ၀ဲ(၂)ဂၤအံၤ မၤပှဲၤအါထီၣ်၀ဲလၢသုးဂံၢ်ဘါ ၃၀၀ဃၣ်ဃၣ်အဂ့ၢ် ဟီၣ်ခိၣ်မဲၥ်ဖံးခိၣ်တၢ်ပၢၢ်ဆၢသုးပၥ်ဖှိၣ် တဂၤစံး၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ်တဖၣ်နုၥ်လီၤဒုး၀ဲ လဲးပၣ်သ၀ီ၀ံၤအလီၢ်ခံ သုးကီၣ်မံးရှၢၣ်အသုးလၢအိၣ်ဖဲ ပကိအံၤ မၤပှဲၤအါထီၣ်၀ဲလၢ သုးဂံၢ်ဘါ ၃၀၀ဃၣ်ဃၣ်န့ၣ်လီၤ.
“ပကိကီၢ်ခီ, ၀ီကီၢ်ဆၣ် လဲးပၣ်သ၀ီဒီး ဆ့ၣ်ယွၣ်သ၀ီတပၤ မၤပှဲၤအါထီၣ်၀ဲလၢ သုးဂံၢ်ဘါတဖၣ်လီၤ. မ့မ့ၢ်လၢ လဲးပၣ်တခီ ဆီလီၤပၥ်၀ဲစ့ၢ်ကီး ကျိဖးဒိၣ်တဖၣ်”အဂ့ၢ် စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်မံးရှၢၣ်အသုးလၢ အိၣ်ဖဲသ့ၣ်စယဲးဒီးလဲးပၣ်သ၀ီအံၤ ခးလီၤ၀ဲ ၁၂၀မမ ကျိဖးဒိၣ်ဆူ ကၠဲးထိၣ်ကီၢ်ဆၣ်, ခယွဲသ၀ီပူၤအဃိ လီၢ်က၀ီၤကမျၢၢ် ၆ဂၤဘၣ်ဒိ၀ဲ၀ံၤ ကမျၢၢ်တဂၤတခီ အခီၣ်ဒီၣ်တဲၥ်ကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“သုးကီၣ်မံးရှၢၣ်အသုးန့ၣ် မုၢ်ထူၣ် ၁၁, ၁၂နၣ်ရံၣ်ဃၣ်ဃၣ်အဆၢကတီၢ် ခးလီၤ၀ဲကျိဖးဒိၣ်ဒီး ဟါလီၤခီစ့ၢ်ကီး ခးလီၤ၀ဲလီၤ. ဟံၣ်ဃီတနီၤ ဘၣ်ဟးဂီၤကွံၥ်၀ဲန့ၣ်လီၤ. ဟါလီၤခီန့ၣ် ဟဲကွၢ်ဟုၣ်တၢ်လၢဒြိတဖၣ်စ့ၢ်ကီးအိၣ်၀ဲအဂ့ၢ်” စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ပညိၣ်ခးလီၤ၀ဲ ကျိဖးဒိၣ်တဖၣ်ဆူ ဒူသ၀ီတဖၣ်အဃိ ခယွဲသ၀ီပၣ်ဃုၥ် သ၀ီဖိအကထိဘျဲၣ်လၢအိၣ်ဖဲအကပိၥ်ကပၤစ့ၢ်ကီး ဘၣ်ပၥ်တ့ၢ်အိၣ်ဆိးလီၢ်ကျဲ ဘၣ်ဃ့ၢ်ပူၤဖျဲးအသးအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ် ကညီဒီကလုၥ်စၢဖှိၣ်ကရၢ, တၢ်ပၢဟီၣ်က၀ီၤတဖၣ်အပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုး စူးကါ ကဘီယူၤဒီးဒြိတဖၣ်၀ံၤ ဟးကွၢ်ဟုၣ်ကွၢ်စုၣ်တၢ်လၢ မုၢ်နၤမုၢ်ဆါလၢ ကိးမုၢ်နံၤဃၣ်ဃၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
