လါယူၤလံ ၃ဝသီ, ၂၀၂၆နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့ ၆, ဖလူ-မ့လဲးပၣ်ဟီၣ်ကဝီၤအပူၤ မီၤစိရိၤသုးဒီး KNU, တၢ်ပၢၢ်ဆၢဂံၢ်ဘါသုးအဘၢၣ်စၢၤတၢ်ဒုးဆူၣ်ဝဲဝံၤ ကျိဖးဒိၣ်ပိၥ်ဖးထီၣ်သီၣ်အကလုၢ်တဖၣ် တၢ်နၢ်ဘၣ်အီၤလၢ ဝ့ၢ်မဲးဆီးတကပၤအဂ့ၢ် တၢ်သ့ၣ်ညါဘၣ်လၢ သုးဂ့ၢ်ဝီတၢ်ကစီၣ်ဒီး ပှၤကီၢ်ပယီၤဖိလၢအိၣ်ဖဲ ဝ့ၢ်မဲးဆီးတဖၣ်အအိၣ်န့ၣ်လီၤ.
သုးဂ့ၢ်ဝီတၢ်သဘံၣ်သဘုၣ်လၢအကဲထီၣ်သးဖဲ ဖလူဟီၣ်ကဝီၤအံၤအပူၤ DKBAအပှၤသုးဖိတဖၣ် သုးတမၤဘၣ်ထွဲအသးအဂီၢ်ဒီး မ့ၢ်ပၣ်ဃုၥ်တခီ တၢ်ကဟံးန့ၢ်ဂံၢ်ဝီတုၤလီၤတီၤလီၤအဂ့ၢ်DKBA ထုးထီၣ်ပၥ်ဖျါဃၥ်ဝဲန့ၣ်လီၤ.
“မဟါ ဟါ၁၁နၣ်ရံၣ်အဆၢဃၥ်ဃၥ်န့ၣ် ကျိဖးဒိၣ်လီၤတဲၥ်ဝဲဖးဆူၣ်ညါလီၤ. တြဲၤတဖၣ်ဒၣ်လဲၥ်ကနိးဝဲဒၣ်လီၤ. မဲဆီးတခီ တၢ်နၢ်ဟူဘၣ်ဝဲ ကျိဖးဒိၣ်အကလုၢ်တဖၣ်လၢဟဲဟးထီၣ်လၢ မ့လဲးပၣ်တၢ်ဒုးအပူၤ ကိးမုၢ်နံၤဃၥ်ဃၥ်လီအဂ့ၢ်” ပှၤကီၢ်ပယီၤဖိလၢ အိၣ်ဖဲ ဝ့ၢ်မဲဆီးတးဂၤစံးဝဲဒၣ်န့ၣ်လီၤ.
စးထီၣ်လၢ လါယူၤလံလါတဝၣ်အဆၢကတီၢ် ကီၢ်ပယီၤသုးမုၢ်ဒိၣ်မၤဆူၣ်ထီၣ်သုးဂ့ၢ်ဝီဖဲ မ့လဲးပၣ်ဟီၣ်ကဝီၤဝံၤ KNUအစုတီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)ဒီးသုးပၥ်ဖှိၣ်တဖၣ် ခီၣ်ဆၢဒုးဝဲအဂ့ၢ် တၢ်သ့ၣ်ညါဘၣ်လၢ သုးဂ့ၢ်ဝီဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
“မီၤစိရိၤသုးကျိၤတဖၣ် ဟဲတုၤၢဝဲဒၣ် ဖဲမ့လဲးပၣ်သဝီကလံၤစိး မံထၢၣ်၇၀၀၀ဃၣ်ဃၣ်လီၤ. ဟဲအိၣ်ဘူးဒီး မ့လဲးပၣ်လံ. တၢ်ပၢၢ်ဆၢဂံၢ်ဘါကရူၢ်တပၤစ့ၢ်ကီး တပတုၥ်ကွံၥ်ဝဲခီၣ်ဆၢဒုးတၢ်အသဟီၣ်ဘၣ်”အဂ့ၢ် CDMသုးခိၣ် စ့ၣ်ယီၣ် စံးဝဲဒၣ်န့ၣ်လီၤ.
မီၤစိရိၤအသုးအံၤ စးထီၣ်ဖဲ လါယူၤလံ၉သီအနံၤန့ၣ် စးထီၣ်ပၥ်ဖှိၣ်ထီၣ်သးဂံၢ်ဘါဖဲ လ့က့ၣ်ကိၥ်ဒီး ဟဲထီၣ်မၤဒုးယၤရဲၣ်ကျဲၤဖဲ မ့လဲးပၣ်သဝီ, ကလံၤစိး ကၠီးခဲးဟီၣ်ကဝီၤဝံၤ စံးဝဲလၢ ကဒုးလီၤပှီၢ်အိၣ်လဲတၢ်လံၣ်တၢ်လီကျိၥ်စ့တၢ်မၤ(ကၠါဖၠၣ်)တဖၣ်အဂီၢ် ဟဲထီၣ်မၤဒုးယၤရဲၣ်ကျဲၤအဂ့ၢ် မီၤစိရိၤတပၤ ထုးထီၣ်ပၥ်ဖျါဃၥ်ဝဲဒၣ်န့ၣ်လီၤ.
လါယူၤလံ ၂၇သီ, မီၤစိရိၤသုးအတၢ်ထုးထီၣ်ပၥ်ဖျါအဖီခိၣ် ဖဲ၂၅သီအနံၤန့ၣ် အဝဲသ့ၣ်လဲၤတုၤဝဲဆူ ကၠီၣ်တဲၣ်ကီၢ်ဆၢ မ့လဲးပၣ်သဝီကလံၤစိး မံထၢၣ် ၇၀၀၀ဃၥ်ဃၥ်လံအဂ့ၢ်န့ၣ်လီၤ. မီၤစိရိၤအသုး အတၢ်ထုးထီၣ်ပၥ်ဖျါအပူၤ တၢ်ဒုးကဲထီၣ်သးဒီး KNLA ၊ PDFလၢ ဟံၣ်န့ၢ်ဝဲ အိၣ်လဲတၢ်လံၣ်တၢ်လီကျိၥ်စ့တၢ်မၤတၢ်ဘံၣ်တၢ်ဘၢအဘၢၣ်စၢၤအဂ့ၢ် ပၥ်ဖျါဃၥ်ဝဲဒၣ်န့ၣ်လီၤ.
ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ ကီၠးခဲဒီး မ့လဲးပၣ်ဟီၣ်ကဝီၤတဖၣ်အံၤ အိၣ်ဝဲဒၣ်လၢ တၢ်ဘၣ်ဘျူးဒံၣ်မိၣ်ကရ့ၣ်စံၣ် ကညီသုးမုၢ်ဒိၣ် (DKBA)အတၢ်ပၢဆှၢဟီၣ်ကဝီၤအပူၤန့ၣ်လီၤ. အပူၤကွံၥ် ၂၀၂၅နံၣ်, လါနိၣ်ဝ့ဘၢၣ်အတီၢ်ပူၤန့ၣ် (KNU/ KNLA) နုၥ်လီၤသဖိဝဲ မ့လဲးပၣ်ကၠါဖၠၣ်တၢ်မၤလီၢ်လၢ DKBAပၢဆှၢဃၥ်အံၤန့ၣ်လီၤ.
DKBAပၢဆၢကၠီးခဲးဟီၣ်ကဝီၤအပူၤ ပှၤလၢမၤကၠါဖၠၣ်တၢ်မၤတဖၣ်အံၤ စးထီၣ်ဖဲလၢလါယူၤလံ ၁၈သီအနံၤဒီး အသီ၁၀အတီၢ်ပူၤ ကဟးထီၣ်ဘၣ်လၢ ဟီၣ်ကဝီၤအပူၤအံၤအဂ့ၢ် ဘိးဘၣ်ရၤလီၤဃၥ်ဝဲအဂ့ၢ် DKBAဂ့ၢ်ခီၣ်ထံးတၢ်ကစီၣ်တဂၤ တဲလီၤဃၥ်ဝဲဖဲစှၤသီအတီၢ်ပူၤန့ၣ်လီၤ.
ဘၣ်ထွဲဒီးတၢ်ဘိးဘၣ်ရၤလီၤအလၢအပှဲၤတခီ DKBAဒီး မီၤစိရိၤသုးခံကပၤလၢၥ် တထုးထီၣ်ပၥ်ဖျါဃၥ်ဝဲအဖိးသဲစးအပူၤဘၣ်.
တၢ်ဂီၤ – KNLA GHQ
