၂၀၂၆ နံၣ်, လါယူၤလံ(၃၀)သီ
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ , ဘျံးဒဝဲၢ်ကီၢ်ရ့ၣ်, ကီၢ်သူလ့ၤသ့ၣ်ပှၢ်ဝဲၤကျိၤ တီခိၣ်ရိၣ်မဲ ရဲၣ်ကျဲၤမၤဝဲတၢ်မၤလိ ဘၣ်ထွဲ တၢ်ကၢၤဃၣ်ကတီၤက့ၤ ထံအခီၣ်ထံးခီၣ်ဘိတဖၣ် ဖဲ ၂၀၂၆ နံၣ်, လါယူၤလံ(၂၀)သီတုၤ လါယူၤလံ(၂၅)သီ လၢလၢၢ်မုၢ်လါကီၢ်ဆၣ်အပူၤန့ၣ်လီၤ.
လၢတၢ်ရဲၣ်တၢ်ကျဲၤအံၤန့ၣ် ကီၢ်ဆၣ်ပတီၢ် ဘုၣ်ဖီၣ်မၤညၣ်ဝဲၤကျိၤ, စံၣ်ပှဲၤသူၣ်ဖျးဝဲၤကျိၤ, ကညီပိၥ်မုၣ်ကရၢ(KWO), ကညီသးစၢ်ကရၢ(KYO) ဒီး ကီၢ်သူလ့ၤသ့ၣ်ပှၢ်ဝဲၤကျိၤ အခၢၣ်စးတဖၣ် ဟဲထီၣ်တၢ်မၤလိ ပှၤနီၣ်ဂံၢ်(၂၀)ဂၤ န့ၣ်လီၤ.
တၢ်မၤလိအံၤ အတၢ်ပညိၣ်မ့ၢ်ဒ်သိး ကီၢ်သူလ့ၤအပူၤ တၢ်ဟ့ၣ်တၢ်သ့ၣ်ညါဒီး တၢ်ကမၤအါထီၣ်ကံၢ်စီလၢ တၢ်ကၢၤဃၣ်ကတီၤ ခိၣ်ဃၢၤန့ဆၢၣ်ဒီး သ့ၣ်ပှၤအဂီၢ်, တၢ်ကသူဒီး ကၢၤကတီၤဃၣ်ထံအခီၣ်ထံးခီၣ်ဘိ လၢအလၢအပှဲၤဒီးကံၢ်စီလၢ နံၣ်ထီၣ်အဂီၢ်ဒီး တၢ်ကပၢဆှၢရဲၣ်ကျဲၤအီၤလၢ အကျိၤအကျဲဘၣ်လီၣ်ဘၣ်စးအဂီၢ် တၢ်အိၣ်ထီၣ်ဝဲတၢ်မၤလိတၢ်ရဲၣ်တၢ်ကျဲၤအံၤန့ၣ်လီၤ.
လၢန့ၣ်အမဲၥ်ညါ တၢ်ကၢၤကတီၤဃၣ် ထံအခီၣ်ထံးခီၣ်ဘိ, သ့ၣ်ပှၢ်ဒီးထံနုၥ်လီၤဟးထီၣ်အကျိၤ အတၢ်ရ့ဒိၣ်, တၢ်ပၢဆှၢရဲၣ်ကျဲၤ ခိၣ်ဃၢၤန့ဆၢၣ်အခီၣ်ထံးခီၣ်ဘိဒီး တၢ်ဘၣ်ထွဲ လီၢ်ကဝီၤဖိသ့ၣ်တဖၣ် အတၢ်ပၥ်ဃုၥ်ပၥ်ဂီၢ် တၢ်ဂ့ၢ်တၢ်ကျိၤတဖၣ် တၢ်ဟ့ၣ်ခီ ဟ့ၣ်နီၤစ့ၢ်ကီးအီၤန့ၣ်လီၤ.
လၢကီၢ်သူလ့ၤသ့ၣ်ပှၢ်ဝဲၤကျိၤတပၤ တၢ်ကၢၤကတီၤဃၣ် ခိၣ်ဃၢၤန့ဆၢၣ်, တၢ်ပၢဆှၢရဲၣ်ကျဲၤထံအခီၣ်ထံးခီၣ်ဘိဒီး တၢ်တြီဃၣ် ကတီၤက့ၤသ့ၣ်ပှၢ်တၢ်ဖံးတၢ်မၤတဖၣ်န့ၣ် တၢ်ပၥ်ဖှိၣ်သကိးသးဒီး လီၢ်ကဝီၤကမျၢၢ်ဖိအိၣ်ဝဲ ဒီးဒ်သိးတၢ်ကဒုးလိၥ်ထီၣ်ဖးထီၣ် တၢ်ပၢဆှၢရဲၣ်ကျဲၤ ခိၣ်ဃၢၤန့ဆၢၣ်အခီၣ်ထံးခီၣ်ဘိအကျိၤအကျဲ လၢနံၣ်ထီအဂီၢ်စ့ၢ်ကီးတၢ်ဂုၥ်ကျဲးစၢးရဲၣ်ကျဲၤမၤအီၤ အိၣ်ဝဲန့ၣ်လီၤ.
တၢ်ဂီၤ-ဘျံးဒဝဲၢ်ကီၢ်ရ့ၣ်, လၢၢ်မုၢ်လါကီၢ်ဆၣ်အပူၤ ကီၢ်သူလ့ၤသ့ၣ်ပှၢ်ဝဲၤကျိၤ တီခိၣ်ရိၣ်မဲရဲၣ်ကျဲၤမၤဝဲ တၢ်ကၢၤကတီၤဃၣ် ထံအခီၣ်ထံးခီၣ်ဘိ တၢ်မၤလိ.
Ref – KNU
