လါဒံၣ်စ့ဘၢၣ် ၁၈သီ, ၂၀၂၅နံၣ်
ပီၢ်လဲၣ်ယီၥ် ကဘီသန့တခါအပူၤအိၣ် ရၢးရှါကဘီထံလၥ်တခိၣ်အံၤ အဆိကတၢၢ်တဘျီ တၢ်လဲၤဒုးအီၤလၢ ထံလၥ်ဒြိတဖၣ် ဘၣ်ဂ့ၢ်ဘၣ်၀ီအဂ့ၢ် ကီၢ်ယူၣ်ကရ့စံး၀ဲန့ၣ်လီၤ.
ရၢးရှါ ထံလၥ်ကဘီတခိၣ်လၢ တၢ်ပတုၥ်ဃၥ်အီၤ ဖဲ ကီၢ်ရၢးရှါကလံၤထံး, နိၣ်ဘိၣ်ရိၣ်ဆံၣ်ယဲး၀့ၢ်အိၣ် ကဘီသန့ၤအံၤ တၢ်လဲၤဒုးအီၤ ထံလၥ်ဒြိတဖၣ်အဂ့ၢ် ကီၢ်ယူၣ်ကရ့ ပ့ၢ်ဆှါ၀ဲၤကျိၤ ဘိးဘၣ်ရၤလီၤဃၥ်၀ဲဖဲ မုၢ်ဆၣ်အနံၤန့ၣ်လီၤ.
တၢ်လဲၤဒုးအီၤအံၤ မ့ၢ်ဒုးယၤရဲၣ်ကျဲၤတခါလၢ ပၥ်ဖှိၣ်လဲၤဒုးတၢ်ဒီး ကီၢ်ယူၣ်ကရ့ထံသုးအဂ့ၢ် ယူၣ်ကရ့ပ့ၢ်ဆှါ၀ဲၤကျိၤ စံး၀ဲန့ၣ်လီၤ. ကဘီထံလၥ်လၢ တၢ်လဲၤဒုးအီၤအံၤန့ၣ် ဟဲတီၣ်၀ဲ တၢ်ပၥ်ခရူးမျိၥ်တၢ်လီၢ်(၄)ခါလၢ လၢရၢးရှါ ကလဲၤဒုးဃီၤ၀ဲ ယူၣ်ကရ့တၢ်ခးပနီၣ်တဖၣ်အဆၢကတီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး တၢ်မ့ၢ်သူၣ်ထီၣ်ထံလၥ်ကဘီတခိၣ်န့ၣ် တၢ်လၢၥ်ဘူၣ်လၢၥ်စ့ကလီၤ၀ဲ ဒီလၣ်အကကွဲၢ် ၅၀၀အဂ့ၢ် ယူၣ်ကရ့ၣ်ပ့ၢ်ဆှါ၀ဲၤကျိၤ စံး၀ဲန့ၣ်လီၤ.
အခဲအံၤတၢ်လဲၤဒုးတၢ်န့ၣ် မ့ၢ်သုးတၢ်တိၥ်ကူၣ်ကျဲၤတခါလၢ တၢ်လဲၤမၤဟးဂီၤကွံၥ် ရၢးရှါအတၢ်ဟဲဒုးတၢ်လၢမျိၥ်အကံၢ်အစီအံၤ တက့တခီအဂ့ၢ် ယူၣ်ကရ့ၣ်မံၣ်ဒံၣ်ယၣ်တဖၣ် ပၥ်ဖျါဃၥ်၀ဲန့ၣ်လီၤ. ဘၣ်ဆၣ်ဒီး ယူၣ်ကရ့ၣ်အတၢ်ပၥ်ဖျါတဖၣ်န့ၣ် တဖိးမံလိၥ်အသးဒီး တၢ်အိၣ်သးတဖၣ်ဘၣ်အဂ့ၢ် ရၢးရှါကိတိၥ်၀ဲၤကျိၤ စံး၀ဲန့ၣ်လီၤ.
ယူၣ်ကရ့အတၢ်လဲၤဒုးတဖၣ် န့ၣ်တမ့ၢ်လၢ အမၤနၢၤတၢ်ဘၣ်အသိး သုးကဘီမ့တမ့ၢ် ထံလၥ်ကဘီလၢ ဘၣ်တၢ်အိၣ်ပတုၥ်ဃၥ်ဖဲ နိၣ်ဘိၣ်ရိၣ်ဆံၣ်ယဲး ထံသုး သုးကလၢၤတဖၣ်တကးဘၣ် ပီၣ်လဲၣ်ယီၥ်ထံတၢ်ပီးတၢ်လီဟီၣ်က၀ီၤအပူၤအိၣ် ပှၤမၤတၢ်ဖိတဖၣ် တၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်အဂ့ၢ် ရၢးရှါကိတိၥ်၀ဲၤကျိၤ စံး၀ဲန့ၣ်လီၤ.
