လါဒံၣ်စ့ဘၢၣ် ၁၈သီ, ၂၀၂၅နံၣ်
ကညီဒီကလုၥ်စၢဖှိၣ်ကရၢ- KNU, သုးက့(၅)ဟီၣ်က၀ီၤအပူၤ ခီဖျိသုးကီၣ်မံးရှၢၣ်အသုး မၤကလံၤကျါတၢ်ဒုးဒီးခးလီၤကျိဖးဒိၣ်တဖၣ်ဆူၣ်ဆူၣ်ကိၤကိၤအဃိ ဖိသၣ်လၢသးနံၣ်အိၣ်(၄)နံၣ်(၁)ဂၤပၣ်ဃုၥ် ကမျၢၢ်(၂၀)ဘျဲၣ်သံဒီးဘၣ်ဒိတဖၣ်အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ်အသုးလၢ ဒ်သိးကဒိၣ်စိက့ၤ ဟီၣ်က၀ီၤလၢဘၣ်တၢ်ပျၢ်ကွံၥ်အီၤဖဲ သုးက့(၅), ၀ါဒူဒီး၀ၣ်သိခိၣ်အဘၢၣ်စၢၤတဖၣ် ဂုၥ်ကျဲးစၢးဟဲထီၣ်သုးကျိၤတဖၣ်, အစုတီၤဖီလၥ်BGF,DKBAသုးဒီး KNLA,PDFသုးတဖၣ်အဘၢၣ်စၢၤ တၢ်ဒုးဆူၣ်၀ဲဒၣ် ဖဲဒံၣ်စ့ဘၢၣ် ၁၄သီအနံၤ, ဂီၤအဆၢကတီၢ်တုၤမုၢ်ထူၣ်အဆၢကတီၢ်အဂ့ၢ် တၢ်ပၢၢ်ဆၢဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးကီၣ်မံးရှၢၣ်အသုးကျိၤလၢ ဟဲထီၣ်သုးကျိၤခဲအံၤခဲအံၤဆူ သုးက့(၅), ကတၢးတံးအံၤ ခီဖျိ KNLAသုးပၥ်ဖှိၣ်တဖၣ် ခိးဒုးအီၤလၢကျဲတီၤအဃိ ဘၣ်ဒိနးဒီး လဲၤထီၣ်တုၤဆူ ၀ၣ်သီခိၣ်န့ၣ် အိၣ်ထီၣ်၀ဲလံ ၄လါဘျဲၣ်လံန့ၣ်လီၤ.
လၢတၢ်န့ၣ်အဃိ လါဒံၣ်စ့ဘၢၣ် ၁၂သီ, ဂီၤအဆၢကတီၢ်န့ၣ် သုးကီၣ်မံးရှၢၣ်အသုး စူးကါ၀ဲ ကဘီယူၤဒုးသုးပၣ်ဃုၥ် Y12တဖၣ်၀ံၤ လဲၤတ့ၢ်လီၤ၀ဲမ့ၣ်ပိၣ်တဖၣ်ဆူ ခ့ၣ်အဲၣ်ယူၣ်-သုးက့(၅)ဟီၣ်က၀ီၤအပူၤန့ၣ်လီၤ.
ဒံၣ်စ့ဘၢၣ် ၁၂သီ, ဟါ(၁၂)နၣ်ရံၣ်အဆၢကတီၢ်စ့ၢ်ကီး သုးကီၣ်မံးရှၢၣ်အသုး ကဘီယူၤဒုးသုး လဲၤတ့ၢ်လီၤမ့ၣ်ပိၢ်(၂)ဖျၢၣ် ဆူ ဘုသိၣ်ကီၢ်ဆၣ်, ဘုအါဒဲကရူၢ်, မၣ်မုၢ်သ၀ီပူၤအဂ့ၢ် သုးက့(၅)ဂံၢ်ခီၣ်ထံးသုးဂ့ၢ်၀ီတၢ်ကစီၣ်တဂၤ စံး၀ဲန့ၣ်လီၤ.
ဖဲလၢလဲၤတ့ၢ်လီၤမ့ၣ်ပိၢ်အပူၤ ပှၤလၢဘၣ်ဒိဒီးသံအိၣ်ထီၣ်၀ဲ (၂၀)ဂၤဃၣ်ဃၣ်၀ံၤ ဟံၣ်ဃီတဖၣ်စ့ၢ်ကီး ဘၣ်ဟးဂီၤကွံၥ်၀ဲန့ၣ်လီၤ. ဖဲလၢပှၤသံအကျါ ပၣ်ဃုၥ်စ့ၢ်ကီး ဖိသၣ်လၢသးနံၣ်အိၣ်(၄)နံၣ်တဂၤပၣ်ဃုၥ်၀ဲအဂ့ၢ် သုးဂ့ၢ်၀ီဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ဒံၣ်စ့ဘၢၣ် ၁၂သီအနံၤ, ဂီၤအဆၢကတီၢ် သုးကီၣ်မံးရှၢၣ်အသုး ကဘီယူၤဒုးသုး လဲၤတ့ၢ်လီၤမ့ၣ်ပိၢ်(၃)ဖျၢၣ်ဆူ ဖၣ်ပူၣ်၀့ၢ်ပူၤန့ၣ်လီၤ. တကးဘၣ် လဲၤတ့ၢ်လီၤ၀ဲစ့ၢ်ကီး ဖဲ ၀ါဒူ, ၀ၣ်သိခိၣ်ဟီၣ်က၀ီၤ လၢတစှၤန့ၢ်၃ဘျီဘၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
ဖဲလၢ ဟဲတ့ၢ်လီၤမ့ၣ်ပိၢ်လၢ Y12အဆၢကတီၢ် သုးကီၣ်မံးရှၢၣ်သုးပၥ်ဖှိၣ်လၢအိၣ်ဖဲ ကမးမိၢ်သုးကလၢၤဒီး တတါအူအိၣ်သူၣ်လီၤ BGFသုးပၥ်ဖှိၣ်တဖၣ် စ့ၢ်ကီး ခးလီၤစၢၤ၀ဲဒၣ်လၢ ကျိဖးဒိၣ်တဖၣ်န့ၣ်လီၤ. ဒံၣ်စ့ဘၢၣ် ၁၀သီအနံၤတုၤ ၁၂သီအနံၤအတီၢ်ပူၤ သုးကီၣ်မံးရှၢၣ်အသုး စူးကါ၀ဲ Y12ကဘီယူၤ၀ံၤ လဲၤကွၢ်ဟုၣ်ကွၢ်စုၢ်တၢ်လၢ ခ့ၣ်အဲၣ်ယူၣ်-သုးက့(၁), (၃)ဒီး သုးက့(၅)ဟီၣ်က၀ီၤတဖၣ်အပူၤ တပယူၥ်ဃီအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
