လါဒံၣ်စ့ဘၢၣ်(၁၅)သီ,၂၀၂၅နံၣ်,အၣ်ထူခ့ၣ်တၢ်ကစီၣ်
ကညီကီၫ်စဲၣ်,ကီၫ်ဆၣ်ရၤမတံ,ဖဲတီနီၣ်ကစၢၫ်ခီၣ်ထံး ကၠါဖျးတၫ်မၤလီၫ်အသီလၢBGFတ့ထီၣ်တဖၣ်အပူၤ လၢတၫ်သုး ဆှၢ၀ဲပှၤတရူးဖိဒီးပှၤထံဂုၤကီၫ်ဂၤဖိတဖၣ်အပူၤ သုးခီၣ်မံးရှၢၣ်ပာ်ဃုာ်အဂ့ၫ် ကၠါဖျးပှၤမၤတၫ်ဖိ လၢလဲၤတုၤဖဲန့ၣ်တဖၣ် ဒီးကညီဂ့ၫ်ခီၣ်ထံးတၫ်ကစီၣ်သန့တဖၣ် တဲ၀ဲန့ၣ်လီၤ.
ပယီၤသုးအစုတီၤဖီလာ် BGFန့ၣ် လၢတၫ်တ့ထီၣ်ကၠါဖျး၀့ၫ်သီဖဲတီနီၣ်ကစၢၫ်ခီၣ်ထံးအပူၤ ပယီၤသုးန့ၣ်လၢအ၀ဲသ့ၣ်အ တြဲၤတဆီ ဆှၢ၀ဲပှၤတရူးဖိဒီးထံဂုၤကီၫ်ဂၤတဖၣ်ဆူတီနီၣ်ကစၢၫ်ခီၣ်အဂ့ၫ် တၫ်သ့ၣ်ညါဘၣ်လီၤ.
“ဖဲနိၣ်၀့ဘၢၣ်(၂၆)သီဒီး(၂၇)သီအနံၤန့ၣ် တီၣ်ထီၣ်၀ဲပှၤတရူးဖိဒီးထံဂုၤကီၫ်ဂၤဖိတဖၣ်၀ံၤ ပယီၤသုးန့ၣ် လဲၤဆှၢ၀ဲဆူတီ နီၣ်ကစၢၫ်ခိၣ်ထံးလၢသိလ့ၣ်တဖၣ်လီၤ.ပှၤတရူးဖိခဲလၢာ်န့ၣ် ဖီၣ်ဃာ်၀ဲ၁၃/ခိၣ်ဂီၤတဖၣ်လီၤ.ကခီဂာ်တြဲၤအဂီၫ် ပယီၤ သုးဟ့ၣ်ဃာ်၀ဲတၫ်ပျဲလီၤ.ဆှၢ၀ဲဆူကၠါဖျးတၫ်လီၫ်သီအိၣ်အဂ့ၫ်”ကညီဂ့ၫ်ခီၣ်ထံးတၫ်ကစီၣ်တဲ၀ဲလီၤ.
ကညီကီၣ်စဲၣ်,ကီၫ်ဆၣ်ရၤမတံ,တီနီၣ်ကစၢၫ်ခီၣ်ထံး,သ့ၣ်ကတံာ်သ၀ီဒီးအကပိာ်ကပၤတဖၣ်အပူၤ ကၠါဖျးတၫ်သူၣ်ထီၣ် အသီတဖၣ် လၢကတီၫ်အံၤ တ့ထီၣ်၀ဲဒိၣ်ဒိၣ်မုာ်မုာ်ဒီးပယီၤသုးအစုတီၤဖီလာ် BGFဘိၣ်တ့ၣ်၀့န့ၣ် တရူးပှၤကဲဒိၣ်ဒီးပှၤ မၤတၫ်ဖိလၢအရ့ဒိၣ် လၢအိၣ်ဖဲ KK Parkဒီးရွှ့ၣ်ကိးကိာ်တဖၣ် သုးန့ၫ်၀ဲအလီၫ်အဂ့ၫ် တၫ်သ့ၣ်ညါဘၣ်လီၤ.
ကၠီၣ်တဲၣ်-ပယီၤကီၫ်ဆၢ, KK Parkဒီးရွှ့ၣ်ကိးကိာ် ကၠါဖျးတၫ်မၤလီၫ်တဖၣ် ပယီၤသုးနုာ်လီၤဖီၣ်၀ံၤအလီၫ်ခံ တၫ်လီၫ်၀ဲ န့ၣ်အပူၤ တရူးပှၤကဲဒိၣ်တဖၣ်,ကၠါဖျးပှၤလီအိၣ်ကျိာ်စ့ကဲခိၣ်နၫ်တဖၣ် ခီဖျိBGFတၫ်မၤစၢၤအဃိ တၫ်သုးဆှၢ၀ဲဆူ တီ နီၣ်ကစၢၫ်ခီၣ်ထံး,သ့ၣ်ကတံာ်သ၀ီအဂ့ၫ်,လၢကတီၫ်အံၤ တီနီၣ်ကစၢၫ်ခီၣ်ထံး ကျါဖျးတၫ်သူၣ်ထီၣ်တဖၣ်တၫ်တ့အါထီၣ် ၀ဲကွ့ၫ်ကွ့ၫ်အဂ့ၫ်ဒီးပှၤလၢဟံးန့ၫ်မူဒါ တ့ထီၣ်ကၠါဖျးတၫ်သူၣ်ထီၣ်အံၤန့ၣ် မ့ၫ်BGFသုး ဘိၣ်တ့ၣ်၀့အဂ့ၫ် တၫ်သ့ၣ်ညါဘၣ် လီၤ.
လၢကတီၫ်အံၤ ထံဒီးလီမ့ၣ်အူပျံၤဒီးအ့ၣ်ထၢၣ်နဲးတၫ်ဆဲးကျိပျံၤတဖၣ် ထီထီၣ်ဃာ်၀ဲဒီးတ့ထီၣ်ကျဲတဖၣ်၀ံၤ တၫ်သူၣ် ထီၣ်တဖၣ်စ့ၫ်ကီးတ့ထီၣ်၀ဲလၢအဆိအချ့အဂ့ၫ် တၫ်သ့ၣ်ညါဘၣ်လီၤ.
“တလၢတပှဲၤဒံးဘၣ်.ပှၤအိၣ်အါမးဒီးအိၣ်လၢအကထိညါလီၤ.KTVတဖၣ်,ကျးတဖၣ်စ့ၫ်ကီးတၫ်အိးထီၣ်၀ဲလံ.စးထီၣ်ကဒါက့ၤတၫ်မၤလံအဂ့ၫ်”ပှၤမၤတၫ်ဖိလၢလဲတုၤဆူကၠါဖျးတၫ်သူၣ်ထီၣ်အသီအလီၫ်တဂၤတဲ၀ဲန့ၣ်လီၤ.
လၢကတီၫ်အံၤ သ့ၣ်ကတံာ်သ၀ီဒီးဖါကျူသ၀ီတဖၣ်အပူၤ ကၠါဖျးတၫ်သူၣ်ထီၣ်တၫ်တ့အါထီၣ်၀ဲ (၂၀)ဖျၢၣ်ဘျဲၣ်၀ံၤမ့ၫ် ပာ်ဖှိၣ်ဒီးတၫ်သူၣ်ထီၣ်အိၣ်ပာ်စၢၤန့ၣ် အစှၤကတၢၫ်ကအိၣ်၀ဲ(၅၀)ဖျၢၣ်အဂ့ၫ်,ပှၤတ့ထီၣ်ကၠါဖျးတၫ်သူၣ်ထီၣ်လၢအဆိ ကချ့တဖၣ်စ့ၫ်ကီး မ့ၫ်ဒၣ်ပှၤတရူးဖိတဖၣ်အဂ့ၫ် တၫ်သ့ၣ်ညါဘၣ်လီၤ.
ပယီၤသုးအစုတီၤဖီလာ် BGFဘိၣ်တ့ၣ်၀့အပှၤတဖၣ်န့ၣ် တရူးကၠါဖျးတဖၣ်အဂီၫ် လဲၤကိးန့ၫ်၀ဲပိာ်မုၣ်တဖၣ် လၢ၀့ၫ်ရၤ မတံဒီးရွှ့ၣ်ကိးကိၣ်တဖၣ်၀ံၤအိးထီၣ်ဃာ်န့ၫ်၀ဲတၫ်စံၫ်သးဒၢးတဖၣ်ဒီးတၫ်ဆါလီၤအီၣ်သးဒၢးတဖၣ်အဂ့ၫ်,တၫ်တ့ထီၣ်ကၠါဖျးတၫ်သူၣ်ထီၣ်သီတဖၣ်န့ၣ် ပယီၤသုးစ့ၫ်ကီးသ့ၣ်ညါ၀ဲဒီးတၫ်သူၣ်ထီၣ်တၫ်ဖိတၫ်လံၤလၢအလိၣ်တဖၣ် ပယီၤသုး အတၫ်ဟ့ၣ်ခွဲးအဖီခိၣ် ဟဲစိာ်ထီၣ်၀ဲလၢဖၣ်အၣ်တကပၤအဂ့ၫ် တၫ်သ့ၣ်ညါဘၣ်လီၤ.
တၫ်နုာ်လီၤဆူတၫ်လီၫ်အံၤအဂီၫ် မၤဃာ်တၫ်ဘံၣ်တၫ်ဘၢဃံးဃံးဒီးတဟ့ၣ်တၫ်ပျဲလၢတၫ်ကဒိတၫ်ဂီၤဒီး တၫ်ဂီၤမူတဖၣ် ဘၣ်အဂ့ၫ်,ဖဲတၫ်လီၫ်၀ဲန့ၣ်အပူၤ ပှၤတရူးဖိတဖၣ်စ့ၫ်ကီး တၫ်ထုးထီၣ်န့ၫ်၀ဲတၫ်အိၣ်ဆိးအဂီၫ်တၫ်အုၣ်ကီၤတဖၣ်အဂ့ၫ် တၫ်သ့ၣ်ညါဘၣ်လီၤ.
