လါဒံၣ်စ့ဘၢၣ် ၁၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဃုထၢအယီၤအဘျၣ်လၢ သုးကီၣ်မံးရှၢၣ်ကရဲၣ်ကျဲၤမၤ၀ဲအံၤ ကမျၢၢ်အတၢ်သးစၢၢ်ဆၢတအိၣ်ဘၣ်ဒီး ဟဲဒိးသမံသမိးတၢ်ဖးစရီတအိၣ်ဘၣ်အဃိ အစုတီၤဖီလၥ် ၀ဲၤကျိၤဘၣ်ထွဲ Non-CDMပှၤမၤတၢ်ဖိတဖၣ် ကလဲၤသမံသမိးတၢ်ဖးစရီဒီး ဒ်သိးကမျၢၢ်ကဟ့ၣ်တၢ်ဖးအဂီၢ် ဟ့ၣ်ဆီၣ်သနံးမၢ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ်အစုတီၤဖီလၥ် ၀ဲၤကျိၤဘၣ်ထွဲတဖၣ်အံၤ ဒ်သိးအပှၤမၤတၢ်ဖိတဖၣ် လဲၤသမံသမိးတၢ်ဖးစရီတဖၣ်အိၣ်တအိၣ် မၢပၥ်ဖျါထီၣ်တၢ်မၤနီၣ်မၤဃါတဖၣ်, တၢ်ဖးစရီအပူၤ ပှၤလၢမံၤသၣ်တဖၣ် တၢ်မၢမၤပှဲၤ ပိၣ်စၣ် ၃ ဖီၣ်တဖၣ်၀ံၤ ကအိၣ်လၢတၢ်ဖးစရီအပူၤအဂီၢ် မၢမၤပှဲၤတီၣ်ဖျါထီၣ်၀ဲတဖၣ်အိၣ်၀ဲန့ၣ်လီၤ.
တၢ်ကဒိတၢ်ဂ့ၢ်တၢ်ကျိၤတဖၣ်တၢ်ဂီၤ၀ံၤ ကတီၣ်ဖျါထီၣ်၀ဲ ၀ဲၤကျိၤဘၣ်ထွဲခိၣ်နၢ်တဖၣ်အဂီၢ် နဲၣ်လီၤဃၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် နဲၣ်လီၤဃၥ်၀ဲ Non CDMပှၤမၤတၢ်ဖိတဖၣ်လၢ တၢ်ကလဲၤသမံးသမိး က၀ီၤဒ့/သ၀ီကရူၢ်တဖၣ်လၢကးလီၤ၀ဲ တၢ်ဖးစရီအိၣ်တအိၣ်တကးဘၣ် တၢ်ကလဲၤသမံသမိးပၥ်ဂၢၢ်ပၥ်ကျၢၢ်၀ဲ တုၤလၢကီၢ်ဆၣ်လၢဘၣ်ထွဲ တၢ်ဃုထၢကီၣ်မံးရှၢၣ်၀ဲၤဒၢးတဖၣ်အဂ့ၢ် ကတီၢ်ခဲအံၤပှၤမၤတၢ်ဖိလၢ အမၤတၢ်ဖဲန့ၣ်တဂၤ စံး၀ဲန့ၣ်လီၤ.
“၀ဲၤကျိၤလၢဘၣ်ထွဲတခါစုၥ်စုၥ်န့ၣ် စးထီၣ်အိၣ်ထီၣ်၀ဲၤဒၢးတဖၣ်၀ံၤ ကိး၀ဲဂ့ၢ်ဂီၤအူတၢ်အိၣ်ဖှိၣ်၀ံၤ တဲပျံၤတဲဖူး၀ဲ ပှၤမၤတၢ်ဖိတဖၣ်လီၤ. ပှၤလၢတသမံသမိးတၢ်ဖးဒီးတဟ့ၣ်တၢ်ဖးတဖၣ် တၢ်ပတုၥ်ကွံၥ်အီၤလၢတၢ်မၤဒီး ကပၥ်လီၤလၢဃိၣ်ပူၤအဂ့ၢ်စံး၀ဲန့ၣ်လီၤ. ၀ံၤအလီၢ်ခံ ဟ့ၣ်၀ဲတၢ်ဂ့ၢ်တၢ်ကျိၤတဖၣ်ဆူ တၢ်ဃုထၢကီၣ်မံးရှၢၣ်၀ံၤ မၢသမံသမိး၀ဲစရီ”အဂ့ၢ် ပှၤမၤတၢ်ဖိတဂၤလၢ ဘၣ်တၢ်မၢအီၤတဖၣ် စံး၀ဲန့ၣ်လီၤ.
သုးကီၣ်မံးရှၢၣ်န့ၣ် တၢ်ဃုထၢအယီၤအဘျၣ်လၢ ကမၤ၀ဲအံၤ ဒ်သိးပှၤကပၣ်ဃုၥ်ပၣ်ဂီၢ်အါအါဂီၢ်ဂီၢ်ဒီးကဟ့ၣ်တၢ်ဖးအါအါဂီၢ်ဂီၢ်အဂီၢ် မၤပျံၤမၤဖူး၀ဲကမျၢၢ်ဒီး ဟ့ၣ်သဆီၣ်သနံး၀ဲလၢကျဲအကလုၥ်ကလုၥ်န့ၣ်လီၤ.
ပှၤနီၣ်မီၣ်တီၣ်တုၥ်တဖၣ်, ပှၤဆါတၢ်လၢကျဲကပၤတဖၣ်ဒီး တၢ်ဆါတၢ်ပှ့ၤကျးတဖၣ်အပူၤ ပှၤလၢတသမံသမိးတၢ်ဖးစရီဒီး ပှၤမ့ၢ်တဟ့ၣ်တၢ်ဖးဘၣ်န့ၣ် သမံသမိး၀ဲလၢတၢ်ဂ့ၢ်တၢ်ကျိၤတဖၣ်၀ံၤ တၢ်ကဟံးန့ၢ်ဂ့ၢ်၀ီတုၤလီၤတီၤလီၤအဂီၢ် မၢဘိးဘၣ်ရၤလီၤတၢ်ကစီၣ်လၢ အ၀ဲန့ၢ်ပၢတၢ်ကစီၣ်တဖၣ်အပူၤန့ၣ်လီၤ.
ပှၤမၤတၢ်ဖိတဖၣ်တခီ စးထီၣ်လၢတၢ်ကျးလီၤတၢ်ဖးစရီအဆၢကတီၢ် ဖဲက၀ီၤဒ့ဒီးသ၀ီကရူၢ်တဖၣ်အပူၤ တၢ်ကသံသမိးတၢ်ဖးစရီဒီးတၢ်ဟ့ၣ်တၢ်ဖးဆိအဂီၢ် ဟ့ၣ်ဆီၣ်သနံးတဲပျံၤတဲဖူး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
