လါဒံၣ်စ့ဘၢၣ်(၁၅)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ခၣ်ဘီဒံယါဒီးကၠီၣ်တဲၣ်ကီၫ်ဆၢတၫ်ဒုးတဖၣ်ကဲထီၣ်ကဒီး၀ံၤ ဖဲမဟါနံၤမုၫ်ထူၣ်(၁၂)နၣ်ရံၣ်ဃၣ်ဃၣ်န့ၣ် ကမျၢၫ်အိၣ်အ လီၫ်တဖၣ် ခၣ်ဘီဒံယါခး၀ဲဒီး BM – 21မျိာ်တဖၣ်အဃိ ကၠီၣ်တဲၣ်ကမျၢၫ်(၁)ဂၤဘၣ်သံဒီးဟံၣ်ဃီတနီၤမ့ၣ်အူအီၣ်ဟး ဂီၤကွံာ်အဂ့ၫ် ကၠီၣ်တဲၣ်သုးတကပၤ ထုးထီၣ်ဘိးဘၣ်ရၤလီၤ၀ဲလီၤ.
ကီၫ်ဆၢကီၫ်ရ့ၣ်တခါလၢအမ့ၫ် ဆံၣ်ဆၣ်ကး,ကီၫ်ဆၣ်ကၣ်သၣ်ယၣ်လး,ဆီၣ်သိၣ်ခၠဲၣ်သ၀ီန့ၣ် ခၣ်ဘီဒံယါတကပၤ အမျိာ်သၣ်လီၤတဲာ်ဒီးမ့ၫ်၀ဲ BM – 21မျိာ်အဂ့ၫ် ကၠီၣ်တဲၣ်သုးတဲ၀ဲလီၤ.
လီၤတဲာ်လၢတကထြၢဟံၣ်အဖီခိၣ်အဃိ ပှၤလၢအိၣ်လၢဟံၣ်ပူၤ သးနံၣ် ၆၃နံၣ်အိၣ် ပိာ်ခွါတဂၤ ဘၣ်သံဒီး အကပိာ်ကပၤ ဟံၣ်တဖၣ်စ့ၫ်ကီး ဟးဂီၤ၀ဲအဂ့ၫ် တၫ်သ့ၣ်ညါဘၣ်လီၤ.
တၫ်အံၤ ကမျၢၫ်တၫ်လီၫ်လၢတဘၣ်ဃးဒီးသုးတကပၤအံၤ ခၣ်ဘီဒံယါပညိၣ်ဒုးဃီၤ၀ဲအဂ့ၫ် ကၠီၣ်တဲၣ်တကပၤ ကွၫ်၀ဲလၢထံဂုၤကီၫ်ဂၤတၫ်ဘျၢအဖီခိၣ် တဲ၀ဲန့ၣ်လီၤ.
တကတီၫ်ဃီ ခၣ်ဘီဒံယါဒီကလုာ်တၫ်ဒီသဒၢကိတိာ်၀ဲၤကျိၤတကပၤ လၢကီၫ်ဆၢအပူၤ ကၠီၣ်တဲၣ်အတၫ်ဒုးဃီၤတဖၣ် စးထီၣ်လၢမဟါနံၤ တုၤလၢဟါခီလီၤအကတီၫ် အိၣ်ဒံး၀ဲအဂ့ၫ် ထုးထီၣ်ဘိးဘၣ်ရၤလီၤတၫ်ကစီၣ်လီၤ.
ဖဲမဟါနံၤဂီၤအကတီၫ်န့ၣ် ကၠီၣ်တဲၣ်အကျိဖးဒိၣ်အချံ(၂)ဖျၢၣ် လဲၤလီၤတဲာ်၀ဲလၢ ကီၫ်ရ့ၣ်ဘၣ်နံၣ်ယ့ၣ်မံၣ်ယၣ်ခၠ့ၣ်, ပယ့ၣ်ခၠါသ၀ီအပူၤအဂ့ၫ် တဲ၀ဲလီၤ.
အလီၫ်ခံ ကၠီၣ်တဲၣ်သုးန့ၣ် ကီၫ်ရ့ၣ်၀ဲန့ၣ်အပူၤ သမၣ်ဆါသ၀ီစ့ၫ်ကီး တ့ၫ်လီၤမ့ၣ်ပိၫ်(၂)ဖျၢၣ်လၢကဘီယူၤဒုးသုးတဖၣ် အဂ့ၫ် ခၣ်ဘီဒံယါတကပၤ ထုးထီၣ်ဘိးဘၣ်ရၤလီၤတၫ်ကစီၣ်လီၤ.
လၢအခီၣ်ထံး ခၣ်ဘီဒံယါန့ၣ် ထံကီၫ်ခံဘ့ၣ်ကီၫ်ဆၢတဂၢၫ်တကျၢၤဘၣ်အဃိ တၫ်ဘံၣ်တၫ်ဘၢအဖီခိၣ် ခိကျဲကီၫ်ဆၢ တၫ်ခီထီၣ်ခီလီၤသုးကလၢၤတဖၣ် တၫ်မ့ၫ်တထုးထီၣ်ဘိးဘၣ်ရၤလီၤကဒီးတၫ်နီတမံၤဒံးဘၣ်တစု ကးတံာ်ဃာ်၀ဲအဂ့ၫ် ထုး ထီၣ်ဘိးဘၣ်ရၤလီၤဃာ်တၫ်ကစီၣ်န့ၣ်လီၤ.
