လါဒံၣ်စ့ဘၢၣ် ၁၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီဒီကလုၥ်စၢဖှိၣ်ကရၢ(KNU), သုးက့(၇), မဲၢ်သ၀ီဟီၣ်က၀ီၤအပူၤအိၣ် သုးကီၣ်မံးရှၢၣ်အသုး ၉၆၂, အးကၠီၣ်ကိဒီး ကၠဲၣ်ပၠ့ၣ်ကိသုးကလၢၤ(၃)ဖျၢၣ်လၢအိၣ်ဆီလီၤဃၥ်အသးအံၤအပူၤ မီၤစိရိၤသုးကီၣ်မံးရှၢၣ်အသုးဒီး ကညီသုးခိးကီၢ်ဆၢ(BGF)အပှၤသုးဖိတဖၣ် ဟဲအိၣ်ဆီလီၤဃၥ်အသးအဂ့ၢ် တၢ်ပၢၢ်ဆၢသုးပၥ်ဖှိၣ်တဖၣ် စံး၀ဲန့ၣ်လီၤ.
ဖဲသုးကလၢၤတဖၣ်အပူၤအိၣ် သုးကီၣ်မံးရှၢၣ်အပှၤသုးဖိ ဟးထီၣ်တၢ်ချၢဒီး လဲၤကျီ သ့ၣ်,၀ၣ်အဆၢကတီၢ် ယီၢ်ဘၣ်၀ဲ တၢ်ပၢၢ်ဆၢသုးပၥ်ဖှိၣ်ဒိးလီၤဃၥ် မ့ၣ်ပိၢ်လၥ်တဖၣ်၀ံၤ တၢ်ဘၣ်ဒိဘၣ်ထံးတၢ်သံတၢ်ပှၢ်တဖၣ်အိၣ်ထီၣ်၀ဲအဃိ စးထီၣ် ဖဲဒံၣ်စ့ဘၢၣ် ၁၁သီအနံၤန့ၣ် ခးလီၤနါစိၤကျိဖးဒိၣ်တဖၣ်ဆူ ကမျၢၢ်အိၣ်ဒူသ၀ီတဖၣ်အပူၤအိၣ်ထီၣ်၀ဲအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
မီၤစိရိၤသုးကီၣ်မံးရှၢၣ်အသုး မၤကလံၤကျါတၢ်ဒုးဒီးခးလီၤကျိဖးဒိၣ်တဖၣ်အဃိ ကီၢ်သူလ့ၤဟီၣ်က၀ီၤအပူၤ ပှၤစံၣ်သုးပှၤလီၢ်အိၣ်ကမှံဖိနီၣ်ဂံၢ်နီၣ်ဒွးဟဲအါထီၣ်၀ဲဒီး တၢ်မၤနီၣ်ထၢဖှိၣ်စရီတဖၣ်အဖီခိၣ် ၂၀၂၄နံၣ်, လါစဲးပထ့ဘၢၣ်၀ံၤအလီၢ်ခံန့ၣ် ပှၤလီၢ်အိၣ်ကမှံဖိဟဲအါထီၣ်၀ဲ ၁၄မျးကယၤ, ပှၤနီၣ်ဂံၢ်ဟဲအါထီၣ်၀ဲ ၁.၂ကကွဲၢ်အဂ့ၢ် ကညီတၢ်ဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ KPSNထုးထီၣ်ပၥ်ဖျါဃၥ်၀ဲန့ၣ်လီၤ.
