လါဒံၣ်စ့ဘၢၣ်(၅)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ပယီၤသုးဒီးKNUသုးတဖၣ်အဘၢၣ်စၢၤ တၫ်ဒုးကဲထီၣ်၀ံၤအလီၫ်ခံ ကီၫ်ကၠီၣ်တဲၣ်,တးကီၫ်ရ့ၣ်,မဲဆီးကီၫ်ဆၣ်အပူၤ ဟံၣ်(၉)ဖျၢၣ် ဘၣ်လၢကျိဖးဒိၣ်အချံအက့အခီဒီးဟးဂီၤ၀ဲန့ၣ်လီၤ.
တၫ်ဂ့ၫ်အံၤအဃိ မဲဆီးကီၫ်ဆၣ်ပူၤ ကၠီၣ်တဲၣ်-ပယီၤတၫ်သမံသမိးတြဲၤတဖၣ် တၫ်ကကးတံာ်ကွံာ်၀ဲ(၁)နွံအဂ့ၫ် တၫ်ဒီသဒၢကိတိာ် နးတၣ်ဖိၣ်နဲးဖၣ်နံး ဘိးဘၣ်ရၤလီၤ၀ဲလီၤ.
လၢရၤမတံကီၫ်ဆၣ်,မ့လဲးပၣ်သ၀ီကပၤ ပယီၤသုးနီၫ်ဂံၫ်(၂၂)သုးတြိၤဒီးKNUသုးက့နီၫ်ဂံၫ်(၆)အဘၢၣ်စၢၤ တၫ်ဒုးကဲထီၣ်ဒီးတုၤလၢတနံၤအံၤဒၣ်လဲၣ်ကျိဖးဒိၣ်အကလုၫ်တဖၣ် နၫ်ဟူဘၣ်ဒံးန့ၣ်လီၤ.
ပယီၤသုးဘၣ်ဒိအိၣ်၂၅ဂၤ ဃၣ်ဃၣ်အဃိ လၢရွှ့ၣ်ကိးကိာ် တၫ်သူၣ်ထီၣ်တဖျၢၣ်အပူၤ ပယီၤသုးသူ၀ဲဒ်ဟီၣ်ခိၣ်လိၤတၫ် ဆါဟံၣ်အသိးအဂ့ၫ် တၫ်သ့ၣ်ညါဘၣ်လီၤ.
မ့လဲးပၣ်သ၀ီကပၤ တၫ်ဒုးအပူၤ ကျိဖးဒိၣ်အချံအက့အခီဒီးကျိချံတဖၣ် လီၤတဲာ်ဆူကၠီၣ်တဲၣ်တကပၤအဃိ ဟံၣ်ဘၣ်ဒိဘၣ်ထံး၀ဲ(၉)ဖျၢၣ်န့ၣ်လီၤ.
ကၠီၣ်တဲသုးဒီးဒူသ၀ီပှၤဘၣ်မူဘၣ်ဒါတဖၣ် လဲၤသမံသမိးဒီးထံၣ်န့ၫ်၀ဲ ၅.၅၆မံၣ်လံၣ်မံၣ်တၣ်,၇.၆၂ မံၣ်လံၣ်မ့ၣ်တၣ် တကးဘၣ် ၆၀မမကျိဖးဒိၣ်အချံအက့အခီတဖၣ် လၢဟံၣ်ခိၣ်ဒုးဖီခိၣ်ဒီးကရၢၫ်တဖၣ်အပူၤန့ၣ်လီၤ.
လၢပယီၤ-ကၠီၣ်တဲၣ်ကီၫ်ဆၢ ကၠီၣ်တဲၣ်တကပၤထံကျိနံၤ ကၠီၣ်တဲၣ်သုးဖိတဖၣ်အိၣ်ခိးလီၤ တၫ်လၢတၫ်ဘံၣ်တၫ် ဘၢအဂီၫ်န့ၣ်လီၤ.
ကျိချံမ့ၫ်လီၤတဲာ်လၢကီၫ်ကၠီၣ်တဲၣ်အပူၤန့ၣ် ကၠီၣ်တဲၣ်သုးဖိတဖၣ် ခးဟ့ၣ်ပလီၫ်က့ၤ၀ဲအိၣ်ဒီးမ့ၫ်လိၣ်သပှၫ်ကတၢၫ်န့ၣ် ကမၤန့ၫ်၀ဲတၫ်သုးလီၫ်သုးကျဲတၫ်ရဲၣ်တၫ်ကျဲၤတဖၣ်အဂ့ၫ် နးတၣ်ဖိၣ်နဲးဖၣ်နံးတဲ၀ဲလီၤ.
ကၠီၣ်တဲၣ်သုးန့ၣ် လၢမဲၫ်ဟီၣ်စီၣ်ဒီးတးကီၫ်ရ့ၣ်တဖၣ်အပူၤ အိၣ်ကတီၤသးလၢလၢပှဲၤပှဲၤအဂ့ၫ် အ၀ဲတဲ၀ဲန့ၣ်လီၤ.
