လါဒံၣ်စ့ဘၢၣ် ၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
၀့ၢ်ဖၣ်ပူၣ်လၢ (KNLA)သုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲအံၤ သုးကီၣ်မံးရှၢၣ်တပၤ ဒ်သိးကဒိၣ်စိက့ၤအဂီၢ် ဟံးန့ၢ်ကလံၤကျါတၢ်မၤစၢၤဒီးဟဲထီၣ်တၢ်မဲၥ်ညါဘၣ်ဆၣ် ဟဲထီၣ်တန့ၢ်ဒံးဘၣ်အဂ့ၢ် သုးက့(၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ အခိၣ်လိၤပညိၣ်ဟဲထီၣ်ဖဲ ကမးမိၢ်၀့ၢ်တဆီ ဆူ ကမးမိၢ်-ဖၣ်ပူၣ်ကျဲမုၢ်အသိး၀ံၤ ကတီၢ်ခဲအံၤန့ၣ်ဆီလီၤဃၥ်အသုးဖဲ ၀ါဒူသ၀ီထးခီတပၤန့ၣ်လီၤ.
ဖဲအပူၤကွံၥ် လါဒံၣ်စ့ဘၢၣ် ၂သီအနံၤန့ၣ် သုးကီၣ်မံးရှၢၣ်အသုး ဟံးကလံၤကျါတၢ်မၤစၢၤ၀ံၤ ဟဲထီၣ်သုးကျိၤဘၣ်ဆၣ် ခီဖျိ KNLAသုးပၥ်ဖှိၣ်တဖၣ် ဒုးအီၤအဃိ တၢ်ဒုးကဲထီၣ်၀ဲဒီတနံၤဃၣ်ဃၣ်၀ံၤ ဂုၤက့ၤအခံဆူ အ၀ဲသ့ၣ်ဆီလီၤဃၥ်အလီၢ်လၢ၀ါဒူသ၀ီအဂ့ၢ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
“အ၀ဲသ့ၣ်မ့ၢ်ဟဲထီၣ်တၢ်ဖီခိၣ်တဆဲးဒီး တၢ်ဒုးကဲထီၣ်သး၀ံၤ ဂုၤက့ၤအခံ, မ့ၢ်အိၣ်၄သီ၅သီတဘျီ ဟဲထီၣ်ကဒီး၀ဲတဘျီဒီး ဂုၤက့ၤအခံဒီး ဟဲထီၣ်တၢ်မဲၥ်ညါတန့ၢ်ဒံးဘၣ်အဂ့ၢ်” သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲန့ၣ်လီၤ.
သုးကီၣ်မံးရှၢၣ်သုးကျိၤအပူၤ ကညီသုးခိးကီၢ်ဆၢ (BGF)ဒီး ဘိၣ်ဘံးတီခိၣ်ရိၣ်မဲ DKBAကရၢတဖၣ်ပၣ်ဃုၥ်၀ဲအဂ့ၢ် တၢ်မဲၥ်ညါဂံၢ်ခီၣ်ထံးတၢ်ကစီၣ်ဒီး ပှၤကတိၤတၢ်ပၢ အတၢ်တဲအဖီခိၣ်တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ်သုးကျိၤလၢ ဟဲထီၣ်ဆူဖၣ်ပူၣ်အံၤ အစးထီၣ်ဟဲထီၣ်၀ဲဖဲ ၂၀၂၅နံၣ်, လါစဲးပထ့ဘၢၣ်ဒီး ဟဲထီၣ်မၤ၀ဲဒုးယၤရဲၣ်ကျဲၤတဖၣ်န့ၣ်လီၤ.
KNLA သုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲ ဖၣ်ပူၣ်၀့ၢ်အချၢ, ဖၣ်ပူၣ်ကီၢ်ဆၣ်အပူၤအိၣ် မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်အစုတီၤဖီလၥ် ခလရ(၁၉), ခမရ(၄၃၄), စုက၀ဲၤပီးလီသုး(စစန-၆၄၂), ဖၣ်ပူၣ်-ကမးမိၢ်ကျဲမုၢ်အဖီခိၣ်အိၣ် တစှၤန့ၢ်သုးကလၢၤ(၅)ဖျၢၣ်န့ၣ်လီၤ.
ဒ်န့ၣ်အသိး ကတီၢ်ခဲအံၤ သုးကီၣ်မံးရှၢၣ်အသုး ပၢဆှၢဃၥ်သုးကလၢၤတၢ်လီၢ်တဖၣ်တခီမ့ၢ်၀ဲ ကမးမိၢ်, ဖၣ်ပူၣ်သုးတၢ်တိၥ်ကူၣ်ကျဲၤ စဗခ (၁), ခမရ(၃၄၀)ဒီး(၃၄၁), ကတၢးတံးသုးကလၢၤတဖၣ်န့ၣ်လီၤ.
ဖဲန့ၣ်အကျါ ခမရသုးရ့ၣ်တဖၣ်လၢအဘူးဒီး ဖၣ်ပူၣ်သုးတၢ်တိၥ်ကူၣ်ကျဲၤတဖၣ်ခီ KNLAသုးပၥ်ဖှိၣ်တဖၣ် က၀ီၤကးတံၥ်ဃၥ်၀ဲ ယံၥ်ထီၣ်တနံၣ်ဃၣ်ဃၣ်လံန့ၣ်လီၤ.
သုးကီၣ်မံးရှၢၣ်အသုးအံၤ ဖၣ်ပူၣ်ကီၢ်ဆၣ်အပူၤ ဘၣ်ပျၢ်ကွံၥ်၀ဲဟီၣ်က၀ီၤတဖၣ်ဘၣ်ဆၣ် ဖဲလၢအ၀ဲသ့ၣ်ကမၤ၀ဲ တၢ်ဃုထၢအကူၥ်(၂)အပူၤ ကီၢ်ဆၣ် (၁၀၀)ဃၣ်ဃၣ်အပူၤ ထၢနုၥ်လီၤ၀ဲ ဖၣ်ပူၣ်စ့ၢ်ကီးအဂ့ၢ် ပၥ်ဖျါဃၥ်၀ဲန့ၣ်လီၤ.
