လါဒံၣ်စ့ဘၢၣ် ၄သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီဒီကလုၥ်စၢဖှိၣ်ကရၢ (KNU), သုးက့(၂), ကီၢ်ရ့ၣ်တီအူဟီၣ်က၀ီၤအပူၤအိၣ် ၀့ၢ်ဒီၣ်ဖးခိၣ်အံၤ သုးကီၣ်မံးရှၢၣ်အသုး ခးအီၤလၢကျိဖးဒိၣ်အဃိ မိၢ်ဒၢတဂၤလၢသးနံၣ်အိၣ် (၂၁)နံၣ်တဂၤ ဘၣ်ဒိ၀ဲအဂ့ၢ် (KNU)ကီၢ်ရ့ၣ်တီအူ ထုးထီၣ်ပၥ်ဖျါဃၥ်၀ဲတၢ်ကစီၣ်န့ၣ်လီၤ.
ဒံၣ်စ့ဘၢၣ် ၁သီအနံၤ, ဟါ (၉း၃၀)ဃၣ်ဃၣ်အဆၢကတီၢ် သုးကီၣ်မံးရှၢၣ်အသုးလၢအိၣ်ဖဲ ဘယ့းနီၣ်သုး၀့ၢ်အံၤ ခးလီၤ၀ဲကျိဖးဒိၣ်အဃိ ကျိဖးဒိၣ်(၅)ဖျၢၣ် လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ဒီၣ်ဖးခိၣ်ကီၢ်ဆၣ်, နီၣ်ဂံၢ်(၃)က၀ီၤဒ့ပူၤအဂ့ၢ် စံး၀ဲန့ၣ်လီၤ.
ခီဖျိ ကျိဖးဒိၣ်လီၤတဲၥ်ပိၢ်ဖးထီၣ်၀ဲဒၣ်အဃိ ဘၣ်ဟးဂီၤကွံၥ်၀ဲ ဟံၣ်(၂)ဖျၢၣ်၀ံၤ မိၢ်ဒၢလၢအဒၢအိၣ်(၈)လါတဂၤ ဘၣ်ဒိ၀ဲ အကိးဘိအဂ့ၢ် စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ကးတံၥ်၀ဲ ဒီၣ်ဖးခိၣ်ကျဲမုၢ်အံၤခဲအံၤခဲအံၤအဃိ ကမျၢၢ်တၢ်လ့ၤထီၣ်လ့ၤလိၤအဂီၢ် ကီခဲ၀ဲ၀ံၤ ဘၣ်ပျံၤဘၣ်ဖူးဘၣ် ဘၣ်ယိၣ်ဘၣ်ဘှီဘၣ် စ့ၢ်ကီး ကျိဖးဒိၣ်တၢ်လီၤဘၣ်ယိၣ်အဂ့ၢ် KNU-ကီၢ်ရ့ၣ်တီအူ ထုးထီၣ်ပၥ်ဖျါဃၥ်၀ဲန့ၣ်လီၤ.
KNU, သုးက့(၂)ပၣ်ဃုၥ် ကီၢ်ရ့ၣ်, သုးက့တဘ့ၣ်စုၥ်စုၥ်အပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုး ပညိၣ်ဒုး၀ဲ ကမျၢၢ်အိၣ်ဆိးလီၢ်ကျဲ, တၢ်ဖံးအီၣ်မၤအီၣ်လီၢ်ကျဲ, တၢ်ဘူၣ်တၢ်ဘါတၢ်သူၣ်ထီၣ်တဖၣ်လၢကလံၤကျါဒီး ကျိဖးဒိၣ်တဖၣ် ခဲအံၤခဲအံၤအဃိ ဖိသၣ်တဖၣ်ပၣ်ဃုၥ် ကမျၢၢ်ထံဖိကီၢ်ဖိတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲ ကိးမုၢ်နံၤဃၣ်ဃၣ်န့ၣ်လီၤ.
