လါဒံၣ်စ့ဘၢၣ် ၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
မီၤစိရိၤ သုးကီၣ်မံးရှၢၣ်အသုး ကမၤ၀ဲတၢ်ဃုထၢအကူၥ် ၁ ကီၢ်ဆၣ်တဖၣ်အကျါ ကီၢ်ကရ့ၣ်နံၣ်၀့ၢ်ခိၣ် လွဲၢ်ကီၢ်ဒီး ဘီလခဲ၀့ၢ်တဖၣ် ပၣ်ဃုၥ်၀ဲအဃိ နီၤဖးလီၤ၀ဲ သုးကျိၤ ၂ကျိၤ၀ံၤ ဟဲထီၣ်မၤတၢ်ရှဲပျီဟီၣ်က၀ီၤအဂ့ၢ် လီၢ်က၀ီၤဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
“ဘီလခဲအပူၤ တၢ်ဃုထၢလၢကမၤ၀ဲ တၢ်ဘံၣ်တၢ်ဘၢအဂီၢ်လီၤ. လၢဖၣ်ဆီတပၤ တကျိၤဒီး ယွၣ်သ့းတပၤတကျိၤ တၢ်အံၤန့ၣ် အဲၣ်ဒိးဟံးဃၥ် ဘီလခဲ၀့ၢ်အဃၢၤ၀း၀းတၢ်ဘံၣ်တၢ်ဘၢလီၤ. ဖဲလၢအ၀ဲသ့ၣ်ဟဲတုၤအလီၢ် ဖၣ်ဆီတပၤမ့ၢ်ဂ့ၤ, ယွၣ်သ့းတပၤမ့ၢ်ဂ့ၤ အ၀ဲသ့ၣ်ဆီလီၤဃၥ်၀ဲ သုးကလၢၤလီၤ. ပ၀ဲတပၤတခီဒ်သိးအ၀ဲသ့ၣ် ဟဲထီၣ်သုတန့ၢ်အဂီၢ် ပဒီသဒၢဃၥ်လီၤ. တၢ်န့ၣ်အဃိ အ၀ဲသ့ၣ်ကအိၣ်ပတုၥ်ဖဲဟဲတုၤအလီၢ်ဧါ, ကဟဲထီၣ်ဧါ, အ၀ဲသ့ၣ်မ့ၢ်ဟဲထီၣ်န့ၣ် တၢ်ဒုးတခီကကဲထီၣ်လီၤ”
ဖရူၣ်ဆိၣ်-ဘီလခဲ-ဖၣ်ဆီအခိၣ်အဃၢၤကပၤ မဲးစလီ, ၀ၣ်မလၣ်, ယ့ၣ်ကၠီၣ်, ယ့ၣ်နံၣ်ပီး, ထူခၠီသုးကလၢၤတဖၣ်အံၤ ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် ပၢဆှၢဃၥ်၀ဲဘၣ်ဆၣ် သုးကျိၤလၢဟဲထီၣ်မၤတၢ်ရှဲပျီအံၤ ဒုးမၤန့ၢ်က့ၤ၀ဲ မဲးစလီသုးကလၢၤဖဲနိၣ်၀့ဘၢၣ် လီၢ်ခံကတၢၢ်တနွံအတီၢ်ပူၤ၀ံၤ သုးကျိၤလၢနုၥ်လီၤ ယွၣ်သ့းသ၀ီပူၤတခီ ကဒုးမၤန့ၢ်က့ၤ ၀ၣ်မလၣ်သုးကလၢၤအဂီၢ် ဂုၥ်ကျဲးစၢး၀ဲအဂ့ၢ် ဘီလခဲ သုးဂ့ၢ်၀ီဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ကတီၢ်ခဲအံၤန့ၣ် ၀့ၢ်ဘီလခဲအပူၤ သုးကီၣ်မံးရှၢၣ်သုးတဖၣ်လၢအမ့ၢ် ခမရ ၄၂၉, ခမရ ၄၃၀ဒီး ခလရ ၃၃၇တဖၣ်အိၣ်တ့ၢ်ဒံး၀ဲ၀ံၤ ဒီၣ်တဲၥ်ဃၥ်၀ဲ လီတဲစိဒီး အ့ၣ်ထၣ်နဲးအကျိၤတဖၣ်န့ၣ်လီၤ.
တၢ်ဃုထၢအကူၥ် ၁လၢကမၤ၀ဲဖဲ ၀့ၢ်ခိၣ်လွဲၢ်ကီၢ်တခီ ဖၠၣ်စိမိၤကၠိဖိမုၥ်/ခွါတဖၣ် ထၢနုၥ်ဆိတၢ်ဖးတဖၣ်, ပၣ်တံၣ်မၤတၢ်ကရၢကရိတဖၣ်ဒီး ပၢပြးခိၣ်တဖၣ် မၤတၢ်ကရၢကရိတဖၣ်ဘၣ်ဆၣ် ၀့ၢ်ဘီလခဲပူၤတခီ တုၤကတီၢ်အံၤဒၣ်လဲၥ် မၤတၢ်ကရၢကရိတၢ်ဖံးတၢ်မၤတဖၣ်တန့ၢ်ဒံးဘၣ်အဂ့ၢ် ပှၤဘီလခဲ၀့ၢ်ဖိ စံး၀ဲန့ၣ်လီၤ.
“ဘီလခဲမ့ၢ် တၢ်တိၥ်ကူၣ်ကျဲၤပၢဆှၢဃၥ်၀့ၢ်အဃိ ဒိၣ်စိဟီၣ်က၀ီၤတဖၣ် အ၀ဲသ့ၣ်ပၢၤဃၥ်၀ဲလီၤ. ကမျၢၢ်လၢကဟ့ၣ်တၢ်ဖးတဖၣ်န့ၣ် တအိၣ်လၢ၀့ၢ်ပူၤနီတဂၤဘၣ်. အိၣ်တ့ၢ်ဒၣ်လီ သုးကီၣ်မံးရှၢၣ်အစုဒူၣ်တီၤတဖၣ်ဒီးသုးအဟံၣ်ဖိဃီဖိတဖၣ်လီၤ. ပ၀ဲသ့ၣ်တဖၣ်စ့ၢ်ကီး ပပၥ်တ့ၢ်ဟံၣ်ဃီ ပဃ့ၢ်ပူၤဖျဲးလီၤ. မတၤကဟ့ၣ် အ၀ဲသ့ၣ်တၢ်ဖးလဲၣ်?
ကီၢ်ကရ့ၣ်နံၣ်အပူၤ ဟီၣ်က၀ီၤအါတက့ၢ်န့ၣ် တၢ်ပၢၢ်ဆၢသုးပၥ်ဖှိၣ်တဖၣ် ပၢဆှၢဃၥ်၀ဲ၀ံၤ အပူၤကွံၥ်လါလံၤလံၤန့ၣ် သုးကီၣ်မံးရှၢၣ်တပၤ စူးကါ၀ဲ ကလံၤကျါဒီးဟီၣ်ခိၣ်လိၤဂံၢ်ဘါတဖၣ်၀ံၤ ဟဲထီၣ်မၤဒုးယၤရဲၣ်ကျဲၤတဖၣ် ဖဲ ဒံၣ်မီစိၤ, ဖရူၣ်ဆိၣ်ဒီး ဘီလခဲလၢ ကမၤ၀ဲတၢ်ဃုထၢအလီၢ်တဖၣ်န့ၣ်လီၤ.
ကရ့ၣ်နံၣ်ဒီကလုၥ်တၢ်ဒီသဒၢသုး(KNDF)တခီ သုးကီၣ်မံးရှၢၣ်တပၤ ဟဲထီၣ်သုးကျိၤဆူ ကီၢ်ကရ့ၣ်နံၣ်အပူၤ စူးကါ၀ဲ သုးကျိၤ၅ကျိၤဒီးဟဲထီၣ်မၤဒုးယၤရဲၣ်ကျဲၤတဖၣ်အဃိ လီၢ်က၀ီၤကမျၢၢ်ဖိတဖၣ် တၢ်သုတလ့ၤလိၤဟးထီၣ်ဘၣ်လၢ တၢ်ဒုးကဲထီၣ်သးအလီၢ်တဖၣ်အဂီၢ်အဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
ကရ့ၣ်နံၣ်ကမျၢၢ်တၢ်လဲၤထီၣ်လဲၤထီဂံၢ်ဘါကရူၢ် အတၢ်ထုးထီၣ်ပၥ်ဖျါအဖီခိၣ် သုးကီၣ်မံးရှၢၣ်အသုး ခးလီၤကျိဖးဒိၣ်, တ့ၢ်လီၤမ့ၣ်ပိၢ်လၢဒြိဆူ ကမျၢၢ်ဖံးအီၣ်မၤအီၣ်လီၢ်ကျဲတဖၣ်ပူၤအဃိ ၂၀၂၅နံၣ် လါနိၣ်၀့ဘၢၣ် ၁လါအတီၢ်ပူၤဒၣ်လဲၥ် ကီၢ်ကရ့ၣ်နံၣ်ဒီး ကယါ(ကယန်း)ဟီၣ်က၀ီၤပူၤ လီၢ်က၀ီၤကမျၢၢ်ဘၣ်သံ၀ဲ ၁၂ဂၤအဂ့ၢ် ထုးထီၣ်ပၥ်ဖျါဃၥ်၀ဲန့ၣ်လီၤ.
