လါဒံၣ်စ့ဘၢၣ် ၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကျိးဖဒိၣ်လၢကီၢ်ပယီၤတပၤ ခး၀ဲတဖၣ် လဲၤလီၤတဲၥ်ဖဲ ကၠီၣ်တဲၣ်တပၤ၀ံၤအလီၢ်ခံ ကီၢ်ဆၢတြဲၤလၢခီသူမှဲကျိခဲလၢၥ် ကၠီၣ်တဲၣ်ပှၤဘၣ်မူဘၣ်ဒါတဖၣ် ကးတံၥ်ကွံၥ်၀ဲ၇သီအဂ့ၢ် ကၠီၣ်တဲၣ်သုးမုၢ်ဒိၣ် ဘိးဘၣ်ရၤလၤဃၥ်၀ဲလၢ အဖိသဲးစးန့ၣ်လီၤ.
နိၣ်၀့ဘၢၣ် ၃၀သီအနံၤ, ရၤမတံကီၢ်ဆၣ်, မ့လဲးပၣ်သ၀ီအပူၤအိၣ် ကၠါဖၠးတၢ်မၤလီၢ်လၢ KNUမၤတၢ်သမံသမိးအံၤ ဒ်သိး သုးကီၣ်မံးရှၢၣ်တပၤ ကဒုးန့ၢ်က့ၤအဂီၢ် ဟဲထီၣ်ဒုး၀ဲဆူၣ်ဆူၣ်ကိၤကိၤ၀ံၤ ခးလီၤကျိဖးဒိၣ်တဖၣ် တဘီယူၥ်ဃီအပူၤ ကျိဖးဒိၣ်တဖၣ် လဲၤလီၤတဲၥ်၀ဲဒၣ်ဖဲ ကၠီၣ်တဲၣ်တပၤ၀ံၤ ဟံၣ်ဃီတၢ်ဟးဂုၥ်ဟးဂီၤဒီး ပှၤ(၂)ဂၤဘၣ်ဒိ၀ဲအဂ့ၢ်န့ၣ်လီၤ.
ကျိဖးဒိၣ်ဟဲလီၤတဲၥ်၀ဲဒၣ်ဖဲ ကၠီၣ်တဲၣ်တပၤ၀ံၤအဃိ ကၠီၣ်တဲၣ်တပၤစ့ၢ်ကီး က့ၤခးဟ့ၣ်ပလီၢ်၀ံၤအလီၢ်ခံ ကးတံၥ်ကွံၥ်၀ဲ ကီၢ်ဆၢတြဲၤလၢခီသူမှဲကျိခဲလၢၥ် စးထီၣ်ဖဲ နိၣ်၀့ဘၢၣ် ၃၀သီအနံၤတုၤ ဒံၣ်စ့ဘၢၣ် ၆သီအနံၤအဂ့ၢ် တၢ်သ့ၣ်ညါဘၣ်န့ၣ်လီၤ.
“နီၣ်ဂံၢ် ၁တၢ်ရ့လိၥ်မုၥ်လိၥ်တိၤတခီ အိးထီၣ်ဃၥ်၀ဲလီၤ. ကးတံၥ်၀ဲန့ၣ် တြဲၤလၢခီသူမှဲကၢၢ်နံၤလၢ တဖိးသဲစးတဖၣ်လီၤ. မဲၢ်ရမး, မဲးဆီး, ဖိးဖရး, အိဖၣ်, ထးစီၣ်ယါတြဲၤတဖၣ်လၢ အခီတၢ်ဖိတၢ်လံၤဒီး ပှၤကညီခဲလၢၥ် တၢ်ကးတံၥ်၀ဲလီၤ.တၢ်ဖိတၢ်လံၤဂ့ၤ, ပှၤကညီဂ့ၤ တၢ်ကးတံၥ်ကွံၥ်၀ဲခဲလၢၥ်လီၤ. တုၤလၢတၢ်အိၣ်သးတဂၢၢ်တကျၢၢ်တစု ကကးတံၥ်ကွံၥ်၀ဲအဂ့ၢ် လံၥ်တၢ်ကလုၢ်အပူၤ ကွဲးဖျါဃၥ်၀ဲ”န့ၣ်လီၤ.
ကတီၢ်ခဲအံၤ တၢ်ဒုးဆူၣ်၀ဲဖဲ ကၠီၣ်တဲၣ်, တးကီၢ်ရ့ၣ်, မဲဆီးကီၢ်ဆၣ်, မဟၣ်၀ၣ်သ၀ီကရူၢ်, နီၣ်ဂံၢ်၄ မဲၢ်ကဲၣ်က့ၣ်သ၀ီ အကွၢ်ဃီၤ မ့လဲးပၣ်သ၀ီပူၤအဃိ ကၠီၣ်တဲၣ်သုးမုၢ်ဒိၣ် ဆီလီၤအါထီၣ်ဃၥ်၀ဲ သုးဘံၣ်ဘၢတဖၣ်ဖဲ ကၠီၣ်တဲၣ်-ပယီၤကီၢ်ဆၢဒီတကျိၤ ဖဲကၠီၣ်တဲၣ်တပၤအဂ့ၢ် တၢ်သ့ၣ်ညါဘၣ်န့ၣ်လီၤ.
ရၤမတံကီၢ်ဆၣ်, မ့လဲးပၣ်သ၀ီအပူၤအိၣ် ကၠါဖၠးတၢ်မၤလီၢ်အံၤ KNU ဒုးမၤန့ၢ်၀ဲဖဲ နိၣ်၀့ဘၢၣ် ၂၁သီအနံၤ၀ံၤ သမံသမိးဃုထံၣ်သ့ၣ်ညၣ်တၢ် ဖဲတၢ်လီၢ်အံၤအပူၤအိၣ် ကၠါဖၠးတၢ်မၤလီၢ်ဒီးကရၢၢ်အပူၤအဆၢကတီၢ် သုးကီၣ်မံးရှၢၣ်တပၤ ဟဲထီၣ်မၤဆူၣ်ထီၣ်၀ဲဒုးယၤရဲၣ်ကျဲၤတဖၣ်လီၤ.
