ရၤမတံကီၫ်ဆၣ်,မ့လဲးပၣ်သ၀ီ ကၠါဖျးပှၤမၤတၫ်ဖိ ၁,၀၀၀ဂၤဘျဲၣ် တၫ်တပျဲနုာ်၀ဲလၢကၠီၣ်တဲၣ်ပူၤဘၣ်ဒီး အိၣ်ကးတံာ်အသးလၢကီၫ်ပယီၤတကပၤ ထံကျိကၢၫ်နံၤ

လါနိၣ်၀့ဘၢၣ်(၂၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်

ကညီကီၫ်စဲၣ်,ရၤမတံကီၫ်ဆၣ်အပူၤ မ့လဲးပၣ်သ၀ီလၢDKBAပၢဆှၢဃာ်အံၤအပူၤ ကၠါဖျးပှၤမၤတၫ်ဖိ ၁,၀၀၀ဂၤဘျဲၣ် န့ၣ် ခီဂာ်သူမွဲကျိဒီးကနုာ်လီၤဆူကၠီၣ်တဲၣ်အပူၤဘၣ်ဆၣ် ကၠီၣ်တဲၣ်သုးတကပၤ တပျဲနုာ်၀ဲဘၣ်အဃိ အိၣ်ကးတံာ်အ သးလၢကီၫ်ပယီၤတကပၤ ထံကျိကၢၫ်နံၤန့ၣ်လီၤ.

လါနိၣ်၀့ဘၢၣ်(၂၅)သီနံၤ,ဟါခီအကတီၫ် ပှၤထံဂုၤကီၫ်ဂၤဖိ ၁,၀၀၀ဂၤဘျဲၣ် လၢဃ့ၫ်ဟးထီၣ် ဖဲမ့လဲးပၣ်သ၀ီကၠါဖျး တၫ်မၤလီၫ်ပူၤတဖၣ် ခီဂာ်သူမွဲကျိဒီးကျဲးစၢးနုာ်လီၤဆူကၠီၣ်တဲၣ်အဂ့ၫ်,ကၠီၣ်တဲၣ်သုးတခီ တပျဲနုာ်၀ဲဘၣ်ဒီးအိၣ်ခိးကွၫ် ၀ဲဒီတနၤအဂ့ၫ် တၫ်သ့ၣ်ညါဘၣ်လီၤ.

“ဖဲမဟါတဟါနံၤ လၢသူမွဲကျိကၢၫ်နံၤ ပှၤထံဂုၤကီၫ်ဂၤဖိ အိၣ်၀ဲ ၁,၀၀၀ဂၤဘျဲၣ်လီၤ.အဲၣ်ဒိးနုာ်လီၤဆူကၠီၣ်တဲၣ်ပူၤ လီၤ.အိၣ်ဟဲလၢမ့လဲးပၣ်လီၤ.ကၠီၣ်တဲၣ်တပျဲနုာ်၀ဲဘၣ်.မ့မ့ၫ်ပှၤကီၫ်ကၠီၣ်တဲၣ်ဖိတဖၣ်တခီ တူၫ်လိာ်က့ၤ၀ဲအဂ့ၫ် ပယီၤကီၫ်ဆၢဂ့ၫ်ခီၣ်ထံးတၫ်ကစီၣ်တဲ၀ဲလီၤ.

ဖဲနိၣ်၀့ဘၢၣ်(၂၁)သီအနံၤန့ၣ် ရၤမတံကီၫ်ဆၣ်,မ့လဲးပၣ်သ၀ီအပူၤ KNUဒီးသုးပဒိၣ်အဘၢၣ်စၢၤ တၫ်ဒုးကဲထီၣ်အဂ့ၫ်, ပယီၤသုးတကပၤ ဒုးယၤခိၣ် နဲၣ်လွ့ၣ် တီခိၣ်ရိၣ်မဲသုးတဖၣ်ဒီးDKBAစဲကၠီၣ်လးတီခိၣ်ရိၣ်မဲသုးပာ်ဖှိၣ်တဖၣ် ဟဲထီၣ် ဒုး၀ဲမ့လဲးပၣ်သ၀ီ KNUသုးကလၢၤတဖၣ်အဂ့ၫ်,တၫ်ဒုး၀ံၤအလီၫ်ခံ တၫ်နုာ်လီၤဖီၣ်ကၠါဖျးတၫ်မၤလီၫ်တခါဒီးဖီၣ်န့ၫ်ဃုာ် DKBAသုးဖိ ၂၃၀ဂၤဘျဲၣ်အဂ့ၫ် KNUအတၫ်ဘိးဘၣ်ရၤလီၤအဖီခိၣ် တၫ်သ့ၣ်ညါဘၣ်လီၤ.

တၫ်နုာ်လီၤဖီၣ်၀ဲ မ့လဲးပၣ်ကၠါဖျးတၫ်မၤလီၫ်အပူၤ တၫ်ထံၣ်န့ၫ်၀ဲ တၫ်ဖီၣ်မၤဆူးမၤဆါပှၤကညီ တၫ်လီၫ်တဖၣ်အဂ့ၫ်, တၫ်မၤလီၫ်အပူၤ တၫ်အိၣ်သးတဖၣ် တၫ်ကသမံသမိးဃုထံၣ်န့ၫ်တၫ်ဂ့ၫ်တဖၣ်အဂီၫ် KNUဃ့ထီၣ်ဃာ်၀ဲ ထံဂုၤကီၫ်ဂၤ တဖၣ်န့ၣ်လီၤ.