လါနိၣ်၀့ဘၢၣ် ၂၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးမီၤစိရိၤ သုးကီၣ်မံးရှၢၣ်အသုး ဟဲထီၣ်သုးကျိၤဆူ ကီးတရံးကလံၤစိး ဒူသ၀ီတဖၣ်အဃိ တၢ်ဒုးကဲထီၣ်၀ံၤ ပှၤလီၢ်အိၣ်ကမှံဖိ ၂၇ဂၤ သုးကီၣ်မံးရှၢၣ်သုးဖီၣ်န့ၢ်ဆူၣ်က့ၤကိး၀ဲအဂ့ၢ် လီၢ်က၀ီၤဖိတဖၣ်ဒီး ပှၤလၢမၤစၢၤ၀ဲတဖၣ် စံး၀ဲန့ၣ်လီၤ.
စးထီၣ်လၢနိၣ်၀့ဘၢၣ်၂၃သီအနံၤခီဖျိသုးကီၣ်မံးရှၢၣ်အသုးဟဲထီၣ်သုးကျိၤဆူကီးတရံးကလံၤစိးတပၤအဃိတၢ်ဒုးတဖၣ်ကဲထီၣ်၀ဲ၀ံၤအလီၢ်ခံ လီၢ်က၀ီၤဖိလၢ လဲၤဃ့ၢ်အိၣ်ကဒုဖဲ ပံၢ်တခးသ၀ီ ရီဘၢၣ်ကျီးပူၤ ၂၇ဂၤအံၤ သုးကီၣ်မံးရှၢၣ်အသုး က့ၤဖီၣ်၀ဲအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
“ဘၣ်မနုအဃိလဲၣ်န့ၣ် အ၀ဲသ့ၣ်မၤကီမၤခဲတၢ်လီမီၤ. ၀ံၤ ခီဖျိဆဲးကျိးဒီး PDF၀ံၤ မၤစၢၤ၀ဲအဃိအဂ့ၢ် စံး၀ဲလီၤ. ကထံၣ်၀ဲဒ်န့ၣ်အဃိန့ၣ်လီၤ. အ၀ဲသ့ၣ်က့ၤကိး၀ဲအဃိ အဲၣ်ဒိးစံး၀ဲလၢ အဟ့ၣ်ဂံၢ်ဟ့ၣ်ဘါ၀ဲ တၢ်ပၢၢ်ဆၢတပၤအအိၣ်လီၤ.”
သုးကီၣ်မံးရှၢၣ်အသုးအံၤ ဒ်သိးကဒိၣ်စိက့ၤ ကီးတရံး၀့ၢ်အကပၤ သ၀ီတဖၣ်ဒီး ကဒိၣ်စိက့ၤဟီၣ်က၀ီၤတဖၣ်အဂီၢ် မၤပှၤသုးဂံၢ်ဘါတဖၣ်လၢ သုးသီတဖၣ်၀ံၤ ဟံးန့ၢ်တၢ်မၤစၢၤလၢ(DKBA) ဘိၣ်ဘံးကရၢ, သုးခိးကီၢ်ဆၢ(BGF)အအိၣ်၀ံၤ ဟဲထီၣ်သုးကျိၤန့ၣ်လီၤ.
တကးဘၣ် ဖီၣ်န့ၢ်ဆူၣ်လီၢ်က၀ီၤကမျၢၢ်ဖိတဖၣ်ဒ် ပှၤကညီတၢ်ဒီသဒၢတဖၣ်အအသိး၀ံၤ မၢနဲၣ်ကျဲတဖၣ်အိၣ်၀ဲအဂ့ၢ် ပှၤလၢမၤစၢၤ၀ဲပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
“တၢ်ဒုးစ့ၢ်ကီး ကဲထီၣ်လီၤ. ဟဲထီၣ်စ့ၢ်ကီး သုးကျိၤလီၤ. ဖီၣ်က့ၤကိး၀ဲဒ်အံၤန့ၣ် ဖီၣ်၀ဲဒ်ပှၤကညီတၢ်ဒီသဒၢအသိး၀ံၤ က့ၤကိး၀ဲဆူ၀့ၢ်ပူၤလီၤ. အ၀ဲသ့ၣ် ကျဲလီၤမၢ်. တၢ်ဒုးစ့ၢ်ကီး ကကဲထီၣ်၀ဲ. အ၀ဲသ့ၣ်န့ၣ် အါလၢ ကမျၢၢ်တၢ်ဘၣ်ကဲသုး သုးသီတဖၣ်လီၤ. တနၢၤကျဲဘၣ်. တၢ်လဲၤခီဖျိစ့ၢ်ကီးတအိၣ်ဘၣ်အဃိ က့ၤဖီၣ်၀ဲကမျၢၢ်ဒ် ပှၤကညီတၢ်ဒီသဒၢအသိးဒီး ကမၢနဲၣ်ကျဲအဂီၢ် က့ၤကိးဆူ ကီးတရံးတပၤအဂ့ၢ်” ပှၤလၢမၤစၢၤပှၤလီၢ်အိၣ်ကမှံဖိတဂၤ စံး၀ဲန့ၣ်လီၤ.
ကတီၢ်ခဲအံၤစ့ၢ်ကီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ဒီးသုးပၥ်ဖှိၣ်တဖၣ် က၀ီၤကးတံၥ်ဒုးအီၤ သုးကီၣ်မံးရှၢၣ်သုးကျိၤတဖၣ် ဖဲကီမူး, စီၤဟဲ, လဲစ့, မိၢ်ဖၣ်လဲ, နီၢ်ကဲသ၀ီတဖၣ်ပူၤအဃိ တၢ်ဒုးတဖၣ်ကဲထီၣ်အသးန့ၣ်လီၤ.
တကးဘၣ် ဖဲနိၣ်၀့ဘၢၣ် ၂၅သီအနံ, ဟါ(၄း၃၀)မံးနံးအဆၢကတီၢ်ဃၣ်ဃၣ်စ့ၢ်ကီး သုးကီၣ်မံးရှၢၣ်အသုး ကဘီယူၤ Y 21ဟဲတ့ၢ်လီၤမ့ၣ်ပိၢ် ၁၀ဖျၢၣ် ဆူ ကီးတရံးကီၢ်ဆၣ်, သယဲးတီသ၀ီပူၤအမဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
“မဟါန့ၣ် Y 21ဟးဆှၣ်ကွၢ်တၢ်လၢ သယဲးတီတၢ်မၤလိကၠိတဖၣ်၀ံၤ တ့ၢ်လီၤ၀ဲဖဲ ဒိးန့ၢ်တၢ်ကစီၣ်တၢ်လီၢ်တဖၣ်လီၤ. တ၀ီန့ၣ် ၅ဖျၢၣ်, ၂၀ီအဃိ တ့ၢ်လီၤ၀ဲ အဖျၢၣ် ၁၀န့ၣ်လီၤ. ဟံၣ်ဟးဂီၤကွံၥ် ၁ဖျၢၣ်လီၤ. ဘၣ်ဆၣ်ဒီးတၢ်သံတၢ်ပှၢ်တခီ တအိၣ်ဘၣ်. ကၠိစ့ၢ်ကီး တစံၣ်လီဒံးဘၣ်အဃိ ကၠိဖိတဖၣ် ဃ့ၢ်ပူၤဖျဲးသးတဖၣ်အိၣ်လီၤ. ကၠိဖိတဖၣ်ဒီး ဒူသ၀ီဖိခဲလၢၥ် က့ၤနုၥ်လီၤလၢ တၢ်ပူၤအပူၤအဂ့ၢ်” စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ မၤပိၢ်ဖးထီၣ်ဒီးမၤဟးဂီၤကွံၥ်၀ဲ တိၤ၄ဘ့ၣ်လၢ ဘျးစဲဃၥ် ကွံမီၣ်တဲၣ်, ထံဖိစၣ်, နီၢ်ကဲသ၀ီသ၀ီတဖၣ်တကးဘၣ် ဟံးန့ၢ် ဒြိဒီးကျိဖးဒိၣ်တၢ်ခးလီၤစၢၤတၢ်တဖၣ်လၢ ကြုၢ်တု၀့ၢ် ခမရ ၅၄၅, ၅၄၆တဖၣ်၀ံၤ ဟဲထီၣ်သုးကျိၤ မၤပှဲၤပှၤကညီဂံၢ်ဘါ, စုက၀ဲၤဂံၢ်ဘါဒီး တၢ်အီၣ်တၢ်အီတဖၣ် ကိးမုၢ်နံၤဒဲးန့ၣ်လီၤ.
