လါနိၣ်၀့ဘၢၣ် ၂၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဒီကလုၥ်ဃူဖိးပဒိၣ် (NUG)ဘိးဘၣ်ရၤလီၤ၀ဲ သုးကရူၢ်အံၤ အဒီကလုၥ်တၢ်ဒီသဒၢဒီး တၢ်ဘံၣ်တၢ်ဘၢကီၣ်ကးကရၢဖိတဖၣ်လၢ ပှၤမၤပျီၢ်မၤဂီၢ်တဖၣ်အသိး၀ံၤအလီၢ်ခံ တၢ်ပျဲပူၤဖျဲးတၢ်စံၣ်ညီၣ်ဒီး ၅၀၅-က တၢ်မူးတၢ်ရၢ်တဖၣ်လၢ တၢ်သမံသမိးဒိကနၣ်၀ဲအဖၢမုၢ်တဖၣ် ကထုးသံကွံၥ်၀ဲအဂ့ၢ် သုးကီၣ်မံးရှၢၣ် တၢ်ကစီၣ်မူဒါခိၣ် သုးခိၣ်ကျၢၢ်ဂီၢ်ဂ့ၢ် စီၣ်မ့ထိစံး၀ဲန့ၣ်လီၤ.
တကးဘၣ် ပှၤလၢဘၣ်တၢ်စံၣ်ညီၣ်ဃၥ်အီၤလၢတၢ်ဘျၢအဆၢဒိၣ် ၅၀၅-ကစ့ၢ်ကီး တၢ်ကပျၢ်လီၤကွံၥ်အီၤ လၢထံကီၢ်ဂံၢ်ခီၣ်ထံးတၢ်ဘျၢသဲစးအခိၣ်သ့ၣ် တၢ်ဘျၢအဆၢဒိၣ် ၄၂၇အဂ့ၢ် သုးကီၣ်မံးရှၢၣ် တၢ်ကစီၣ်တၢ်ဘိးဘၣ်ရၤလီၤမူဒါခိၣ် ဘိးဘၣ်ရၤလီၤဃၥ်၀ဲ ဖဲအ၀ဲသ့ၣ်န့ၢ်ပၢ တၢ်ကစီၣ်တဖၣ် ဖဲနိၣ်၀့ဘၢၣ် ၂၆သီအနံၤ ဟါလီၤခီန့ၣ်လီၤ.
“တၢ်ဃုလၢတၢ်ကမၤအီၤဖဲ တယံၥ်တမီၢ်အံၤအပူၤ ဒ်သိးကဟ့ၣ်၀ဲတၢ်ဖးကန့ၢ်အဂီၢ် ပှၤလၢဘၣ်တၢ်စံၣ်ညီၣ်ဃၥ်အီၤ လၢ၅၀၅-ကဒီး ပှၤလၢဃ့ၢ်ပူၤဖျဲးသးတဖၣ် တၢ်ကပျဲပူၤဖျဲးအီၤတၢ်မူးတၢ်ရၢ်အဂ့ၢ် ထုးထီၣ်ဃၥ်၀ဲတၢ်ကလုၢ်န့ၣ်လီၤ. ပှၤလၢဘၣ်တၢ်စံၣ်ညီၣ်ဃၥ်အီၤလၢ တၢ်ဘျၢအဆၢဒိၣ် ၅၀၅-ကတဖၣ်စ့ၢ်ကီး တၢ်ကပျဲပူၤဖျဲးအီၤလၢ တၢ်အုၣ်ကီၤ” အဂ့ၢ် သုးခိၣ်ကျၢၢ်ဂီၢ်ဂ့ၢ် စီၣ်မ့ထိ စံး၀ဲန့ၣ်လီၤ.
ပှၤလၢဘၣ်တၢ်စံၣ်ညီၣ်ဃၥ်အီၤလၢ ၅၀၅-ကဒီး ပှၤလၢဘၣ်တၢ်စံၣ်ညီၣ်ဃၥ်၀ဲတဖၣ်အစရီန့ၣ် ဒီကလုၥ်တၢ်ဒီသဒၢဒီး တၢ်ဘံၣ်တၢ်ဘၢကီၣ်ကး ဘိးဘၣ်ရၤလီၤဃၥ်၀ဲဖဲ နိၣ်၀့ဘၢၣ် ၂၆သီ, ၈နံၣ်ရံၣ်တၢ်ဘိးဘၣ်ရၤလီၤတၢ်ကစီၣ်၀ံၤအလီၢ်ခံအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ် တၢ်ဃုထၢအယီၤအဘျၣ် အကူၥ်(၁)န့ၣ် တၢ်ကရဲၣ်ကျဲၤမၤအီၤ ဖဲခါလၢကဟဲ လါဒံၣ်စ့ဘၢၣ် ၂၈သီအနံၤအဂီၢ် လိၣ်ဒၣ်ထဲ ၃၂သီဧိၤန့ၣ်လီၤ.
