လါနိၣ်၀့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
DKBA အတၢ်ပၢဆှၢရဲၣ်ကျဲၤအဖီလၥ် ဖလူ(မ့လဲးပၣ်)ဟီၣ်က၀ီၤအပူၤအိၣ် ထံဂုၤကီၢ်ဂၤကွီၢ်မ့ၣ်ဒီးအိၣ်လဲတၢ်လံၣ်တၢ်လီတၢ်ဖံးတၢ်မၤတဖၣ် တၢ်ကဒုးလီၤပှီၢ်ကွံၥ်အီၤလၢတုၤလီၤတီၤလီၤအဂီၢ် ဟီၣ်ခိၣ်ဘီမုၢ်ထံကီၢ်တဖၣ် ကဟဲပၥ်ဖှိၣ်မၤသကိးတၢ်လၢအဆိအချ့အဂီၢ် ကညီဒီကလုၥ်စၢဖှိၣ်ကရၢ-KNU ဃ့ၣ်ထီၣ်ဃၥ်၀ဲဖဲ တနံၤအံၤန့ၣ်လီၤ.
၂၀၂၅နံၣ်, နိၣ်၀့ဘၢၣ် ၂၁သီအနံၤန့ၣ် KNUအစုတီၤဖီလၥ် KNLAသုးပၥ်ဖှိၣ်တဖၣ် နုၥ်လီၤဒုး၀ဲဖဲ DKBA ပၢဆှၢဟီၣ်က၀ီၤ ဖလူ(မ့လဲးပၣ်)ကၠါဖၠးတၢ်မၤလီၢ်အပူၤ DKBAအပှၤသုးဖိ ၂၃၀ဂၤပၥ်လီၤစုက၀ဲၤဒီး မၤန့ၢ်၀ဲ အ၀ဲသ့ၣ်ဆီလီၤဃၥ်သုးကလၢၤတဖၣ်န့ၣ်လီၤ.
ဖဲကၠါဖၠးတၢ်မၤလီၢ်တဖၣ်အပူၤ ထံကီၢ်အါဘ့ၣ်အပူၤအိၣ် ပှၤကီၢ်ချၢဖိအိၣ်၀ဲအါအါဂီၢ်ဂီၢ်အဂ့ၢ် တၢ်ထံၣ်ဘၣ်၀ဲန့ၣ်လီၤ.
ဖဲန့ၣ်၀ံၤအလီၢ်ခံ KNUခိၣ်နၢ်တဖၣ် ဒုးသ့ၣ်ညါ၀ဲ ကၠီၣ်တဲၣ်, ဟီၣ်ခိၣ်ဘီမုၢ်ထံကီၢ်ပှၤဘၣ်မူဘၣ်ဒါတဖၣ်ဒီး အ့ၣ်ကၠ့ၣ်စံၣ်တဖၣ်အအိၣ်တဘျီဃီ၀ံၤ တၢ်ကဟံးစုနဲၣ်ကျဲဘၣ်ကျိၤဘၣ်ကျဲအဂီၢ် တၢၣ်ပီၣ်တဲသကိး၀ဲန့ၣ်လီၤ.
တကးဘၣ် ပှၤလၢအိၣ်ကးတံၥ်သးတဖၣ် တၢ်ကဒီသဒၢန့ၢ်အီၤအဂီၢ်, တၢ်ကဆှၢက့ၤဆူအလီၢ်အကျဲဒီး တၢ်ကထၢဖှိၣ် တၢ်မၤနီၣ်မၤဃါတဖၣ်အဂီၢ် ဃ့ထီၣ်၀ဲ တၢ်ဟ့ၣ်ကူၣ်ဟ့ၣ်ဖးတဖၣ်ဒီး တၢ်ဒုးအိၣ်ထီၣ်၀ဲကရၢတဖုလၢ KNU ကရၢခိၣ်-၂ဒီး ပတီၢ်ထီခိၣ်နၢ်တဖၣ်ပၣ်ဃုၥ် ကရၢတဖုန့ၣ်လီၤ.
လၢန့ၣ်အမဲၥ်ညါ တၢ်အိၣ်သးတဖၣ်ဆီတလဲအသးချံသဒံးအဃိ KNUဟီၣ်ခိၣ်မဲၥ်ဖံးခိၣ်ကရၢဒီး ပှၤကီၢ်ချၢဖိလၢအိၣ်ကးတံၥ်သးတဖၣ် သးသမူတၢ်လီၤဘၣ်ယိၣ်တဖၣ် ဒိၣ်ထီၣ်၀ဲကွ့ၢ်ကွ့ၢ်အဂ့ၢ် ပၥ်ဖျါဃၥ်၀ဲန့ၣ်လီၤ.
လၢတၢ်န့ၣ်အဃိ တၢ်ကဒုးလီၤပှီၢ်အိၣ်လဲတၢ်လံၣ်တၢ်လီတၢ်ဖံးတၢ်မၤတဖၣ်တုၤလီၤတီၤလီၤအဂီၢ် ဟီၣ်ခိၣ်ဘီမုၢ်ထံကီၢ်တဖၣ် ကဟဲပၥ်ဖှိၣ်မၤသကိးတၢ်လၢအဆိအချ့အဂီၢ် KNUဃ့ထီၣ်တၢ်မၤစၢၤလၢ တၢ်သကွံၥ်ကညးအပူၤန့ၣ်လီၤ.
