လါနိၣ်၀့ဘၢၣ် ၂၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ရၢၢ်ခၢၣ်သုးမုၢ်ဒိၣ် AA အကသံၣ်မူၤဘှီး ၄၀၀၀ကံၣ်လိၣ်ကရၣ်, တၢ်တယၢ်အလုၢ်အပှ့ၤ စ့ပယီၤ ၁၂၀ဘံၣ်လံၣ်ယၣ်ဃုၥ်ဒီး AA အပှၤသုးဖျိ ၂၄ဂၤဘၣ်တၢ်ဖီၣ်န့ၢ်အီၤ ဖဲအ့ၣ်ယၣ်၀တံၣ်ကီၢ်ခီ, ပသံၣ်ကီၢ်ဆၣ်အပူၤအဂ့ၢ် သုးကီၣ်မံးရှၢၣ်ဘိးဘၣ်ရၤလီၤဃၥ်၀ဲဖဲ လါနိၣ်၀့ဘၢၣ် ၁၈သီအနံၤန့ၣ်လီၤ.
ကသံၣ်မူၤဘှီးတဖၣ်န့ၣ် ရၢၢ်ခၢၣ်သုးမုၢ်ဒိၣ် AA ကဆှၢ၀ဲဆူ ရၢၢ်ခၢၣ်ကီၢ်စဲၣ်ဒီး ကီၢ်မလ့ရှါအအိၣ်အဂ့ၢ် သုးကီၣ်မံးရှၢၣ်ဘိးဘၣ်ရၤလီၤဃၥ်၀ဲန့ၣ်လီၤ.
ဘၣ်ဆၣ်ဒီး တၢ်ဘိးဘၣ်ရၤလီၤတဖၣ်န့ၣ် မ့ၢ်ဒၣ်သုးကီၣ်မံးရှၢၣ်အသုး စူးကါ၀ဲကသံၣ်မူၤဘှီလၢအန့ၢ်ပၢတဖၣ်၀ံၤ ပဲၥ်အၢပဲၥ်သီ၀ဲအဂ့ၢ် လ့ၤတက့ၤတဘၣ်ထွဲဘၣ်ဃးလိၥ်အသးဒီး AAဘၣ်အဂ့ၢ် AA ပှၤကတိၤတၢ်ပၢ အူခဲၣ်သူးခး စံး၀ဲန့ၣ်လီၤ.
“ဖဲလၢအ၀ဲသ့ၣ် ဘၣ်ကွၢ်ဆၢၣ်မဲၥ်ဘၣ်ဒီး သုးဂ့ၢ်၀ီ, ထံရူၢ်ကီၢ်သဲးတၢ်ဃံးတၢ်စ့ၤအဆၢကတီၢ်န့ၣ် စူးကါ၀ဲ ကသံၣ်မူၤဘှီးတဖၣ်၀ံၤ ပဲၥ်အၢပဲၥ်သီ၀ဲလီၤ. တၢ်အံၤန့ၣ် စူးကါ၀ဲ ကသံၣ်မူၤဘှီးလၢအိၣ်၀ဲလၢအစုပူၤတဖၣ်၀ံၤ ဒုးနဲၣ်ဖျါထီၣ်၀ဲဒ် အ၀ဲသ့ၣ်တၢ်ဘၣ်အသးအသိးလီၤ. တၢ်သ့ၣ်တဖၣ်အံၤ လ့ၤတက့ၤတဘၣ်ထွဲအသးဒီး ပှၤဘၣ်အဂ့ၢ်” အ၀ဲစံး၀ဲန့ၣ်လီၤ.
တကးဘၣ် ဒ်သိး ကမၤဟးဂီၤ ရၢၢ်ခၢၣ်သုးမုၢ်ဒိၣ်အမဲၥ်သၣ်လၢ ဟီၣ်ခိၣ်ဒီဖျၢအမဲၥ်ညါအဂီၢ် ပညိၣ်မၤ၀ဲအဂ့ၢ် အူခဲၣ်သူးခး စံး၀ဲန့ၣ်လီၤ.
“ထုးထီၣ်၀ဲ ကသံၣ်မူၤဘှီးလၢအအိၣ်လၢအ၀ဲသ့ၣ်ဒီး စံး၀ဲလၢမၤန့ၢ်၀ဲလၢ AAအအိၣ်၀ံၤ ဖီၣ်မၤဆူၣ်မၤဆါ၀ဲပှၤလၢတဘၣ်ထွဲ၀ဲတဖၣ်ဒီး ပဲၥ်အၢပဲၥ်သီ၀ဲတဘီယူၥ်ဃီလီၤ. အနီၢ်နီၢ်တခီဒု မ့ၢ်ဒၣ် အဲၣ်ဒိးမၤဟးဂီၤ AAအမဲၥ်သၣ်လၢ ဟီၣ်ခိၣ်ဒီဖျၢၣ်အမဲၥ်ညါအဂီၢ် မၤဒုးအိၣ်ထီၣ်၀ဲဒီး ပဲၥ်အၢပဲၥ်သီအဂ့ၢ်” စံး၀ဲန့ၣ်လီၤ.
(ICE) ကသံၣ်မူၤဘှီး ၄၀၀၀ကံၣ်လိၣ်ကရၣ်, စ့ပယီၤ ၁၂၀ဘံၣ်လံၣ်ယၣ်ဃုၥ်ဒီး AAတၢ်ဆီၣ်ထွဲမၤစၢၤပှၤဘၣ်မူဘၣ်ဒါ အူခ့ၣ်ထိဒီး လမ့ခ့ၣ်(၂)ဂၤအံၤ ဘၣ်တၢ်ဖီၣ်န့ၣ်အီၤဖဲ အ့ၣ်ယၣ်၀တံၣ်ကီၢ်ခီ, ပသံၣ်ကီၢ်ဆၣ်, က၀ီၤဒ့(၁), ဆ့ၣ်အိဖိရၣ်, ထံကျိကၢၢ်နံၤကျဲ, တၢ်ပၥ်ကီၤနီၣ်ဂံၢ်(၁၉)ဟီၣ်လၥ်တၢ်လီၢ်အဂ့ၢ် စံး၀ဲန့ၣ်လီၤ.
တကးဘၣ် ပှၤတူၢ်ကွီၢ် ၂ဂၤအတၢ်တဲဖျါအဖီခိၣ် ဖဲနိၣ်၀့ဘၢၣ် ၆သီအနံၤန့ၣ် တၢ်ဖီၣ်န့ၢ်ကဒီး ၁၆ဂၤ၀ံၤ နိၣ်၀့ဘၢၣ် ၇သီအနံၤန့ၣ် ၄ဂၤ, နိၣ်၀့ဘၢၣ် ၉သီအနံၤန့ၣ် အမဲရကၤထုးထီၣ် M -4 A-1ကျိတခိၣ်, ကျိဖုၣ်(၁)ခိၣ်, ကဘီတီၣ်တၢ်ဖိတၢ်လံၤ ၂ခိၣ်အဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
သုးကီၣ်မံးရှၢၣ်တခီ ပှၤတူၢ်ကွီၢ်လၢဘၣ်တၢ်ဖီၣ်န့ၢ်အီၤတဖၣ် တၢ်ကဟံးဂ့ၢ်၀ီဒ် တၢ်ဘျၢသဲစးအသိးအဂ့ၢ်ဒီး ပှၤတူၢ်ကွီၢ်လၢဘၣ်ထွဲ၀ဲတဖၣ် တၢ်ကမၤဖျါထီၣ်ဒီးကဖီၣ်၀ဲအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
