လါနိၣ်၀့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၄), ကီၢ်ရ့ၣ်ဘျံးဒ၀ဲၢ်, ကီၢ်ဆၣ်ကစၢၢ်ဒိၣ်, သယဲးခၠီတၢ်ပၢဟီၣ်က၀ီၤအပူၤ သုးမီၤစိရိၤသုးကီၣ်မံးရှၢၣ်အသုး ဒွဲၣ်အူမၤဟးဂီၤကွံၥ်ကဒီး၀ဲ မ့ဒးသ၀ီဖိ ကမျၢၢ်ဟံၣ်(၆၀)ဘျဲၣ်အဂ့ၢ် ကီၢ်ရ့ၣ်ဘျံးဒ၀ဲၢ် ပၥ်ဖျါဃၥ်၀ဲတၢ်ကစီၣ်န့ၣ်လီၤ.
ဖဲလါနိၣ်၀့ဘၢၣ် ၂၃သီအနံၤန့ၣ် သုးကီၣ်မံးရှၢၣ်အသုး ဟဲထီၣ်သုးကျိၤဆူ ကစၢၢ်ဒိၣ်ကီၢ်ဆၣ်, သယဲးခၠီတၢ်ပၢဟီၣ်က၀ီၤပူၤ၀ံၤ ဒွဲၣ်အူမၤဟးဂီၤကွံၥ် မ့ဒးသ၀ီဖိ ကမျၢၢ်ဟံၣ်ဃီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ်အသုးအံၤ ဖဲအီးကထိဘၢၣ်လါဘူးကလၢၥ်အဆၢကတီၢ်စ့ၢ်ကီး သယဲးခၠီကီၢ်ဆၣ်အပူၤ ဒွဲၣ်အူမၤဟးဂီၤကွံၥ်၀ဲ လးဘးသ၀ီကမျၢၢ်ဟံၣ်ဃီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲလါအီးကထိဘၢၣ် ၂၅သီအနံၤန့ၣ် သုးကီၣ်မံးရှၢၣ်အသုး ဒွဲၣ်အူမၤဟးဂီၤကွံၥ် လးဘးသ၀ီဖိ ကမျၢၢ်ဟံၣ်ဃီ ၄၂ဖျၢၣ်အဂ့ၢ် KNU ဘျံးဒ၀ဲၢ်ကီၢ်ရ့ၣ်ထုးထီၣ်ပၥ်ဖျါဃၥ်၀ဲန့ၣ်လီၤ.
သုးကီၣ်မံးရှၢၣ်အသုးလၢ ဟဲထီၣ်သုးကျိၤဆူ KNU-ကီၢ်ရ့ၣ်ဘျံးဒ၀ဲၢ်, သုးက့နီၣ်ဂံၢ်(၄)ဟီၣ်က၀ီၤအပူၤတဖၣ်အံၤ သုးက့(၄)ဒီးတၢ်ပၢၢ်ဆၢသုးပၥ်ဖှိၣ်တဖၣ် ခီၣ်ဆၢဒုးက့ၤတၢ်အသိး သုးက့(၄)ဟီၣ်က၀ီၤ, တနီသရံၣ်ကီၢ်ဆၣ်, ကၠီၣ်တဲၣ်-ပယီၤကီၢ်ဆၢအပူၤအိၣ် မိဒီၢ်သုးကလၢၤအံၤစ့ၢ်ကီး တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲန့ၣ်လီၤ.
တၢ်ဒုးအပူၤ သုးကီၣ်မံးရှၢၣ်အပှၤသုးဖိလၢ ဘၣ်ဒိနးအံၤ မၤပှဲၤသုးဂံၢ်ဘါလၢကလံၤကျါအိၣ်၀ဲအသိး မၤကလံၤကျါတၢ်ဒုးတဖၣ်ဖဲ တနီသရံၣ်ကီၢ်ဆၣ်, လီၢ်က၀ီၤဒူသ၀ီတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
