လါနိၣ်၀့ဘၢၣ် ၂၀သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ၀့ၢ်ဖၣ်ပူၣ်အပူၤ ဒ်သိးတၢ်မၤ၀ဲတၢ်ဃုထၢကန့ၢ်အဂီၢ်ဒီး သုးကလၢၤလၢဘၣ်ပျၢ်ကွံၥ်၀ဲတဖၣ် ကဒုးန့ၢ်က့ၤအဂီၢ်သုးကီၣ်မံးရှၢၣ်ကတီၤသးလၢကထီၣ်သုးကျိၤအဃိလီၢ်က၀ီၤဖိတဖၣ်ဘၣ်ယိၣ်ဘၣ်ဘှီဘၣ်ပျံၤဘၣ်ဖူးတၢ်၀ံၤ သုးလီၢ်သုးကျဲအသးဆူ တၢ်လီၢ်လၢအဘံၣ်ဘၢတဖၣ်အဂ့ၢ် ပှၤလၢမၤစၢၤ၀ဲပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ခါလၢကဟဲ တၢ်ဃုထၢအကူၥ် ၂န့ၣ် သုးကီၣ်မံးရှၢၣ်တိၥ်ပၥ်၀ဲလၢ ကမၤ၀ဲဖဲ ၂၀၂၆နံၣ်, လါယနူၤအါရံၤ ၁၁သီအနံၤ ဖဲကီၢ်ဆၣ် ၁၀၀ဘ့ၣ်အပူၤ၀ံၤ ကညီကီၢ်စဲၣ်ပူၤတခီ ကမၤ၀ဲဖဲ ဖၣ်ပူၣ်ကီၢ်ဆၣ်ဒီး လူပျဲၢ်ကီၢ်ဆၣ် ၂ဘ့ၣ်အပူၤအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
တၢ်န့ၣ်အဃိ ဒ်သိးကမၤ၀ဲတၢ်ဃုထၢကန့ၢ်အဂီၢ်ဒီး ကဒုးန့ၢ်က့ၤသုးကလၢၤတဖၣ်အဂီၢ် သုးကီၣ်မံးရှၢၣ်အသုး ဟံးတၢ်မၤစၢၤလၢ DKBAဘိၣ်ဘံးကရၢ, ကညီသုးခိးကီၢ်ဆၢ BGFအအိၣ်ဒီး ကလံၤကျါတၢ်ခးစၢၤတၢ်တဖၣ်၀ံၤ ကဟဲထီၣ်သုးကျိၤအဂီၢ် ကတဲၥ်ကတီၤသုးဂ့ၢ်၀ီတဖၣ် ဖဲကမးမိၢ်၀့ၢ်ထးခီ ၀ါဒူသ၀ီပူၤအဃိ လီၢ်က၀ီၤဖိတဖၣ် ဘၣ်ယိၣ်ဘၣ်ဘှီတၢ်ဒီး သုးလီၢ်သုးကျဲဆိပၥ်သးအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
သုးကီၣ်မံးရှၢၣ်အသုး ဟဲထီၣ်သုးကျိၤ ဟဲဒုးတ့ၢ်လီၤမ့ၣ်ပိၢ်လၢကလံၤကျါအဃိ ဖၣ်ပူၣ်,ကတၢးတံး, ဖါပီၣ်, ကးကၠီၣ်, မံၣ်စဲ, ၀ါကီၣ်, ၀ၣ်သိခိၣ်သ၀ီတဖၣ်အပူၤ လီၢ်က၀ီၤကမျၢၢ် ဘူးထီၣ် ၁၀,၀၀၀ဃၣ်ဃၣ် ဘၣ်လဲၤဃ့ၢ်အိၣ်ကဒုအသး ဖဲ မၠဲၣ်ကၠံငူၣ်, ကမးမိၢ်, ဖၣ်အၣ်၀့ၢ်ဒီး တၢ်လီၢ်လၢအပူၤဖျဲးဘူးတံၣ်ဆွ့ၣ်မၠိတဖၣ်အအိၣ်အဂ့ၢ် စံး၀ဲန့ၣ်လီၤ.
ဖၣ်ပူၣ်ကီၢ်ဆၣ်အပူၤ တၢ်ဃုထၢလၢသုးကီၣ်မံးရှၢၣ်ကမၤ၀ဲအံၤန့ၣ် ခ့ၣ်အဲၣ်ယူၣ်-သုးက့(၅)တခီတတူၢ်လိၥ်၀ဲဘၣ်အဂ့ၢ် ဘိးဘၣ်ရၤလီၤဃၥ်၀ဲ တဲၥ်တဲၥ်ဖျူဖျူန့ၣ်လီၤ. လၢတၢ်န့ၣ်အဃိ သုးကီၣ်မံးရှၢၣ်မ့ၢ်ဟဲထီၣ်သုးကျိၤန့ၣ် ဘၣ်ယိၣ်လၢတၢ်ဒုးကကဲထီၣ်သးဒိၣ်ဒိၣ်မုၢ်မုၢ်၀ံၤ ကဟဲဒုးတၢ်လၢကလံၤကျါအဃိ ပှၤလီၢ်အိၣ်ကမှံဖိတဖၣ် ဘၣ်ယိၣ်ဘၣ်ဘှီတၢ်အဂ့ၢ် သုးက့(၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
“ဘၣ်ထွဲဒီးသုးကီၣ်မံးရှၢၣ်အသုး ကဟဲထီၣ်သုးကျိၤန့ၣ် လီၢ်က၀ီၤကမျၢၢ်တဖၣ် ဘၣ်ယိၣ်တၢ်ဒိၣ်မးလီၤ. ဘၣ်မနုအဃိလဲၣ် မ့ၢ်ဟဲထီၣ်သုးကျိၤလံန့ၣ် တၢ်ဒုးတဖၣ်ကဲထီၣ်ဒိၣ်ဒိၣ်မုၢ်မုၢ်၀ံၤ မ့ၢ်ဟဲဒုးစၢၤတၢ်လၢကလံၤကျါဒိၣ်ဒိၣ်မုၢ်မုၢ်န့ၣ် ပှၤလီၢ်အိၣ်ကမှံဖိတဖၣ်ကွၢ်ဆၢၣ်မဲၥ်ဘၣ်ဒီးတၢ်ကီတၢ်ခဲအါမးလီၤ. လၢတၢ်န့ၣ်အဃိ အ၀ဲသ့ၣ်ဘၣ်ယိၣ်တၢ်အဂ့ၢ်” စံး၀ဲန့ၣ်လီၤ.
ဖဲအပူၤကွံၥ် လါအီးကထိဘၢၣ် ၁လါအတီၢ်ပူၤ ခ့ၣ်အဲၣ်ယူၣ်-သုက့(၅), မုၢ်တြီၢ်ဟီၣ်က၀ီၤအပူၤ တၢ်ဒုးကဲထီၣ်တ့ၢ်၀ဲ ၁၂၁ဘျီ, သုးကီၣ်မံးရှၢၣ်တပၤ သုးရ့ၣ်ခိၣ်ပၣ်ဃုၥ် သံ၀ဲ ၃၄ဂၤ၀ံၤ ဘၣ်ဒိ၀ဲ ၇၈ဂၤ၀ံၤအလီၢ်ခံ ဟဲဒုးတ့ၢ်လီၤမ့ၣ်ပိၢ်တဖၣ်လၢ ဒြိ, ကျိဖးဒိၣ်ဒီး ကလံၤကျါတဖၣ်အဃိ လီၢ်က၀ီၤကမျၢၢ် ဘၣ်သံ၀ဲ (၁)ဂၤဒီး ဘၣ်ဒိ၀ဲ (၆)ဂၤ, ဟံၣ်(၄)ဖျၢၣ်ဟးဂီၤကွံၥ်၀ဲပၣ်ဃုၥ် တၢ်သိၣ်လိကၠိဒီးတၢ်ဘါယွၤသရိၥ်တဖၣ်စ့ၢ်ကီး ဘၣ်ဟးဂီၤကွံၥ်၀ဲအဂ့ၢ် သုးက့(၅)ပၥ်ဖျါဃၥ်၀ဲတၢ်ကစီၣ်န့ၣ်လီၤ.
