လါအီးကထိဘၢၣ် ၃၀သီ, ၂၀၂၅နံၣ်, အၣ်ထူခ့တၢ်ကစီၣ်
တၢ်မၤစၢၤ ကရ့ၣ်နံၣ်ကီၢ်စဲၣ်အပူၤအိၣ် ပှၤလီၢ်အိၣ်ကမှံဖိတဖၣ်တၢ်အီၣ်တၢ်အီ န့ၢ်ဂ့ၤဂ့ၤဘၣ်ဘၣ်လီၤအဂ့ၢ် ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC) အပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤဒီး တၢ်က့ၤသူၣ်ထီၣ်ဆီလီၤ၀ဲၤကျိၤ, ၀ဲၤကျိၤခိၣ်ခံ ၁ဒီး ပှၤလၢသူၣ်ထီၣ် ကညါမီၣ်ဖီၣ်ဒ့ရှ့ မီၣ်ယံၣ်ယံၣ်စံး၀ဲန့ၣ်လီၤ.
ဖဲအပူၤကွံၥ် စှၤသီအတီၢ်ပူၤ ကီၢ်ကရ့ၣ်နံၣ်, ဒံၣ်မီစိၤမုၢ်နုၥ်တပၤတၢ်လီၢ်အပူၤ ကၠ့လဲးမၠံၣ်တီခိၣ်ရိၣ်မဲ ရဲၣ်ကျဲၤလၢအမ့ၢ် ပှၤလီၢ်အိၣ်ကမှံဖိတဖၣ်, သရၣ်မုၣ်တဖၣ်, ကၠိဖိမုၣ်ခွါတဖၣ်ဒီး ပၢပြးပှၤဘၣ်မူဘၣ်ဒါတဖၣ် တၢ်ထံၣ်လိၥ်အိၣ်သကိးအပူၤ တဲလီၤ၀ဲဒ်န့ၣ်န့ၣ်လီၤ.
“ပှၤလီၢ်အိၣ်ကမှံဖိဒဲက၀ီၤအပူၤ ဟံၣ်ဒူၣ်အိၣ်၀ဲ ၅၀ဒူၣ်လီၤ. ဟံၣ်ဒူၣ်၅ဒူၣ်ကၤထီၣ်၀ဲလီၤ. အ၀ဲသ့ၣ်ကအီၣ်ဘၣ်တၢ်တအိၣ်နီတမံၤဘၣ်. အိၣ်ဘၣ်လီၤမ့ၤချီလီၤ. လၢအ၀ဲသ့ၣ်အဂီၢ် တၢ်ကတီၤပၥ်ဆိန့ၢ်အ၀ဲသ့ၣ်အဂီၢ်လီၤ. တမ့ၢ်လၢ ပကပၥ်အီၤတုၤ တၢ်အီၣ်တၢ်အီကၤထီၣ်အပတီၢ်ဘၣ်. လၢလၢပှဲၤပှဲၤတခီဒု ပပၥ်အီၤတန့ၢ်ဒံးဘၣ်အဂ့ၢ်” အ၀ဲစံး၀ဲန့ၣ်လီၤ.
ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC)တခီ မၤစၢၤဆီၣ်ထွဲ၀ဲ ကီၢ်စဲၣ်အပူၤအိၣ် ပှၤလီၢ်အိၣ်ကမှံဒဲက၀ီၤခဲလၢၥ် ၁၅၀ဘျဲၣ် ပှၤလီၢ်အိၣ်ကမှံဖိ ၁၅၀၀၀၀ဘျဲၣ် တန့ၢ်လၢလၢလီၢ်လီၢ်ဒံးဘၣ်အဂ့ၢ် ၀ဲၤကျိၤခိၣ်ခံ ၁ မီၣ်ယံၤယံၤအၢၣ်လီၤ၀ဲန့ၣ်လီၤ.
“အခဲအံၤပဟဲလီၤလၢပျီပူၤလီၤ. ပဒိကနၣ်၀ဲ ပှၤတၢ်ကီတၢ်ခဲတဖၣ်လီၤ. ၀ံၤ တၢ်ကီတၢ်ခဲဒီးတၢ်လၢအလိၣ်တဖၣ် ပကဃ့ထီၣ်တၢ်မၤစၢၤတဆီလီၤ. တလါတလါန့ၣ် ဟုသးထၢၣ်လီၤလၢအကထိလီၤ. ပမၤလၢပှဲၤတန့ၢ်ဂ့ၤဂ့ၤဘၣ်. ကဘၣ်နီၤဟ့ၣ်လီၤ တဂၤ ၆သလီးဘၣ်ဆၣ် အခဲအံၤန့ၣ် ပနီၤလီၤန့ၢ်ဒၣ်ထဲ ၄သလီးလီၤ. ဘၣ်ဆၣ်ပလဲၤဟ့ၣ်လီၤ၀ံၤအလီၢ်ခံ ပကလဲၤတုၤက့ၤလၢခံတဘျီအဂီၢ်န့ၣ် ယံၤဖးယံၤညါ. ကီၢ်စဲၣ်ဒီတဘ့ၣ်အပူၤန့ၣ် ပှၤလီၢ်အိၣ်ကမှံဖိဒဲက၀ီၤအိၣ်၀ဲခဲလၢၥ် ၅၀၀ဃၣ်ဃၣ်ညါ. တၢ်န့ၣ် ပလဲၤဒဲက၀ီၤတဖျၢၣ်မ့ၢ်၀ံၤန့ၣ် ပကဟဲတုၤက့ၤလီၢ်ခံတဘျီအဂီၢ် ပတသ့ၣ်ညါလီၤတံၢ်ဘၣ်အဂ့ၢ်” အ၀ဲစံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ဒ်သိးတၢ်ဃုထၢအယီၤအဘျၣ်ကကဲထီၣ်လိၣ်ထီၣ်အဂီၢ် ဟဲထီၣ်သုးကျိၤမၤဒုးယၤရဲၣ်ကျဲၤတဖၣ်လၢ ကရ့ၣ်နံၣ်ကီၢ်စဲၢ်ဒီတဘ့ၣ်အပူၤအဃိ တၢ်ကဆီၣ်ထွဲမၤစၢၤ ပှၤလီၢ်အိၣ်ကမှံဖိတဖၣ် တၢ်မၤစၢၤတဖၣ်ဟဲစှၤလီၤအဂ့ၢ် Karenni Hope ပှၤဘၣ်မူဘၣ်ဒါ ကိၣ်လွါစံး၀ဲန့ၣ်လီၤ.
ကတီၢ်ခဲအံၤန့ၣ် ကီၢ်ကရ့ၣ်နံၣ်အပူၤ သုးကီၣ်မံးရှၢၣ်အသုး အတၢ်ဟဲထီၣ်မၤဒုးယၤရဲၣ်ကျဲၤတဖၣ်တကးဘၣ် ခီဖျိအပှ့ၤကလံၤဒိၣ်ထီၣ်အဃိ လီၢ်က၀ီၤဖိ ဘူးထီၣ် ၃ကလီၢ်ဃၣ်ဃၣ် ဘၣ်ကီဘၣ်ခဲလၢတၢ်ဒုးတၢ်ယၤအသိး ဘၣ်ကွၢ်ဆၢၣ်မဲၥ်ဘၣ်ဒီး တၢ်ဖိတၢ်လံၤအပှ့ၤကလံၤဒိၣ်ထီၣ်တၢ်ဂ့ၢ်ကီန့ၣ်လီၤ.
