ပၢဆှၢက့ၤ ကီးတရံး-အီးဘိၣ်တဲကျဲမုၢ်ကန့ၢ်အဂီၢ် သုးကီၣ်မံးရှၢၣ် ထီၣ်သုးကျိၤ

လါအီးကထိဘၢၣ် ၃၀သီ, ၂၀၂၅နံၣ်, အၣ်ထူခ့တၢ်ကစီၣ်

သုးကီၣ်မံးရှၢၣ်အသုးအံၤ ဒ်သိးပၢဆှၢကန့ၢ်က့ၤ ကညီကီၢ်စဲၣ်, ကီးတရံး၀့ၢ်အကပၤ ကီးတရံး-အီးဘိၣ်တဲကျဲမုၢ်အဂီၢ် ဟဲထီၣ်သုးကျိၤအဃိ တၢ်ဒုးတဖၣ်ကဲထီၣ်၀ဲကိးမုၢ်နံၤဃၣ်ဃၣ်၀ံၤ လီၢ်က၀ီၤဖိတဖၣ် ဘၣ်ဃ့ၢ်ပူၤဖျဲးအသးအဂ့ၢ်  ဂံၢ်ခီၣ်ထံးသုးဂ့ၢ်၀ီတၢ်ကစီၣ်ဒီး လီၢ်က၀ီၤဖိတဖၣ် စံး၀ဲန့ၣ်လီၤ.

သုးကီၣ်မံးရှၢၣ်အသုးအံၤ ဒ်သိး ပၢဆှၢကန့ၢ်က့ၤ နဘူး-ကီးတရံး-အီးဘိၣ်တဲကျဲမုၢ်အဂီၢ်ဒီး ဒိၣ်စိက့ၤကန့ၢ်အဂီၢ် ဟဲထီၣ်သုးကျိၤလၢ (DKBA)ဘိၣ်ဘံးကရၢဒီး ကညီသုးခိးကီၢ်ဆၢ (BGF)တၢ်မၤစၢၤအဃိ တၢ်ဒုးတဖၣ်ကဲထီၣ်သးန့ၣ်လီၤ.

တကးဘၣ် သုးကီၣ်မံးရှၢၣ်တကပၤ မၤပှဲၤအါထီၣ်၀ဲသုးအဂံၢ်အဘါတဖၣ်အဃိ လီၢ်က၀ီၤဖိတဖၣ် ဘၣ်ဃ့ၢ်ပူၤဖျဲးသးအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.

“တၢ်ဒုးကဲထီၣ်လၢ ကီးတရံးကလံၤစိးတပၤ ကိးမုၢ်နံၤဃၣ်ဃၣ် တပယူၥ်ဃီလီၤ. တၢ်ဒုးန့ၣ်ကဲထီၣ်သးကိးမုၢ်နံၤလီၤ. ဒုၣ်ဒါန့ၣ်ဟဲထီၣ်လၢပအိၣ်တပၤတန့ၢ်ဘၣ်အဃိ ဟဲထီၣ်လၢ မၠးပတဲၣ်, ယ့ၣ်ကွဲတီၣ်တပၤလီၤ. အခဲအံၤန့ၣ် အ၀ဲသ့ၣ်မၤပှဲၤ၀ဲဂံၢ်ဘါ တဘီယူၥ်ဃီလီၤ. ဒူသ၀ီဖိတဖၣ်စ့ၢ်ကီး ဘၣ်ဃ့ၢ်ပူၤဖျဲးအသးလီၤ. အ၀ဲသ့ၣ်မၤညီနုၥ်အသိး မၤပျံၤမၤဖူးဒူသ၀ီဖိတဖၣ်ဒီး နုၥ်လီၤဂုၥ်ဆူၣ်ဖျိဆူၣ်၀ဲ ကမျၢၢ်ဟံၣ်တဖၣ်လီၤ. တနီၤန့ၣ် က့ၤဖီၣ်၀ဲဒီး မၤဆူၣ်မၤဆါ၀ဲတဖၣ်အိၣ်၀ဲ”လီၤ.

ဖဲအပူၤကွံၥ် လါအီးကထိဘၢၣ် ၁၀သီအနံၤ, သုးကီၣ်မံးရှၢၣ်အသုးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲ၀ံၤ သုးကီၣ်မံးရှၢၣ်တပၤ တၢ်ဘၣ်ဒိဘၣ်ထံးအိၣ်အါ၀ဲအဃိ ဖီၣ်န့ၢ်ဆူၣ်လီၢ်က၀ီၤကမျၢၢ်တဖၣ်ဒ် ပှၤကညီတၢ်ဒီသဒၢအသိး၀ံၤ မၤဆူၣ်မၤဆါ၀ဲန့ၣ်လီၤ.

ကတီၢ်ခဲအံၤ တၢ်ဒုးလၢကဲထီၣ်သးတဖၣ် တကးဘၣ် သုးကီၣ်မံးရှၢၣ်တပၤ မၤပှဲၤဂံၢ်ဘါတဖၣ်၀ံၤ ထီၣ်သုးကျိၤအဃိ လီၢ်က၀ီၤဒူသ၀ီတဖၣ်ဒ်အမ့ၢ် ထံဖိစၣ်, နါရွ့ၣ်မ့း, မံးဖၣ်လဲး, နီၢ်တပွဲ, နီၢ်ကဲ, နီၢ်တပၣ်, မၠးပတဲၣ်, နီၢ်မံးဒီး သ၀ီအဖျၢၣ် ၂၀ဖျၢၣ်, လီၢ်က၀ီၤဖိလၢအကလးတဖၣ် ဘၣ်ဃ့ၢ်ပူၤဖျဲးအသးန့ၣ်လီၤ.

လီၢ်က၀ီၤဖိတဂၤ စံး၀ဲလၢ” သုးကီၣ်မံးရှၢၣ်တပၤ မၤပှဲၤဂံၢ်ဘါလီၤ. မၤပှဲၤ၀ဲလၢမုၢ်နၤခီ၀ံၤမး ဟဲထီၣ်လၢမုၢ်နၤတပၤလီၤ. တဟဲထီၣ်လၢ မုၢ်ဆါတပၤဘၣ်. တၢ်ဒုးကဲထီၣ်အဃိ လီၢ်က၀ီၤဖိတဖၣ် ဘၣ်ဃ့ၢ်ပူၤဖျဲးအသးလီၤ. ဟဲထီၣ်သုးကျိၤအဃိ ဘၣ်ယိၣ်လၢ တၢ်ဒုးကကဲထီၣ်လီၤ. တၢ်ဒုးမ့ၢ်ကဲထီၣ်န့ၣ် ဘၣ်ယိၣ်လၢ ကအိၣ်ကးတံၥ်လၢတၢ်အဘၢၣ်စၢၤလီၤ. လီၢ်က၀ီၤဖိတဖၣ် ဘၣ်ကီဘၣ်ခဲဒိၣ်မးလီၤ. က့ၤလၢဒူသ၀ီတဖၣ်စ့ၢ်ကီးတန့ၢ်ဒံးဘၣ်. အ့ကၠံဒီး ပထမးသ၀ီတဖၣ်စ့ၢ်ကီး အ၀ဲသ့ၣ်ဟဲဆီလီၤဃၥ်သးအဃိ တမုၥ်တခုၣ်ဘၣ်. မ့ၢ်ဂၢၢ်ကျၢၢ်ထီၣ်မး အ၀ဲသ့ၣ်ကဟဲက့ၤအိၣ်လီၤ” အဂ့ၢ် စံး၀ဲန့ၣ်လီၤ.

တကးဘၣ် ကီးတရံး စကခ ၁၂, ခလရ ၉၇ဒီး ကြုၢ်တု ခမရ ၅၄၅, ခမရ ၅၄၆တဖၣ်စ့ၢ်ကီး ခးလီၤကျိဖးဒိၣ်တဖၣ်း ဒုးတ့ၢ်လီၤမ့ၣ်ပိၢ်လၢ ဒြိတဖၣ်ဆူ ဒူသ၀ီတဖၣ်လၢ အဘူးဒီး တၢ်ဒုးကဲထီၣ်သးတၢ်လီၢ်တဖၣ်န့ၣ်လီၤ.

ဖဲအပူၤကွံၥ် လါအီးကထိဘၢၣ် ၁၄သီအနံၤစ့ၢ်ကီး သုးကီၣ်မံးရှၢၣ်အသုး လဲၤဒုးတ့ၢ်လီၤမ့ၣ်ပိၢ်လၢ ကလံၤကျါတဖၣ်ပၣ်ဃုၥ် ဒြိတဖၣ်, ခးလီၤကျိဖးဒိၣ်တဖၣ်ဆူ နီၢ်မံးသ၀ီတကပၤအဃိ ဟံၣ်ဃီအါအါဂီၢ်ဂီၢ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.