လါအီးကထိဘၢၣ်(၁၅)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်-ပယီၤကီၫ်ဆၢအပူၤ ထံခံသ၀ီလၢKNUပၢဆှၢဃာ်အံၤ ဖဲမဟါ လါအီးကထိဘၢၣ်(၁၄)သီအနံၤ,မုၫ်ထူၣ် (၁၂း၃၀)နၣ်ရၣ်ဃၣ်ဃၣ်န့ၣ် ဟဲတ့ၫ်လီၤကဒီးမ့ၣ်ပိၫ်လၢကဘီယူၤအဂ့ၫ် ထံခံပှၤလီၫ်က၀ီၤဖိတဖၣ်တဲ၀ဲလီၤ.
ဟဲတ့ၫ်လီၤမ့ၣ်ပိၫ်လၢ(၄)ဖျၢၣ်လၢကဘီယူၤဒုးသုး(၁)ခိၣ်ဒီးကျးတဖျၢၣ်မ့ၣ်အူအီၣ်ဟးဂီၤကွံာ်၀ဲအဂ့ၫ် ထံခံပှၤလီၫ်က၀ီၤဖိပိာ်ခွါတဂၤတဲ၀ဲလီၤ.
တၫ်ဒုးတ့ၫ်လီၤမ့ၣ်ပိၫ်အပူၤ တၫ်သ့ၣ်ညါဘၣ်လၢပှၤဘၣ်ဒိ(၂)ဂၤဒီးမ့ၫ်မတဂၤတဖၣ်လဲၣ်တခီ တၫ်တသ့ၣ်ညါဘၣ်လီၤတံၫ်ဒံးဘၣ်အဂ့ၫ် တဲ၀ဲလီၤ.
ကညီဒီကလုာ်စၢဖှိၣ်ကရၢ-KNU,သုးက့နီၫ်ဂံၫ်(၄)တၫ်ပၢ,ထံခံဟီၣ်က၀ီၤအံၤ သုးခီၣ်မံးရှၢၣ်အစုတီၤဖီလာ်သုးတဖၣ် စးထီၣ်ဖဲလါအီးကထိဘၢၣ်(၈)သီအနံၤန့ၣ် ဟဲဒုးတ့ၫ်လီၤ၀ဲလၢမ့ၣ်ပိၫ်တဖၣ်လီၤ.
ဖဲလါအီးကထိဘၢၣ်(၁၀)သီအနံၤစ့ၫ်ကီး ဟဲဒုးကဒီး၀ဲအဃိ လၢတလါအံၤအပူၤ ဟဲတ့ၫ်လီၤမ့ၣ်ပိၫ်လၢကဘီယူၤ အိၣ်(၃)သီလံန့ၣ်လီၤ.
ဒုးတ့ၫ်လီၤမ့ၣ်ပိၫ်ဒ်သိးအံၤအဃိ ကၣ်စံၣ်နိၣ်တၫ်လိာ်ကွဲကျိာ်စ့အလီၫ်ပာ်ဃုာ် ကမျၢၫ်အိၣ်ဟံၣ်ဒီးတၫ်မၤလီၫ်တၫ်သူၣ် ထီၣ်တနီၤ ဟးဂီၤ၀ဲအဂ့ၫ် ထံခံပှၤလီၫ်က၀ီၤဖိတဖၣ်တဲ၀ဲလီၤ.
၂၀၂၅နံၣ်,လါအ့ဖြ့ၣ်(၁၉)သီအနံၤန့ၣ် ထံထၣ်သုးကလၢၤ,လါမ့ၤ(၉)သီနံၤန့ၣ် ထံခံကီၫ်ဆၢသုးကလၢၤဒီးကီၫ်ဆၢတၫ် ကူၣ်လဲၫ်မၤကၤတြဲၤ,လါယူၤ(၁၀)သီအနံၤန့ၣ် ဘီဒံးသုးကလၢၤ,လါယူၤလံ(၇)သီအနံၤန့ၣ် သုးခးသုးကလၢၤတဖၣ်န့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲလီၤ.
ဒ၀ဲၫ်ကီၫ်ရ့ၣ်အပူၤ ထဲနးအ့းတီၣ်သုးကလၢၤလၢဘျးစဲဒီးကၣ်ပီးဟီၣ်က၀ီၤအံၤတၫ်ဒုး၀ဲတန့ၫ်ဒံးဘၣ်ဒီးကီၫ်ရ့ၣ်ပူၤ ကၠီၣ်တဲၣ်-ပယီၤကီၫ်ဆၢဒီတခါ ကညီဒီကလုာ်စၢဖှိၣ်ကရၢ-KNUပၢဆှၢဃာ်၀ဲန့ၣ်လီၤ.
