လါအီးကထိဘၢၣ် ၁၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအသုး ကအိးထီၣ်ကဒါက့ၤ အ့ရှၢကျဲမုၢ်ဖးဒိၣ်အဂီၢ် ဟူးဂဲၤ၀ဲအဂ့ၢ် တၢ်ကစီၣ်တဖၣ်ဟးထီၣ်၀ံၤအလီၢ်ခံ တနံၤအံၤန့ၣ် BGF ဒီး KNU/KNLA PCတၢ်သမံသမိးတြဲၤတဖၣ်လၢအိၣ်ဖဲ ကၠီၣ်တဲၣ်-ပယီၤ, သူမွဲကျိကၢၢ်နံၤတဖၣ် သုးကီၣ်မံးရှၢၣ်အသုးဒီး၀ဲၤကျိၤပၥ်ဖှိၣ်တဖၣ် နုၥ်လီၤသမံသမိး၀ဲအဂ့ၢ် ရၤမတံအိၣ်သူၣ်လီၤ ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
မဟါအနံၤ လါအီးကထိဘၢၣ် ၁၃သီအနံၤ, ဂီၤအဆၢကတီၢ်န့ၣ် BGF ဒီး KNU/KNLA PCတၢ်သမံသမိးတြဲၤတဖၣ်ဒီး ကၠါဖၠၣ်တၢ်လီၢ်တဖၣ် သုးကီၣ်မံးရှၢၣ်အသုး, ပၢပြး, ပၢၤကီၢ်သုးပၣ်ဃုၥ် ၀ဲၤကျိၤပၥ်ဖှိၣ်တဖၣ် နုၥ်လီၤသမံသမိး၀ဲအဂ့ၢ်, ဖဲလၢတၢ်သမံသမိးပူၤ ခံခီခံကပၤထိၣ်ဃူတဲသကိးတၢ်၀ံၤမး နုၥ်လီၤသမံသမိး၀ဲဒီး တမ့ၢ်လၢ အဖီၣ်၀ဲဒီး တၢ်ဟံးန့ၢ်ဂ့ၢ်၀ီတအိၣ်နီတမံၤဘၣ်ဒီး မ့ၢ်ဒၣ် လဲၤဆှၣ်ကွၢ်၀ဲ တၢ်သမံသမိးတြဲၤတဖၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
“BGFဃုၥ်ဒီး PC တဖၣ် ဟ့ၣ်၀ဲတၢ်ပျဲလီၤ. စကမ စ့ၢ်ကီး အိၣ်ဒၣ်ဟးကွၢ်၀ဲလီၤ. တမ့ၢ်လၢ အဖီၣ်ဟံးန့ၢ်ဂ့ၢ်၀ီဘၣ်. လီၤဂၥ်ဒ်သိး တထံၣ်ဘူဘၣ်အဃိ ဟးကွၢ်၀ဲအသိးလီၤ. စကမ အပှၤတဖၣ် ကဟဲကွၢ်၀ဲအဆၢကတီၢ်န့ၣ် လၢတပၤ အပှၤတဖၣ်မၤရှဲဃၥ်၀ဲခဲလၢၥ်လီၤ. ကွၢ်၀ံၤအလီၢ်ခံမး BGF ဒီး PCတဖၣ် က့ၤဟံးန့ၢ်အလီၢ်လီၤ. မၤ၀ဲ For Showလီၤအဂ့ၢ်” ရၤမတံအိၣ်သူၣ်လီၤ ဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
တကးဘၣ် ခဲအံၤစှၤသီအတီၢ်ပူၤန့ၣ် သုးကီၣ်မံးရှၢၣ်တပၤ ဂုၥ်ကျဲးစၢးလၢ ကအိးထီၣ်ကဒါက့ၤ အ့ရှၢကျဲမုၢ်ဖးဒိၣ်အဂီၢ်၀ံၤ ဖဲလၢတၢ်အိးထီၣ်အ့ရှၢကျဲမုၢ်အပူၤ သုးကီၣ်မံးရှၢၣ် ကဟ့ၣ်၀ဲတၢ်ဘၣ်ဘျူးလၢ BGF ၊ KNU/KNLA PC ဒီး DKBAတဖၣ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ကအိးထီၣ်က့ၤ အ့ရှၢကျဲမုၢ်ဖးဒိၣ်အဂီၢ်မၤ၀ဲယံၤလံ. အခဲအံၤပနၢ်ဟူဘၣ်န့ၣ် ကအိးထီၣ်လၢ လါအီးကထိဘၢၣ် ၁၈သီအနံၤ မ့တမ့ၢ် ၁၇သီအနံၤအသိးလီၤ. ဖဲအ့ရှၢကျဲမုၢ်ဖးဒိၣ်အဖီခိၣ် ကဟ့ၣ်၀ဲ BGF ၊ KNU/KNLA PC ဒီး DKBAတဖၣ် ကအိၣ်ဆီလီၤတၢ်သမံသမိးတြဲၤအလီၢ်တဖၣ်အဂ့ၢ် တၢ်ကစီၣ်တဖၣ်ဟးထီၣ်၀ဲလီၤ. တၢ်အံၤကဲထီၣ်သ့လီၤ. သုးကီၣ်မံးရှၢၣ်ကဒိၣ်စိန့ၢ်က့ၤ အ့ရှၢကျဲမုၢ်အဂီၢ် အ၀ဲသ့ၣ်မၤစၢၤ၀ဲလီၤ. မ့ၢ်ဘၣ်တဲပျီပျီန့ၣ် သုးကီၣ်မံးရှၢၣ် တပျၢ်ကွံၥ်အ၀ဲသ့ၣ်အစုဘၣ်ဒီး ကမၤလီၤဖး ကညီဖီၣ်စုက၀ဲၤတဖၣ်၀ံၤ ကဟ့ၣ်၀ဲဟီၣ်က၀ီၤတဖၣ်ဒီး ကပျဲဃုမုၥ်ကျိၤ၀ဲၤကွၥ်လီၤ. တကပၤစ့ၢ်ကီး အ၀ဲသ့ၣ်မၤတ့ၢ်စှၤလီၤ KNUအဂံၢ်အဘါအဂ့ၢ်” ရၤမတံအိၣ်သူၣ်လီၤ ဂံၢ်ခီၣ်ထံးသုးဂ့ၢ်၀ီ တၢ်ကစီၣ် တဲရှဲ၀ဲန့ၣ်လီၤ.
တၢ်ဃုထၢလၢသုးကီၣ်မံးရှၢၣ် ကရဲၣ်ကျဲၤမၤ၀ဲဒီး အိၣ်ကတဲၥ်ကတီၤ၀ဲအံၤ BGF ဒီး DKBAပၣ်ဃုၥ် ကညီဖီၣ်စုက၀ဲၤတနီၤလၢ အဘၣ်လိၥ်ဖိးဒ့ဒီး သုးကီၣ်မံးရှၢၣ်န့ၣ် ကဆီၣ်ထွဲမၤစၢၤ၀ဲ တၢ်ဃုထၢကကဲထီၣ်လိၥ်ထီၣ်အဂီၢ်အဂ့ၢ် ထုးထီၣ်ပၥ်ဖျါဃၥ်၀ဲ လံၥ်ဘိးဘၣ်ရၤလီၤလၢ ကရၢတဖုစုၥ်စုၥ်န့ၣ်လီၤ.
ဘၣ်ဆၣ်ဒီး ကညီဒီကလုၥ်စၢဖှိၣ်ကရၢ KNUတခီ တတူၢ်လိၥ်၀ဲ တၢ်ဃုထၢအံၤဘၣ်ဒီး ပှၤလၢမၤစၢၤဆီၣ်ထွဲဒီးပၣ်ဃုၥ်ပၣ်ဂီၢ်လၢ တၢ်ဃုထၢအပူၤတဖၣ် တၢ်ကဟံးန့ၢ်ဂ့ၢ်၀ီအဂ့ၢ် KNU သုးက့/ကီၢ်ရ့ၣ်တဘ့ၣ်စုၥ်စုၥ်လၢဘၣ်ထွဲတဖၣ် ထုးထီၣ်ဘိးဘၣ်ရၤလီၤဃၥ်၀ဲန့ၣ်လီၤ.
