လါအီးကထိဘၢၣ်(၁၅)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကီၫ်ပယီၤတကပၤ ဘီမုၫ်စၢဖှိၣ်ကရၢပှၤဂ့ၫ်၀ီခွဲးယာ်အတၫ်ပာ်ဒ့ၣ်ပာ်ကမၣ်လၢတမ့ၫ်တၫ်နီၫ်ကီၫ်တဖၣ် ဂ့ၫ်လိာ်ထီဒါ၀ဲအ ဂ့ၫ် သုးကီၣ်မံးရှၢၣ်ထံဂုၤကီၫ်ဂၤကိတိာ်၀ဲၤကျိၤန့ၣ် ဖဲလါအီးကထိဘၢၣ်(၁၄)သီအနံၤ ထုးထီၣ်ဘိးဘၣ်ရၤလီၤဃာ်၀ဲလီၤ.
လၢ၀့ၫ်ကၠၣ်နံၣ်ဘၣ်အပူၤ ဖဲ၈-၉-၂၀၂၅ သီတုၤ ၈-၁၀-၂၀၂၅သီအနံၤ တၫ်မၤ၀ဲ(၆၀)၀ီတ၀ီ ပှၤဂ့ၫ်၀ီခွဲးယာ်တၫ်အိၣ်ဖှိၣ်အပူၤ ဘီမုၫ်စၢဖှိၣ်ကရၢပှၤဂ့ၫ်၀ီခွဲးယာ်ပှၤဘၣ်မူဘၣ်ဒါအလံာ်ပာ်ဖျါဒီး ကီၫ်ပယီၤတၫ်ဃုထံၣ်သ့ၣ်ညါကရၢသဘျ့ အလံာ်ပာ်ဖျါတဖၣ်အဖီခိၣ် ပာ်ဖှိၣ်တၢၣ်ပီၣ်သကိး၀ဲအဂ့ၫ် တၫ်သ့ၣ်ညါဘၣ်လီၤ.
လၢတဘျီအံၤစ့ၫ်ကီး ဒ်အပူၤကွံာ်အသိး ထံကီၫ်လၢဘၣ်ထွဲခၢၣ်စးတဖၣ်တပျဲပာ်ဃုာ်၀ဲဘၣ်အမဲာ်ညါ တဖိးမံလိာ်အသး ဒီးပှၤဂ့ၫ်၀ီကီၣ်ကးအဂ့ၫ်ခီၣ်ထံးတၫ်ဘျၢ တၫ်တၢၣ်ပီၣ်တဲသကိးဒီးတၫ်ပာ်ဖှိၣ်မၤသကိးတၫ်တဖၣ်ဘၣ်အဂ့ၫ် သုးကီၣ်မံးရှၢၣ် တဲ၀ဲလီၤ.
ပှၤဂ့ၫ်၀ီကီၣ်ကးအတၫ်တၢၣ်ပီၣ်တဲသကိးတဖၣ်ဒီးအလံာ်ပာ်ဖျါတဖၣ်န့ၣ် အါတက့ၫ် သူဃာ်၀ဲတၫ်ဂ့ၫ်တၫ်ကျိၤလၢ တၫ်ပာ်ဂၢၫ်ပာ်ကျၢၤတန့ၫ်တဖၣ်ဒီးတၫ်ထံၣ်ဘၣ်လၢအိၣ်ဒၣ်ထဲ ပာ်ဒ့ၣ်ပာ်ကမၣ်တၫ်လၢပယီၤပဒိၣ်အဖီခိၣ်တလီၫ်လီၫ်အဂ့ၫ် သုးကီၣ်မံးရှၢၣ်တဲ၀ဲလီၤ.
ဟံးန့ၫ်၀ဲအခီၣ်တဃာ်လၢ တၫ်ဂ့ၫ်တၫ်ကျိၤလၢတၫ်ပာ်ဂၢၫ်ပာ်ကျၢၤတန့ၫ်တဖၣ်၀ံၤ တၫ်ပာ်ဒ့ၣ်ပာ်ကမၣ်လၢတအိၣ်ဒီး တၫ်ဂ့ၫ်တၫ်ကျိၤလီၤတံၫ်တဖၣ် တၫ်ထံၣ်ဘၣ်လၢမၤ၀ဲတလီၫ်လီၫ်အဂ့ၫ် သုးကီၣ်မံးရှၢၣ်တဲ၀ဲလီၤ.
ဘီမုၫ်စၢဖှိၣ်ကရၢအပှၤဂ့ၫ်၀ီတၫ်ဒီသဒၢမၤဂ့ၤထီၣ်လံာ်ကဘျံးပၤအပူၤ ကရၢအရ့ဒိၣ်တခါလၢအမ့ၫ် ပှၤဂ့ၫ်၀ီကီၣ်ကးန့ၣ် ဘီမုၫ်စၢဖှိၣ်ကရၢထံကီၫ်တဘ့ၣ်အပူၤတၫ်အိၣ်သးလၢကဲထီၣ်တဖၣ် ပဲထံနီၤဖး၀ဲတၫ်ဂ့ၫ်တၫ်ကျိၤတခီတၢၤ ဒ်သိးပှၤက ဆိမိၣ်လၢတၫ်အဘၣ်လီၤန့ၣ်မၤ၀ဲတပယူာ်ဃီအဂ့ၫ် သုးကီၣ်မံးရှၢၣ်တဲ၀ဲလီၤ.
ဘၣ်ဆၣ်သနာ်က့ သုးကီၣ်မံးရှၢၣ်တကပၤ ဘီမုၫ်စၢဖှိၣ်ကရၢပှၤဂ့ၫ်၀ီခွဲးယာ်ကီၣ်ကး အတၫ်တၢၣ်ပီၣ်တဲသကိးတဖၣ်ဒီး လံာ်ပာ်ဖျါတဖၣ်န့ၣ် တၫ်ဂ့ၫ်တၫ်ကျိၤမနုၤကမၣ်အဂ့ၫ်,လီၤတံၫ်လီၤဆဲးတအိၣ်ဘၣ်အဂ့ၫ်ဒီးမၤတခီတၢၤတၫ် တၫ်ဂ့ၫ်လီၤတံၫ်လီၤဆဲးတဖၣ်တခီ တဲလီၤတံၫ်လီၤဆဲးဃာ်၀ဲတအိၣ်ဘၣ်.
ကီၫ်ပယီၤတကပၤ တၫ်ပာ်ဒ့ၣ်ပာ်ကမၣ်လၢအဂ့ၫ်အကျိၤတအိၣ်တဖၣ်ဒီး တၫ်တၢၣ်ပီၣ်တဲသကိးလၢ မၤသဘံၣ်သဘုၣ် ထံလီၫ်ကီၫ်ပူၤဂ့ၫ်၀ီတဖၣ် ဂ့ၫ်လိာ်ထီဒါ၀ဲဒီးတၫ်ဖံးတၫ်မၤလၢထံကီၫ်မၤ၀ဲတဖၣ် ကဒုးအိၣ်ထီၣ်အမိၫ်လံၤမိၫ်ပှၫ်ဒီးမၤထွဲ၀ဲအဂ့ၫ် သုးကီၣ်မံးရှၢၣ်ထုးထီၣ်ဘိးဘၣ်ရၤလီၤ၀ဲလီၤ.
၂၀၂၅နံၣ်,ဒံၣ်စ့ဘၢၣ်(၂၈)သီနံၤ တၫ်ဃုထၢလၢတၫ်ကမၤ၀ဲတဆီဘၣ်တဆီအံၤအစၢအဖီခိၣ် ထံရူၫ်ကီၫ်သဲးပၣ်တံၣ်လၢ မၤနၢၤတၫ်န့ၣ် တၫ်ကဟ့ၣ်လီၤထံကီၫ်မူဒါတၫ်မၤတဖၣ်အဂ့ၫ်စ့ၫ်ကီး သုးကီၣ်မံးရှၢၣ်တဲ၀ဲလီၤ.
ပယီၤအနီၫ်ကစၫ်တၫ်ဖံးတၫ်မၤလၢ ပယီၤတီခိၣ်ရိၣ်မဲ၀ဲအဖီခိၣ် ကီၫ်ပူၤတၫ်မုာ်တၫ်ခုၣ်,တၫ်အိၣ်ဂၢၫ်ဆိးကျၢၤ, ထံကီၫ် တၫ်အီၣ်ကုၤအီပှဲၤတဖၣ်န့ၣ် ကမၤထွဲကဒီး၀ဲဒီးကဒီသဒၢကမၤဂ့ၤထီၣ် ပှၤကီၫ်ပယီၤဖိတဖၣ်အဂ့ၫ်ခီၣ်ထံးတၫ်ခွဲးတၫ် ယာ်တဖၣ်အဂ့ၫ် သုးကီၣ်မံးရှၢၣ်လၢမၤသံဒုးတ့ၫ်လီၤမ့ၣ်ပိၫ်လၢကမျၢၫ်အဖီခိၣ်ကိးမုၫ်နံၤအံၤတဲ၀ဲန့ၣ်လီၤ.
