လါအီးကထိဘၢၣ် ၁၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကရူၢ်လၢတလူၤပိၥ်မၤထွဲဒီးမၤကမၣ်ထံကီၢ်ဒီဘ့ၣ်တၢ်ပတုၥ်တၢ်ခးတၢ်အၢၣ်လီၤအီလီၤလံၥ်ဃံးဃၥ်အဖီခိၣ်အံၤ ကရဲၣ်ကျဲၤမၤ၀ဲ NCAမုၢ်နံၤဆၢက့ၤ ပှဲၤထီၣ်အနံၣ်(၁၀)မူးတၢ်ရဲၣ်တၢ်ကျဲၤအပူၤ UN, အၣ်စံၣ်ယၣ်ပၣ်ဃုၥ် ဟီၣ်ခိၣ်ဘီမုၢ်မီၢ်သီတဖၣ် သုတလဲၤထီၣ်ဘၣ်ဒီး ကအိၣ်ဂၢၤဆၢထၢၣ်ဒီးထံဖိကီၢ်ဖိကမျၢၢ်အဂီၢ် ကလုၥ်ဒူၣ်တၢ်ပၢၢ်ဆၢကရၢ ၆ဖု ဟ့ၣ်သဆၣ်ထီၣ်၀ဲ ဖဲမဟါအနံၤ လါအီးကထိဘၢၣ် ၁၃သီအနံၤန့ၣ်လီၤ.
NCAလံၥ်ဃံးဃၥ်အပူၤ ကရၢတဖၣ်လၢ အဆဲးလီၤမံၤစဲပနီၣ်တဖၣ်ဒ်အမ့ၢ် ကညီဒီကလုၥ်စၢဖှိၣ်ကရၢ(KNU), ကီၢ်ပယီၤကၠိဖိဒံၣ်မိၣ်ကရံးတံးသုး(ABSDF), တလၢၤကီၢ်သီပၣ်တံၣ်(ဒုးလီၤပှီၢ်သုးမီၤစိရိၤ) (NMSP-AD), ခၠီဒီကလုၥ်သုး (CNF), ပအိးဒီကလုၥ်တၢ်ထူၣ်ဖျဲးကရၢခိၣ်ကျၢၢ်(PNLO), လါဟူးဒံၣ်မိၣ်ကရံးတံးစၢဖှိၣ်ကရၢ(LDU) ကရၢ၆ဖုတဖၣ် ပၥ်ဖှိၣ်ထုးထီၣ်ပၥ်ဖျါ၀ဲ အတၢ်ပၥ်သးဖဲ NCAပှဲၤထီၣ် အနံၣ်(၁၀)အနံၤန့ၣ်လီၤ.
တကးဘၣ် သုးကရူၢ်အံၤ ဖဲလၢမၤဖျါထီၣ် NCAတၢ်မၤအကျဲတၢ်အမိၢ်လံမိၢ်ပှၢ်တဖၣ်အဆၢကတီၢ် ပၢဆှၢဒိၣ်စိဃၥ်၀ဲတၢ်မၤအကျဲတဖၣ်အဖီခိၣ် မၤတံၥ်တၢ် တၢ်မၤဖျါထီၣ် NCAတၢ်အၢၣ်လီၤအီလီၤတဖၣ်ဒီး မၤကမၣ်၀ဲအသိး ၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအဃိ မ့ၢ်တၢ်မၤကမၣ် NCAလံၥ်ဃံးဃၥ် တၢ်အသံးအကၥ်တဖၣ်, ဂံၢ်ခီၣ်ထံးတၢ်မၤအကျဲသနူတဖၣ်ဒီး တၢ်ပညိၣ်တဖၣ်လၢဖျိဖျိဖျါဖျါ၀ံၤ တၢ်မၤဖျါထီၣ် NCAအမိၢ်လံမိၢ်ပှၢ်တဖၣ် အိၣ်ပတုၥ်ကွံၥ်အသးဒီး NCAလံၥ်ဃံးဃၥ်န့ၣ် ကဲထီၣ်က့ၤဒ်သိး စးခိလၢအဟးဂီၤတခါအသိးအဂ့ၢ် စံး၀ဲန့ၣ်လီၤ.
သုးကရူၢ်အံၤ ကရဲၣ်ကျဲၤမၤNCAတၢ်မၤအကျဲသနူန့ၣ်မ့ၢ်ဒၣ်တၢ်ပၥ်မၤအသးလီၤဒီးတၢ်ဃုထၢလၢကရဲၣ်ကျဲၤမၤ၀ဲစ့ၢ်ကီး တမ့ၢ်လၢကဘှါရှဲန့ၢ်ထံကီၢ်တၢ်ဃံးတၢ်စ့ၢ်ဒီးထံဖိကီၢ်ဖိကမျၢၢ်တၢ်နးတၢ်ဖှိၣ်တဖၣ်ဘၣ်ဒီးအိၣ်ဒၣ်တၢ်သဘံၣ်သဘုၣ်တဖၣ်ကယံၤကထၢဒီးကဒိၣ်ထီၣ်ထီထီၣ်လီၤအဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
NCA မုၢ်နံၤဆၢက့ၤပှဲၤထီၣ်အနံၣ်(၁၀)မူးတၢ်ရဲၣ်တၢ်ကျဲၤန့ၣ် တၢ်ကရဲၣ်ကျဲၤမၤအီၤဖဲ ခါလၢကဟဲလါအီးကထိဘၢၣ် ၁၅သီအနံၤတုၤ၁၇သီအနံၤ ဖဲန့ၣ်ပၠံၣ်တီၣ်၀ံၤ ကထၢနုၥ်ရဲၣ်ကျဲၤမၤ၀ဲစ့ၢ်ကီး “ည့ၣ်ခၠါသီ ကီၢ်ပယီၤအနၣ်ကဲးတံၣ်ဆီးခၠ့ အလိးယိၣ်ဆွ့နွ့ပွဲ” ဒီး ခါလၢကဟဲ စးထီၣ်လၢလါဒံၣ်စ့ဘၢၣ် ၂၈သီအနံၤန့ၣ် ကရဲၣ်ကျဲၤမၤ၀ဲ တၢ်ဃုထၢတဖၣ်လၢ အကူၥ်တဖၣ်အသိးအဂ့ၢ် တၢ်သ့ၣ်ညါဘၣ်န့ၣ်လီၤ.
