လါအီးကထိဘၢၣ်(၁၄)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
အမဲရကၤကီၫ်ခိၣ်ဒီနၢၣ်ထရၢးန့ၣ် လၢတရူးပနံာ်တဖၣ်အဖီခိၣ် ကမၤဃံးထီၣ်၀ဲခိသွဲ ၁၀၀မျးကယၤ အတၫ်တဲပျံၤတဲဖုးလၢအလီၫ်ခံကတၢၫ်အဖီခိၣ် တၫ်နီၤဖးလီၤအီၤဒီးတၫ်အဒူၣ်အဆၢခံခါအဂ့ၫ် ပ့ၣ်ကၠ့န့ၣ် ပဲာ်အၢပဲာ်သီ၀ဲ ၀ၣ်ရှ့ၣ်တၢၣ်န့ၣ်လီၤ.
ဒ်အမဲရကၤအတၫ်တဲပျံၤတဲဖုးအသိး မ့ၫ်ဒုးအိၣ်ထီၣ်၀ဲအမိၫ်လံၤမိၫ်ပှၫ်န့ၣ် ကီၫ်တရူးတကပၤ ကခီၣ်ဆၢဟံးန့ၫ်၀ဲဂ့ၫ်၀ီ အဂ့ၫ်တဲ၀ဲလီၤ.
တၫ်အံၤမ့ၫ်ပ့ၣ်ကၠ့ပဒိၣ်အတၫ်မၤလၢကမၤဃံး တၫ်တီၣ်ဆှၢဟီၣ်ခိၣ်လီၤဆီ တၫ်ဘျၢတဖၣ်အဃိ တရၢးဟ့ၣ်ပလီၫ်ဃာ်၀ဲလၢ ကခီၣ်ဆၢက့ၤ၀ဲလၢတၫ်မၤဃံးထီၣ်ခိသွဲန့ၣ်လီၤ.
တကးဘၣ် တရူးတကပၤ ဃုတၫ်အ့ၣ်လိာ်အသိး အဲၣ်ဒိးပၢဆှၢ၀ဲဟီၣ်ခိၣ်တဖျၢၣ်အဂ့ၫ် ထရၢးတဲအါထီၣ်၀ဲလီၤ.
အပူၤကွံာ်တနွံအတီၫ်ပူၤ Smart Phone,SolarဒီးElectronicသိလ့ၣ် ပတီၢ်ထီတၫ်သ့တၫ်ဘၣ်တဖၣ် တၫ်ထုးထီၣ်၀ဲအပူၤ ဟီၣ်ခိၣ်လီၤဆီပာ်ဃုာ် ပနံာ်လၢအဂၤတဖၣ် ကမၤဃံးထီၣ်ခိသွဲအိၣ်အဂ့ၫ် ပ့ၣ်ကၠ့ပဒိၣ်တကပၤ ဘိးဘၣ်ရၤလီၤဃာ်၀ဲလီၤ.
လၢဟီၣ်ခိၣ်ချၢ ဟီၣ်ခိၣ်လီၤဆီ ၉၀မျးကယၤန့ၣ် ထဲဒၣ်ကီၫ်တရူးတဘ့ၣ် မၤကဆှီ၀ဲဒီးထုးထီၣ်၀ဲအဃိ တၫ်ဘၣ်ယိၣ်ဘၣ်ဘှီအိၣ်ထီၣ်၀ဲဒ်သိးအံၤန့ၣ်လီၤ.
အလီၫ်ခံ ထရၢးန့ၣ် “တၫ်ဂ့ၫ်ဒီးတရူးအဖီခိၣ် တဘၣ်ကိၫ်တဂ့ၤ,တၫ်ခဲလၢာ်ကဘၣ်လိာ်ဖိးမံလီၤအဂ့ၫ်”ကွဲးဖျါ၀ဲလၢ ပှၤတ၀ၢပှာ်ဘျးစဲအဖီခိၣ်ဘၣ်ဆၣ် လၢတကပၤ မုာ်ကျိၤ၀ဲၤကွာ်တၫ်ဒုးကကဲထီၣ်ကဒါက့ၤ၀ဲတၫ်အိၣ်သးဆူၣ်ထီၣ်၀ဲန့ၣ်လီၤ.
“ကီၫ်ခိၣ်ရှံၣ်လၢပှၤအါဂၤပာ်ကဲဘၣ်အံၤ ကွၫ်ဆၢၣ်မဲာ်ဘၣ်ဒီးတၫ်အိၣ်သးလၢတကြၢးတဘၣ်တခါလီၤ.အထံအကီၫ် အဂီၫ် တအဲၣ်ဒိးလၢမုာ်ကျိၤ၀ဲၤကွာ်ကဘၣ်ဒိအသိး,ယၤစ့ၫ်ကီးတသးလီဘၣ်.အမဲရကၤန့ၣ် အဲၣ်ဒိးမၤစၢၤတရူး လီၤ.တအဲၣ်ဒိးမၤဘၣ်ဒိ၀ဲဘၣ်”အဂ့ၫ် ထရၢးပာ်ဖျါ၀ဲလၢပှၤတ၀ၢပှာ်ဘျးစဲအပူၤန့ၣ်လီၤ.
တရူးတၫ်ကူၣ်လဲၫ်မၤကၤမုာ်ကျိၤ၀ဲၤကွာ်ကိတိာ်၀ဲၤကျိၤအပှၤတဲတၫ်ပၢတဂၤတခီ”ဘၣ်ထွဲခိသွဲတၫ်ဒုး တၫ်အိၣ်ဆၢထၢၣ်န့ၣ် တဆီတလဲအသးနီတဘျီဘၣ်.တၫ်တဖၣ်အံၤန့ၣ်ပတသးလီဘၣ်.ဘၣ်ဆၣ်မ့ၫ်ကဲထီၣ်ဘၣ်ဖုးန့ၣ် တမ့ၫ်ပကပျံၤဘၣ်အဂ့ၫ်”တဲ၀ဲန့ၣ်လီၤ.
ထံကီၫ်ခံဘ့ၣ်အဘၢၣ်စၢၤ တဲဆၢလိာ်သးကဒဲကဒဲဒ်သိးအံၤန့ၣ် ဖဲတၫ်တၢၣ်ပီၣ်တဲသကိးတၫ်ကူၣ်လဲၫ်မၤကၤ လၢအသီတဖၣ်အဆၢကတီၫ် အိၣ်ဒၣ်ထဲနီၫ်ကစၫ်တကပၤ အတၫ်အိၣ်ဆၢထၢၣ် ကန့ၫ်ဘျူးအဂီၫ် မၤ၀ဲလီၤအဂ့ၫ် တၫ်ပဲာ်ထံနီၤဖး၀ဲလီၤ.
တၫ်အဃိ တလါအံၤအပူၤ လၢကလံၤထံးကီၫ်ခိၣ်ရံယါအပူၤ တၫ်ကမၤ၀ဲ APECပတီၫ်ထီတၫ်အိၣ်ဖှိၣ်အပူၤ ထရၢးဒီးရှံၣ်အဘၢၣ်စၢၤ တၫ်ကထံၣ်လိာ်သးတၫ်ဂ့ၫ်စ့ၫ်ကီး တၫ်အိၣ်သးအိၣ်ထီၣ်လၢဘၣ်ကလီၤတံၫ်ဒံးဧါန့ၣ်လီၤ.
