လါအီးကထိဘၢၣ် ၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၢ်ရ့ၣ်ဘျံးဒဝဲၢ်, ထံမိၢ်ပှၢ်ဟီၣ်ကဝီၤ, မဲၢ်သမံၢ်ခံ(ထံခံ)သဝီအပူၤ ဖဲ ၂၀၂၅နံၣ် လါအီးကထိဘၢၣ်(၈)သီ ဂီၤ(၉း၁၀)နၣ်ရံၣ်အဆၢကတီၢ် သုးမီၤစိရိၤ ကဘီယူၤ Y12 ဟဲတ့ၢ်လီၤမ့ၣ်ပိၢ် အဘျီ(၁၀) တ့ၢ်လီၤမ့ၣ်ပိၢ်(၄၀)ဘျဲၣ်အဂ့ၢ် KNU-ဘျံးဒ၀ဲၢ်ကီၢ်ရ့ၣ် ပၥ်ဖျါဃၥ်၀ဲ တၢ်ကစီၣ်န့ၣ်လီၤ.
လၢန့ၣ်အမဲၥ်ညါ ဟါခီ (၂း၀၀)နၣ်ရံၣ် အဆၢကတီၢ် သုးမီၤစိရိၤ ကဘီယူၤ (Jet fighter) ဟဲတ့ၢ်လီၤကဒိးမ့ၣ်ပိၢ် အဃိ ဘၣ်ဒိကမျၢၢ် တၢ်သူၣ်ထီၣ်တနီၤ ဒီး ကမျၢၢ် (၃၅၀) ဘျဲၣ် ဘၣ်ဃ့ၢ်မှံၤဟးဖျိးအဂ့ၢ် စံး၀ဲန့ၣ်လီၤ.
သုးကရူၢ်အံၤ အတၢ်ဟဲတ့ၢ်လီၤမ့ၣ်ပိၢ်အပူၤ ကမျၢၢ်အိၣ်ဟံၣ်ဃီတဖၣ်, တၢ်ဖိတၢ်လံၤတဖၣ်ဒီး သ၀ီအပူၤအိၣ် တၢ်သူၣ်ထီၣ်တဖၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိသုးကရူၢ်အံၤ လဲၤတ့ၢ်လီၤမ့ၣ်ပိၢ်အဃိ ကမျၢၢ်လၢအိၣ်ဖဲန့ၣ်တဖၣ် ဘၣ်လဲၤဃ့ၢ်ပူၤဖျဲးသးဆူ ကၠီၣ်တဲၣ်-ပယီၤကီၢ်ဆၢတြဲၤအကပၤအဂ့ၢ်ဒီး ကၠီၣ်တဲၣ်သုးမုၢ်ဒိၣ်စ့ၢ်ကီး ပၥ်လီၤ၀ဲတၢ်ဘံၣ်တၢ်ဘၢတဖၣ် ဖဲကီၢ်ဆၢတြဲၤ၀ံၤ တပျဲနုၥ်လီၤ၀ဲ ကမျၢၢ်တဖၣ်ဆူကၠီၣ်တဲၣ်တပၤဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါယူၤအတီၢ်ပူၤ KNLA ဒီး PDF သုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲ ကၠီၣ်တဲၣ်-ပယီၤကီၢ်ဆၢ ထံထၣ်သုးတၢ်တိၥ်ကူၣ်ကျဲၤသုးကလၢၤ, ထံခံသုးကလၢၤ, ဘီဒံၣ်သုးကလၢၤဒီး ငယးနံၣ်သုးကလၢၤ, သုးခးသုးကလၢၤပၣ်ဃုၥ် သုးကလၢၤ ၅ဖျၢၣ်န့ၣ်လီၤ.
ကတီၢ်ခဲအံၤ ခ့ၣ်အဲၣ်ယူၣ်-ဘျံးဒ၀ဲၢ်ကီၢ်ရ့ၣ်, ကီၢ်ဆၢဟီၣ်က၀ီၤအပူၤ သုးကီၣ်ကးသုးကလၢၤအိၣ်တ့ၢ်ဒၣ်ထဲ နးအ့းတီၣ်သုးကလၢၤတဖျၢၣ်လီၤဒီး ဖဲသုးကလၢၤအပူၤစ့ၢ်ကီး ပှၤသုးဖိဂံၢ်ဘါအိၣ်ဒၣ်ဖဲ ၃၀ဒီး၅၀အဘၢၣ်စၢၤလီၤ၀ံၤ တၢ်မ့ၢ်ထီၣ်ဒုးမၤန့ၢ်လံန့ၣ် ဘျံးဒ၀ဲၢ်ကီၢ်ရ့ၣ်, ကၠီၣ်တဲၣ်-ကီၢ်သူလ့ၤကီၢ်ဆၢဒီတကျိၤအံၤ KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် ကဒုးမၤန့ၣ်ပၢဆှၢ၀ဲန့ၣ်လီၤ.
