လါအီးကထိဘၢၣ် ၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ပကိကီၢ်ခီ, အိးတွ့ကီၢ်ဆၣ်, ညီၣ်ခၠ့ၣ်ထီး၀့ၢ်ပူၤ ခီဖျိကစၢၢ်ထံလီၤဒီး ထံဒိၣ်သတူၢ်ကလၥ်ဒီး ထံနုၥ်လီၤ၀ဲလၢတၢ်ဆါဟံၣ်အပူၤအဃိ ပှၤဆါတဖၣ်လၢဟဲဒိးကူစါယါဘျါသး ၂၀ဘျဲၣ်အံၤ ဂ့ၢ်ဂီၤအူဘၣ်သုးကွံၥ်အီၤအဂ့ၢ် တၢ်သ့ၣ်ညါဘၣ်လၢ ပှၤတ၀ၢတၢ်မၤစၢၤကရၢတဖၣ်အအိၣ်န့ၣ်လီၤ.
ခီဖျိမူခိၣ်စူၤဒိၣ်အဃိ ကစၢၢ်ထံလီၤ၀ံၤ ဖဲလါစဲးပထ့ဘၢၣ် ၃၀သီအနံၤ, ဂီၤအဆၢကတီၢ်န့ၣ် ထံဟဲဒိၣ်ထီၣ်၀ဲလၢ သတူၢ်ကလၥ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ထံဒိၣ်ထီၣ်လၢသတူၢ်ကလၥ်၀ံၤ တၢ်ဆါဟံၣ်အပူၤ ထံထီၣ်တုၤလၢယီၢ်ဒ့အဖီခိၣ်လီၤ. ကထီၣ်တုၤလၢ ပှၤဆါလီၢ်မံခိၣ်တၢ်အိၣ်သးလီၤ. အဃိဘၣ်သုးကွံၥ်လၢ ဂ့ၢ်ဂီၤအူအပူၤလီၤ. ချံတဖၣ်တခီနုၥ်လီၤ၀ဲတန့ၢ်ဘၣ်. ချံတဖၣ်ဘၣ်နီအီၤလၢနီၢ်ကစၢ်ဒီး ဘၣ်လဲၤမၤပူၤဖျဲးထီၣ်၀ဲလီၤ. အ၀ဲန့ၣ် တဲးနဲၣ်တၢ်ဆါဟံၣ်မီၤ. ပၠီၣ်သ့ၣ်ခၠီမီၤ. တုၤခဲအံၤန့ၣ် မူခိၣ်စူၤဒံးအဖၢမုၢ်လီၤ.”အဂ့ၢ် အိးတွ့ကီၢ်ဆၣ်, ယ့ၣ်ခိၣ်သၣ်ရှ့ၣ်ယ့ပှၤတ၀ၢတၢ်မၤစၢၤကရၢ သီခါဒိၣ်စံး၀ဲန့ၣ်လီၤ.
ကတီၢ်ခဲအံၤ ပှၤဆါလၢဘၣ်တၢ်မၤပူၤဖျဲးထီၣ်အီၤဖဲ ညီၣ်ခၠ့ၣ်ထီးတၢ်ဆါဟံၣ်ပူၤတဖၣ် ဘၣ်လဲၤဆှၢအီၤဆူ ကွှဲပွဲတဲးနဲၣ်တၢ်ဆါဟံၣ်၀ံၤ ဘၣ်ကူစါယါဘျါအီၤအဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဆါဟံၣ်ကရၢၢ်အပူၤ ကသံၣ်ပှၤမၤတၢ်ဖိအဟံၣ်တဖၣ်စ့ၢ်ကီး ထံလုၢ်ဘၢကွံၥ်၀ဲလီၤ. ထံဒိၣ်လၢသတူၢ်ကလၥ်ပူၤအဃိ တၢ်ဘၣ်ဒိဘၣ်ထံးဒီးတၢ်ဟးဂူၥ်ဟးဂီၤအိၣ်ထီၣ်၀ဲအဖၢမုၢ်လီၤ. ကသံၣ်သရၣ်ဒိၣ်တဖၣ်စ့ၢ်ကီး မၤ၀ဲအဂ့ၢ်” လီၢ်က၀ီၤဖိတဖၣ်စံး၀ဲန့ၣ်လီၤ.
ကတီၢ်ခဲအံၤန့ၣ် ထံထီၣ်တလၢ ညီၣ်ခၠံးထီးကီၢ်ဆၣ်အပူၤ သိလ့ၣ်ကျဲမုၢ်အဖီခိၣ်စ့ၢ်ကီး၀ံၤ တၢ်ဆါဟံၣ်ကရၢၢ်အပူၤ ထံတဖၣ်တလီၤဒံးအဂ့ၢ် တၢ်သ့ၣ်ညါဘၣ်န့ၣ်လီၤ.
