လါအီးကထိဘၢၣ် ၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်အသုးလၢ ဟဲနုၥ်လီၤသုးကျိၤ ဖဲခ့ၣ်အဲၣ်ယူၣ်-ကီၢ်ရ့ၣ်ဘျံးဒဝဲၢ်, ကီၢ်ဆၣ်ကစၢၢ်ဒိၣ်, စီဃ့တိၢ်ပြိးဟီၣ်ကဝီၤအပူၤအံၤ KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ခိးဒုးအီၤအဃိ ဘၣ်ဒိ၀ဲနးအဂ့ၢ် ခ့ၣ်အဲၣ်ယူၣ်-ဘျံး-ဒ၀ဲၢ်ကီၢ်ရ့ၣ် နဲၣ်ရွဲၣ်စံး၀ဲန့ၣ်လီၤ.
ဖဲ ၂၀၂၅နံၣ် လါစဲးပထ့ဘၢၣ်(၃၀)သီအနံၤ ဂီၤ(၇း၀၀)နၣ်ရံၣ်အဆၢကတီၢ် ပယီၤသုးမီၤစိရိၤ အသုးရ့ၣ်(၄၀၃), (၄၀၄), (၄၀၅) သုးရ့ၣ်(၃)ရ့ၣ်ပာ်ဖှိၣ် အသုးကျိၤ အအိၣ်လၢ သယဲးခၠီဝ့ၢ် ဟဲထီၣ်ထိသုးကျိၤဆူ စီဃ့တိၢ်ပြိးဟီၣ်ကဝီၤအပူၤအဆၢကတီၢ် တၢ်ဒုးကဲထီၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် သုးက့နီၢ်ဂံၢ်(၄), သုးရ့ၣ်(၁၂)ဒီး တၢ်ပၢၢ်ဆၢအသိၣ်မှံၤတဖၣ်န့ၣ်လီၤ.
ခံခီခံကပၤတၢ်ဘၣ်သဂၢၢ်ခးလိၥ်သးအပူၤသုးကရူၢ်တပၤသံဒီးဘၣ်ဒိအိၣ်အါဘၣ်ဆၣ်တၢ်တသ့ၣ်ညါဘၣ်လီၤတံၢ်လီၤဆဲးဘၣ်အဂ့ၢ်စံး၀ဲန့ၣ်လီၤ.၀ံၤအလီၢ်ခံသုးမီၤစိရိအသုးကျိၤအံၤဒွဲၣ်အူကၠီးလ့ၣ်ကါ(ကျောက်လှေကား)သဝီဖိအဟံၣ် (၇၃)ဖျၢၣ် လၢအတဘၣ်ဃးဒီးသုးဂ့ၢ်ဝီတၢ်ခးပနီၣ်ဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“သ၀ီလၢအိၣ်ဖဲတၢ်လီၢ်ဖဲန့ၣ်တဖၣ် ဒွဲၣ်အူ၀ဲလီၤ. အပူၤကွံၥ်စ့ၢ်ကီး ဒွဲၣ်အူ၀ဲလီၤ. အခဲအံၤစ့ၢ်ကီး ဒွဲၣ်အူကဒီး၀ဲသ၀ီအသီတဖျၢၣ်လီၤ. သ၀ီတနီၤန့ၣ် တဘၣ်ဃးဒီးသုးဂ့ၢ်၀ီတၢ်ခးပနီၣ်သနၥ်က့ အ၀ဲသ့ၣ်ဒွဲၣ်အူ၀ဲလီၤ. တၢ်ဘၣ်သဂၢၢ်ခးလိၥ်သးအပူၤ အ၀ဲသ့ၣ်တပၤ သံဒီးဘၣ်ဒိတဖၣ်အိၣ်၀ဲလီၤ. ဘၣ်ဆၣ်ဒီး တၢ်တသ့ၣ်ညါဘၣ်လီၤတံၢ်လီၤဆဲးဘၣ်အဂ့ၢ်” ခ့ၣ်အဲၣ်ယူၣ်-ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤ.
လါစဲးပထ့ဘၢၣ် ၂၄သီအနံၤစ့ၢ်ကီး သုးကီၣ်မံးရှၢၣ်အသုး ခလရ-၂၈၅ ခးလီၤ၀ဲကျိဖးဒိၣ် ဆူ ဘျဲး-ဒ၀ဲၢ်ကီၢ်ရ့ၣ်, လၢၢ်မုၢ်လါကီၢ်ဆၣ်, ပလီၢ်ကရူၢ်, က၀ဲးသ၀ီပူၤအဃိ ကမျၢၢ်ပိၥ်မုၣ်လၢ သးနံၣ် ၆၀အိၣ်တဂၤ ဘၣ်ဒိ၀ဲ၀ံၤ ဟံၣ်တဖျၢၣ်စ့ၢ်ကီး ဘၣ်ဟးဂီၤကွံၥ်၀ဲန့ၣ်လီၤ.
