လါစဲးပထ့ဘၢၣ် ၂၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကရ့ၣ်နံၣ်, ပကိဒီး မကွ့ကီၢ်ခီတဖၣ်အပူၤအိၣ် ကီၢ်ဆၣ်၄ဘ့ၣ်အပူၤ ခီဖျိမူခိၣ်စူၤဒိၣ်အဃိ ထံကျိတဖၣ်အပူၤ ထံဒိၣ်နိယွၤ၀ံၤ က၀ီၤဒ့ဒီး သ၀ီတဖၣ်အပူၤထံနုၥ်လီၤ၀ဲအဂ့ၢ် တၢ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤ.
ကီၢ်ကရ့ၣ်နံၣ်, လွဲၢ်ကီၢ်၀့ၢ်အပူၤ မူခိၣ်စူၤဒိၣ်၀ံၤ ဘလူခၠီထံဒိၣ်ထီၣ်အဃိ စးထီၣ်ဖဲအပူၤကွံၥ် လါစဲးပထ့ဘၢၣ် ၂၅သီအနံၤန့ၣ် ဘလူခၠီထံကျိဒီတကျိၤဒီးနထးစ့ပၣ်ဃုၥ် လွဲၢ်ကီၢ်၀့ၢ်အလီၤဖုၣ်လီၢ်က၀ီၤတနီၤအပူၤ ထံဒိၣ်နိယွၤ၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
“ထံနုၥ်လီၤ၀ဲန့ၣ် ဖးယံၤဖိလံ. တၢ်လီၢ်တနီၤအပူၤန့ၣ် ထံထီၣ်တုၤခီၣ်ဒုၣ်သၣ်ညါလီၤ. တၢ်လီၢ်တနီၤအပူၤတခီ ထီၣ်တုၤလၢခီၣ်ကံၢ်ဒုၣ်လီၤ. နထးစ့ဟီၣ်ခိၣ်လီၤဘံးတပၤတခီ ထံစးထီၣ်နုၥ်လီၤလံ”အဂ့ၢ် လွဲၢ်ကီၢ်လီၢ်က၀ီၤဖိတဂၤ စံး၀ဲန့ၣ်လီၤ.
ဒ်န့ၣ်အသိး ဖဲပကိ, တီအူဒီး မးဒီး၀့ၢ်တဖၣ်အပူၤစ့ၢ်ကီး က၀ီၤဒ့ဒီး ဒူသ၀ီတဖၣ်လၢ အဘူးဒီး ထံကျိဒီးပရဲလိၥ်ကျိတဖၣ်အပူၤ ထံနုၥ်လီၤ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. မူခိၣ်ကလံၤသီၣ်ဂီၤ၀ဲၤကျိၤ အလါစဲးပထ့ဘၢၣ် ၂၈သီအနံၤ, မုၢ်ထူၣ်၁၂နၣ်ရံၣ် တၢ်ထိၣ်ဒွးအဖီခိၣ် ပရဲလိၥ်ကျိထံန့ၣ် ထီၣ်တလၢကွံၥ်တုၤလၢ တီအူဒီးမဒီး၀့ၢ် ထံတၢ်လီၤဘၣ်ယိၣ်ပနီၣ်၀ံၤ လၢကဟဲ ၂၄နၣ်ရံၣ်အတီၢ်ပူၤစ့ၢ်ကီဒီး ထံတဖၣ်ကဆဲးထီၣ်ကဒီး၀ဲအဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
“ကစၢၢ်ထံတဖၣ် ဟဲလီၤ၀ဲအဃိ ပရဲလိၥ်ကျိထံတဖၣ်ဟဲထီၣ်၀ဲလီၤ. တၢ်န့ၣ်အဃိ ထံကျိတဖၣ် ထံဒိၣ်ထီၣ်၀ဲလီၤ. က၀ီၤဒ့ ၁၀ မၠ့းကၠံပီးဒီး ကၠဲးရှၣ်စိတဖၣ်အပူၤ ထံနုၥ်လီၤ၀ဲလီၤ. တနံၤအံၤ မုၢ်ထူၣ်တၢ်ထိၣ်ဒွးအဖီခိၣ်န့ၣ် အိၣ်၀ဲ ၆၁၄စ့ၣ်တံၣ်မံၣ်တၣ်လီၤ. တလၢကွံၥ် ၁၄စ့ၣ်တံၣ်မံၣ်တၣ်”အဂ့ၢ် တီအူဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
မကွ့ကီၢ်ခီ, နးမီး၀့ၢ်စ့က၀ီၤဒ့ဒီး အီၣ်ဆါက၀ီၤဒ့တဖၣ်အပူၤစ့ၢ်ကီး မူခိၣ်စူၤဒိၣ်အဃိ ထံကျိတဖၣ်အပူၤ ထံဒိၣ်နိယွၤ၀ဲအဂ့ၢ် တၢ်သ့ၣ်ညါဘၣ်လၢ တၢ်မၤပံၥ်မ့ၣ်အူကရၢ အတၢ်ကစီၣ်တၢ်ပၥ်ဖျါအဖီခိၣ်န့ၣ်လီၤ.
မူခိၣ်ကလံၤသီၣ်ဂီၤအတၢ်ထုးထီၣ်ပၥ်ဖျါအဖီခိၣ် တနံၤအံၤ လါစဲးပထ့ဘၢၣ် ၂၉သီအနံၤန့ၣ်, ကီၢ်ကရ့ၣ်နံၣ်, တၢ်လီၢ်ကီးတီၤဒဲး, မကွ့ကီၢ်ခီအပူၤ တၢ်လီၢ်သကုးဒီး ပကိကီၢ်ခီအပူၤ တၢ်လီၢ်ပူၤတီၤပူၤတီၤ မူခိၣ်ကစူၤဒိၣ်၀ဲအဂ့ၢ်ဒီး မူခိၣ်ကစူၤမျးကယၤပှဲၤပှဲၤအဂ့ၢ် ပၥ်ဖျါဃၥ်၀ဲန့ၣ်လီၤ.
တဲၣ်ဖိကလံၤမုၢ်” ဘူၣ်အလွဲၢ်” လၢ အကဲထီၣ်သး ဖဲကလံၤထံးတရူးပီၣ်လဲၣ်န့ၣ် လဲၤသုးအသးဆူ မုၢ်နုၥ်ဒီး မုၢ်နုၥ်ကလံၤစိးတပၤ၀ံၤ ကီၢ်ဘံးယဲးနၣ်, ဒၣ်နါ၀့ၢ် ကလံၤစိး-မုၢ်ထီၣ်ကလံၤစိးတပၤ ထံမံၤလၤ ၄၀မံၤလၤ, ဘ့း၀့ၢ် မုၢ်ထီၣ်တပၤ ထံမံၤလၤ ၂၁၀မံၤလၤဃၣ်ဃၣ် ပညိၣ်လီၤဆူ ပီၣ်လဲၣ်တပၤအဂ့ၢ် မူခိၣ်ကလံၤသီၣ်ဂီၤ ပၥ်ဖျါဃၥ်၀ဲန့ၣ်လီၤ.
ကလံၤမုၢ်လၢအိၣ်တ့ၢ်တဖၣ်ဒီး လါစဲးပထ့ဘၢၣ် ၃၀သီအနံၤ ကလံၤသ၀ံလၢကကဲထီၣ်သးဖဲ ကးပလံၣ်ကလံၤစိးတပၤအံၤ ကလဲၤသုးအသးဆူ ဘ့ကလါပီၣ်လဲၣ်တပၤ၀ံၤ ကလံၤအသဟီၣ်တဖၣ်န့ၣ် ခါလၢကဟဲ လါအီကထိဘၢၣ် ၅သီအနံၤ, မကွ့ကီၢ်ခီအပူၤ မူခိၣ်ကစူၤ၀ဲစှၤဘၣ်ဆၣ် တၢ်လီၢ်ပူၤတီးပူၤတီၤအပူၤတခီ မူခိၣ်ကစူၤဒိၣ်၀ဲအဂ့ၢ်, ပကိ, ကရ့ၣ်နံၣ်ပၣ်ဃုၥ် ကီၢ်ခီဒီးကီၢ်စဲၣ်လၢ အိၣ်တ့ၢ် ၁၃ဘ့ၣ်အပူၤ မူခိၣ်ကစူၤဒိၣ်၀ဲတုၤ ၄စုၢ်မုၢ်တုၤ ၈စုၢ်မုၢ်အဂ့ၢ် ပှၤဃိထံၣ်သ့ၣ်ညါ မူခိၣ်ကလံၤသီၣ်ဂီၤ အူ၀့နၢၤ ပၥ်ဖျါဃၥ်၀ဲလၢ အပှၤတ၀ၢလံၥ်ကဘျံးပၤအဖီခိၣ်န့ၣ်လီၤ.
