လါစဲးပထ့ဘၢၣ်(၂၉)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
တၫ်မုာ်တၫ်ခုၣ်ဒီးဟီၣ်က၀ီၤတၫ်အိၣ်ဂၢၫ်ဆိးကျၢၤအဂီၫ်၀ံၤ ကညီဖီၣ်စုက၀ဲၤ(၃)ဖု အတၫ်ထံၣ်လိာ်သးန့ၣ် မၤ၀ဲဖဲလါစဲးပထ့ဘၢၣ်(၂၈)သီအနံၤ ဖဲရၤမတံ,သ့ၣ်ကတံာ်သ၀ီန့ၣ်လီၤ.
တၫ်တၢၣ်ပီၣ်တဲသကိးတၫ်တဘျီအံၤ ကညီသုးခိးကီၫ်ဆၢ(BGF),ကညီတၫ်မုာ်တၫ်ခုၣ်ကီၣ်ကး(KNU/KNLA PC),ဒံၣ်မိၣ်ကရ့ၣ်စံၣ်ဘၣ်ဘျူးကညီသုးမုၫ်ဒိၣ်(DKBA)ခိၣ်နၫ်ဒိၣ်ထီတဖၣ် ဟဲထီၣ်၀ဲန့ၣ်လီၤ.
တၫ်ထံၣ်လိာ်သးန့ၣ် ဘၣ်တၫ်မၤ၀ဲဖဲBGFနီၫ်ဂံၫ်(၂)သုးဟီၣ်က၀ီၤ၀ဲၤလီၫ်ခိၣ်သ့ၣ် သ့ၣ်ကတံာ်သ၀ီန့ၣ်လီၤ.
ကညီသုးခိးကီၫ်ဆၢ(BGF)တကပၤ သုးခိၣ်ကျၢၫ်ဂီၫ်ဂ့ၫ် စီၤခၠံးသူၣ်,သုးခိၣ်ကျၢၫ်ဖိ စီၤတ့ၣ်၀့,သုးခိၣ်ကျၢၫ်ဖိ စီၤမိးသိၣ်, ကညီတၫ်မုာ်တၫ်ခုၣ်ကီၣ်ကး(KNU/KNLA PC)တကပၤ ပှၤပၢၤလီၫ်ဆ့ၣ်နီၤ(၂)ဒီးကထၢၣ် နီၫ်ကပီၤထူ,ဒံၣ်မိၣ်ကရ့ၣ်စံၣ် ဘၣ်ဘျူးကညီသုးမုၫ်ဒိၣ်(DKBA)တကပၤ သုးရိၣ်မဲခိၣ်ကျၢၫ် သုးခိၣ်ကျၢၫ်ဂီၫ်ဂ့ၫ် စီၤစတံ,သုးခိၣ်ကျၢၫ်ဂီၫ်ဂ့ၫ် စီၤဆါ အီၣ်ခိၣ်နၫ်တဖၣ်ပာ်ဃုာ် သုးခိၣ်နၫ်ဒိၣ်ထီတဖၣ် ဟဲထီၣ်၀ဲန့ၣ်လီၤ.
ကညီသုးခိးကီၫ်ဆၢ(BGF)ဒီးဒံၣ်မိၣ်ကရ့ၣ်စံၣ်ဘၣ်ဘျူးကညီသုးမုၫ်ဒိၣ်(BKBA)ကရၢလၢဟဲထီၣ်တၫ်ထံၣ်လိာ်တဲသကိးအံၤတခီ တၫ်ဃုထၢလၢသုးကီၣ်ကးကမၤ၀ဲန့ၣ် ကမၤစၢၤဆီၣ်ထွဲ၀ဲအဂ့ၫ် ထုးထီၣ်ဘိးဘၣ်ရၤလီၤ၀ဲလၢဖိးသဲစး အပူၤန့ၣ်လီၤ.
လၢရၤမတံကလံၤစိး,သ့ၣ်ကတ့ၣ်သ၀ီအပူၤ ဖဲကညီဖီၣ်စုက၀ဲၤ(၃)ဖု ထံၣ်လိာ်တဲသကိးတၫ်လၢတၫ်မုာ်တၫ်ခုၣ်အဂီၫ် အကတီၫ် လၢကတီၫ်အံၤ ရၤမတံကလံၤထံး ၀့ၫ်လ့က့ၣ်ကိာ်အကပၤ သုးခီၣ်မံးရှၢၣ်အသုးလၢဟဲထီၣ်သုးကျိၤဒီးKNLA တၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ တၫ်ဒုးဆူၣ်၀ဲန့ၣ်လီၤ.
