လါစဲးပထ့ဘၢၣ် ၂၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ရၢၢ်ခၢၣ်ကီၢ်စဲၣ်အပူၤ သၣ်တွဲ၀့ၢ်လၢ AAထီၣ်ဒုးမၤန့ၢ်ဃၥ်၀ဲ က၀ီၤဒ့တဖၣ်အပူၤ တၢ်ဒုးကဲထီၣ်သးတအိၣ်ဘၣ်ဒီး သုးကီၣ်မံးရှၢၣ် ဟဲဒုးတ့ၢ်လီၤ ပီၣ်၅၀၀မ့ၣ်ပိၢ်လၢကဘီယူၤအဃိ ကမျၢၢ်သံ၁ဂၤ၀ံၤ ဖိသၣ်လၢသးနံၣ်အိၣ် ၆နံၣ်ပၣ်ဃုၥ် ကမျၢၢ် ၅ဂၤဘၣ်ဒိ၀ဲအဂ့ၢ် လီၢ်က၀ီၤဖိတဲ၀ဲအဖီခိၣ်ဒီး Arakan Princess Mediaတၢ်ကစီၣ်သန့ပၥ်ဖျါဃၥ်၀ဲ အဖီခိၣ်တၢ်သ့ၣ်ညါဘၣ်န့ၣ်လီၤ.
လါစဲးပထ့ဘၢၣ် ၂၇သီအနံၤ, ဟါ (၈း၂၇)နၣ်ရံၣ်ဃၣ်ဃၣ်အဆၢကတီၣ် သုးကီၣ်မံးရှၢၣ်အသုးန့ၣ် တၢ်ဒုးကဲထီၣ်သးတအိၣ်ဘၣ်ဒီး ဟဲတ့ၢ်လီၤ ပီၣ်၅၀၀မ့ၣ်ပိၢ် ၂ဖျၢၣ်ဆူ သၣ်တွဲ၀့ၢ်, နီၣ်ဂံၢ် ၄က၀ီၤဒ့တဖၣ်အပူၤအဂ့ၢ်, ခီဖျိမ့ၣ်ပိၢ်ပိၥ်ဖးထီၣ်အဃိ နီၣ်ဂံၢ် ၄က၀ီၤဒ့အပူၤအိၣ် အူညံၣ်ညံၣ် သံ၀ဲ၀ံၤ မီၣ်သးစ့ၣ်ဖၠိ သးနံၣ် ၆နံၣ်, သးနံၣ် ၁၄နံၣ်အိၣ် မီၣ်အီၣ်သံၣ်ဟးစိ, သးနံၣ် ၃၇နံၣ်အိၣ် ဒီၣ်ခ့ၣ်ခ့ၣ်ထ့, သးနံၣ် ၅၃နံၣ်အိၣ် ဒီၣ်ခ့ၣ်ထွ့ဒီး သးနံၣ် ၄၂နံၣ်အိၣ် အူထိနၢၤမ့ တဖၣ် ဘၣ်ဒိဘၣ်ထံး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ဟဲတ့ၢ်လီၤမ့ၣ်ပိၢ်လၢ ကဘီယူၤဒုးသုး ၂ဘျီညါလီၤ. ဖိသၣ်န့ၣ် ဘၣ်ဒိ၀ဲဆူၣ်မးလီၤ. သုးကီၣ်မံးရှၢၣ် အကဘီတဖၣ်ဒီးဒြိတဖၣ် ကွၢ်ဟုၣ်ကွၢ်စုၥ်လၢအယံၤအိၣ်၀ဲလီၤ.ဟဲတ့ၢ်လီၤမ့ၣ်ပိၢ်လၢ ကဘီယူၤစ့ၢ်ကီးန့ၣ် ဟဲတ့ၢ်လီၤ၀ဲအဆၢကတီၢ်ဒီး လီၤတဲၥ်ပိၥ်ဖးအဆၢကတီၢ်န့ၣ် တယံၤအါအါဘၣ်. တၢ်ဆၢကတီၢ်တအိၣ်လၢ နကဘၣ်ဃ့ၢ်ပူၤဖျဲးဘၣ်”အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
ခီဖျိ သုးကီၣ်မံးရှၢၣ်အသုး ဟဲတ့ၢ်လီၤမ့ၣ်ပိၢ်တဖၣ်အဃိ ဟံၣ်ဃီတဖၣ်ဘၣ်ဟးဂီၤကွံၥ်၀ဲ၀ံၤ ပှၤလၢဘၣ်ဒိဘၣ်ထံးတဖၣ်တခီ ဘၣ်လဲၤကူစါယါဘါအသးအဂ့ၢ် တၢ်သ့ၣ်ညါဘၣ်န့ၣ်လီၤ.
