လါစဲးပထ့ဘၢၣ် ၁၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဘၣ်ဂံၥ်ဂူၥ်ကဲထီၣ်လၢ ခၣ်ဘီဒံယါဒီးကၠီၣ်တဲၣ်အဘၢၣ်စၢၤ ကီၢ်ဆၢဒီတကျိၤအပူၤ ကၠီၣ်တဲၣ်သုးမုၢ်ဒိၣ် စူးကါ၀ဲ ရီဘၢၣ်ကျိချံတဖၣ်, မဲၥ်ထံမ့ၣ်ပိၢ်တဖၣ်၀ံၤ ခး၀ဲအဂ့ၢ် ကၠီၣ်တဲၣ်သုးမုၢ်ဒိၣ်ပၥ်ဖျါဃၥ်၀ဲန့ၣ်လီၤ.
တၢ်ဂ့ၢ်လၢအကဲထီၣ်သးခဲအံၤန့ၣ် အပူၤကွံၥ်လါယူၤလံအတီၢ်ပူၤ ပှၤဘၣ်သံတ့ၢ်၀ဲ ကီၢ်ဆၢတၢ်ဘၣ်ဂံၥ်ဂူၥ်ကဲထီၣ်တ့ၢ်၀ဲအ၀ံၤ မ့ၢ်၀ဲတၢ်ဖ့ၣ်ဆၢအဒိၣ်ကတၢၢ်တခါအဂ့ၢ် တၢ်ကစီၣ်စံး၀ဲန့ၣ်လီၤ.
အခဲအံၤတၢ်သဘံၣ်သဘုၣ်အပူၤ ခၣ်ဘီဒံယါအထံဖိကီၢ်ဖိ ဘၣ်ဒိ၀ဲတစှၤန့ၢ် ၂၃ဂၤအဂ့ၢ် ခၣ်ဘီဒံယါပှၤဘၣ်မူဘၣ်ဒါတဖၣ် တဲ၀ဲအသိး သုးလီၢ်လၤအိၣ်တနီၤ ဘၣ်ဒိ၀ဲအဂ့ၢ်စ့ၢ်ကီး ကၠီၣ်တဲၣ်သုးမုၢ်ဒိၣ် ထုးထီၣ်ပၥ်ဖျါဃၥ်၀ဲန့ၣ်လီၤ.
ဖဲအပူၤကွံၥ်လါအတီၢ်ပူၤန့ၣ် ကၠီၣ်တဲၣ်ပှၤဘၣ်မူဘၣ်ဒါတဖၣ် ဂၢၤဃၥ်၀ဲကီၢ်ဆၢဂၢၤတဖၣ်ဖဲ တၢ်ဘၣ်ဂံၥ်ဂူၥ်ကဲထီၣ်သးအလီၢ်၀ံၤအလီၢ်ခံ ခံကပၤစလၢၥ် ကမျၢၢ်တဖၣ်ပၥ်ဖျါထီၣ်တၢ်ပၥ်သးတဖၣ်အိၣ်ထီၣ်၀ဲလၢ စှၤသီအတီၢ်ပူၤန့ၣ်လီၤ. ကၠီၣ်တဲၣ်ပှၤဘၣ်မူဘၣ်ဒါတဖၣ် ဟဲနုၥ်လီၤဂုၢ်ဆူၣ်၀ဲအဂ့ၢ်ဒီး ခး ခၣ်ဘီဒံယါကမျၢၢ်တဖၣ်လၢ မဲၥ်ထံမ့ၣ်ပိၢ်တဖၣ်, ရီဘၢၣ်ကျိချံတဖၣ်ဒီး စူးကါ၀ဲ တၢ်မၤသီၣ်မၤသၢတၢ်ပီးတၢ်လီတဖၣ်၀ံၤ မၤသီၣ်မၤသၢ၀ဲအဂ့ၢ် ခၣ်ဘီဒံယါ တၢ်ကစီၣ်တၢ်ဘိးဘၣ်ရၤလီၤကိတိၥ် စံး၀ဲန့ၣ်လီၤ.
ဘၣ်ဆၣ်ဒီးလၢ ကၠီၣ်တဲၣ်သုးမုၢ်ဒိၣ် အတၢ်ဘိးဘၣ်ရၤလီၤတခီ ခၣ်ဘီဒံယါ ပှၤပၥ်ဖျါထီၣ်တၢ်ပၥ်သး ၂၀ဂၤဃၣ်ဃၣ် အတၢ်ဃုအ့ၣ်လိၥ်အဖီခိၣ် တၢ်ခီၣ်ဆၢက့ၤလီၤ၀ံၤ တနီၤန့ၣ် ကွံၥ်၀ဲလၢ နီၣ်တီၣ်ဒီးလၢၢ်တဖၣ်၀ံၤ ခး၀ဲစ့ၢ်ကီးဒီးလွးလ့ကွးတဖၣ်အဃိ ကၠီၣ်တဲၣ်လီၢ်လၤအိၣ်တနီၤ ဘၣ်ဒိ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ဒုးကဲထီၣ်တ့ၢ် ဟီၣ်က၀ီၤလၢတၢ်ဘၣ်ဂံၥ်ဂူၥ်ကဲထီၣ်သးကီၢ်ဆၢသ၀ီန့ၣ် အိၣ်၀ဲဒၣ်ဖဲ ကီၢ်ကၠီၣ်တဲၣ်, ဆၣ်ခ့အီးကီၢ်စဲၣ်, ဘၣ်နီၣ်ယၣ်ခ့သ၀ီဟီၣ်က၀ီၤအပူၤဒီး မ့မ့ၢ်လၢ ခၣ်ဘီဒံယါတခီ အအိၣ်၀ဲဒၣ်လၢ ဘၣ်သံၣ်ယ့မ့ခၠ့ကီၢ်စဲၣ်, ပရ့ၣ်ခၠါသ၀ီဟီၣ်က၀ီၤအပူၤအဂ့ၢ် စံး၀ဲန့ၣ်လီၤ.
ကၠီၣ်တဲၣ်-ခၣ်ဘီဒံယါကီၢ်ဆၢအပူၤ တၢ်ဒုးကဲထီၣ်တ့ၢ်၀ဲလၢ ဖဲအပူၤကွံၥ် လါယူၤလံ၂၄သီအနံၤတုၤ ၂၈သီအနံၤအတီၢ်ပူၤ၀ံၤ အၣ်စံၣ်ယၣ်ပှၤပၢၤလီၢ်ဆ့ၣ်နီၤ ကီၢ်မလ့ရှါ အတၢ်နုၥ်လီၤထိၣ်ဃူတၢ်အဃိ မီၢ်သီဂ့ၢ်၀ီတၢ်တၢၣ်ပီၣ်တဲသကိး၀ံၤအလီၢ်ခံ တၢ်ဒုးတဖၣ်ပတုၥ်ကွံၥ်အသးန့ၣ်လီၤ.
