လါစဲးပထ့ဘၢၣ်(၁၉)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
အ့ၣ်ယၣ်၀တံၣ်ကီၫ်ခီ,ကၠိၣ်ပၠီၣ်ကီၫ်ရ့ၣ်,ယ့ၣ်ကၠံၣ်ကီၫ်ဆၣ်,ဒူသ၀ီတဖၣ်ကမျၢၫ်အိၣ်အိၣ်ဆိးအလီၫ်တဖၣ် သုးခီၣ်မံးရှၢၣ် အသုး တ့ၫ်လီၤမ့ၣ်ပိၫ်လၢကလံၤကျါအဃိ ကမျၢၫ်အိၣ်ဟံၣ်ဃီတဖၣ် ဘၣ်ဟးဂီၤ၀ဲအဂ့ၫ် ပှၤလီၫ်က၀ီၤဖိတဖၣ်တဲ၀ဲ လီၤ.
သုးခီၣ်မံးရှၢၣ်အသုးန့ၣ် ဖဲလါစဲးပထ့ဘၢၣ်(၁၇)သီနံၤ,လၢဂီၤခီအဆၢကတီၫ် ယ့ၣ်ကၠံၣ်ကီၫ်ဆၣ်ပူၤ ငဲးသဲး,မၠးတိၣ်,ဆံၣ် ဆိၣ်ကိဒူသ၀ီတဖၣ် တ့ၫ်လီၤမ့ၣ်ပိၫ်လၢကလံၤကျါတစှၤန့ၫ်(၃)ဘျီအဃိ ဟံၣ်ဃီမ့ၣ်အူအီၣ်ဟးဂီၤကွံာ်၀ဲအါမးအဂ့ၫ် တဲ၀ဲလီၤ.
ယ့ၣ်ကၠံၣ်ပှၤလီၫ်က၀ီၤဖိတဂၤလၢသ့ၣ်ညါထွဲတၫ်အိၣ်သးတဲ၀ဲလၢ”ဂီၤ(၃)နၣ်ရံၣ်,(၅)နၣ်ရံၣ်ဒီး(၆)နၣ်ရံၣ်ဃၣ်ဃၣ်အကတီၫ်တဖၣ်အပူၤ တ့ၫ်လီၤမ့ၣ်ပိၫ်လီၤ.ကမျၢၫ်တဖၣ်သုးလီၫ်သုးကျဲအဃိ တၫ်ဘၣ်ဒိဘၣ်ထံးတအိၣ်ဘၣ်.အိၣ်ဒၣ်ထဲ မ့ၣ် အူအီၣ်ဟးဂီၤကွံာ်ဟံၣ်တဖၣ်အဂ့ၫ်”တဲ၀ဲလီၤ.
ဒူသ၀ီတဖၣ်န့ၣ် သုးခီၣ်မံးရှၢၣ်အသုး သူ၀ဲကဘီယူၤဒုးသုးတဖၣ်ဒီးတ့ၫ်လီၤ၀ဲမ့ၣ်ပိၫ်လၢမၤဘၣ်ဒိဘၣ်ထံးတၫ်ဆူၣ်တ ဖၣ်အဃိ ဟံၣ်(၂၀)ဖျၢၣ်ဘျဲၣ် ဟးဂီၤသ့ဒီးအါန့ၫ်ဒံးတၫ်၀ဲအံၤသ့စ့ၫ်ကီးန့ၣ်လီၤ.
ယ့ၣ်ကၠံၣ်ကီၫ်ဆၣ် ပှၤလၢဘူးဒီးသုးတဂၤတဲ၀ဲလၢ”အခဲအံၤတၫ်လီၫ်လၢတ့ၫ်လီၫ်မ့ၣ်ပိၫ်တဖၣ်န့ၣ် မ့ၫ်တၫ်လီၫ်လၢတၫ်ဒုး တကဲထီၣ်ဘၣ်လီၤ.အပူၤကွံာ်န့ၣ် မ့ၫ်တၫ်လီၫ်တဖၣ်လၢ တၫ်မၢကမျၢၫ်သုးဃာ်အသးန့ၣ်လီၤ.ဟီၣ်ခိၣ်လိၤ တၫ်ဒုးတဖၣ် စ့ၫ်ကီးကဲထီၣ်၀ဲလီၤ.အခဲအံၤသုးန့ၣ် မၤ၀ဲဒ်တၫ်မၤပျီဟီၣ်က၀ီၤက့ၫ်ဂီၤအသိးဒီးတ့ၫ်လီၤမ့ၣ်ပိၫ်တပယူာ်ဃီအဂ့ၫ်” တဲ ၀ဲလီၤ.
အခဲအံၤတၫ်လီၫ်လၢဘၣ်တၫ်တ့ၫ်လီၤလၢမ့ၣ်ပိၫ်တဖၣ် အပူၤကွံာ် လါအီကူာ်အပူၤ သုးခီၣ်မံးရှၢၣ်အသုးဒီး ကမျၢၫ်တၫ်ဒီ သဒၢသုး(PDF),ရၢၫ်ခၢၣ်သုးမုၫ်ဒိၣ်(AA)တဖၣ် တၫ်ဒုးကဲထီၣ်တ့ၫ်တစှၤန့ၫ်(၇)ဘျီဘၣ်ဒီးကမျၢၫ်လၢအကထိဘၣ်ပာ်တ့ၫ် ဟံၣ်ဃီ ဃ့ၫ်ပူၤဖျဲးအသးန့ၣ်လီၤ.
သုးခီၣ်မံးးရှၢၣ်အသုးန့ၣ် ယ့ၣ်ကၠံၣ်ကီၫ်ဆၣ်ပူၤ ဒူသ၀ီလၢကမျၢၣ်အိၣ်တဖၣ်အပူၤ တ့ၫ်လီၤမ့ၫ်ပိၫ်တကးဘၣ်, ဟီၣ်ခိၣ် လိၤမၤပှဲၤဂံၫ်ဘါဒီးမၤဆူၣ်ထီၣ်အတၫ်ဒုးဃီၤတဖၣ်အဂ့ၫ် တၫ်သ့ၣ်ညါဘၣ်လၢ ပှၤအိၣ်ဘူးဒီးသုးခီၣ်မံးရှၢၣ်အိၣ်န့ၣ်လီၤ.
