လါစဲးပထ့ဘၢၣ် ၁၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့ ၅, မုၢ်တြီၢ်ကီၢ်ရ့ၣ်, ကမးမိၢ်, တတါအူ, ကၠိတီဟီၣ်က၀ီၤအပူၤ သုးကီၣ်မံးရှၢၣ်အသုးဒီးသုးခိၣ်မီၣ်ခၠံးတီခိၣ်ရိၣ်မဲ BGF နီၣ်ဂံၢ် ၁၀၁၄ဒီးကၠီၣ်၀့တီခိၣ်ရိၣ်မဲ နီၣ်ဂံၢ် ၁၀၁၃သုးရ့ၣ်ပၥ်ဖှိၣ်တဖၣ် ဖဲလါစဲးပထ့ဘၢၣ် ၁၈သီအနံၤ,ဂီၤအဆၢကတီၢ် လဲၤထီၣ်သုးကျိၤဆူ ဒွဲၣ်လိကီၢ်ဆၣ်, ကတၢတံးတပၤအဂ့ၢ် တၢ်သ့ၣ်ညါဘၣ်လၢ KNLAဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
“သုးပၥ်ဖှိၣ်သုးကျိၤန့ၣ် အဂံၢ်အဘါအါဒိၣ်မးလီၤ. ဖဲလၢဟဲထီၣ်သုးကျိၤအဆၢကတီၢ် ဘၣ်တၢ်ဒုးအီၤလၢကျဲ ၂ဘျီဃၣ်ဃၣ်လီၤ. တၢ်နၢ်ဟူဘၣ်တၢ်ခးသီၣ်လၢ တတါအူထးခီ ၀ါဒူတပၤအဂ့ၢ်” KNLAဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“တတါအူထးခီ ၀ါဒူတပၤတၢ်ခးလိၥ်အိၣ်ထီၣ်၀ဲလီၤ. သုးကီၣ်မံးရှၢၣ်သုးပၥ်ဖှိၣ်ဟဲထီၣ်သုးကျိၤ၀ံၤ မုၢ်ထူၣ်ဃၣ်ဃၣ်န့ၣ် တတါအူထးခီ, ၀ါဒူဟီၣ်က၀ီၤတပၤ တၢ်နၢ်ဟူဘၣ်၀ဲ ကျိဖးဒိၣ်, ကျိဆံးအကလုၢ်တဖၣ်လီၤ. ခံခီခံကပၤတၢ်ဒုးကဲထီၣ်လၢ သုးကီၣ်မံးရှၢၣ်သုးပၥ်ဖှိၣ်သုးကျိၤဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဂ့ၢ်” လီၢ်က၀ီၤဖိတဂၤ စံး၀ဲန့ၣ်လီၤ.
“သုးကီၣ်မံးရှၢၣ်အသုးလၢဟဲထီၣ်သုးကျိၤအံၤ BGFမ့ၢ်တမၤစၢၤဒီး မ့ၢ်တဟဲပိၥ်ဘၣ်န့ၣ် ဟဲထီၣ်သုးကျိၤတန့ၢ်ဘၣ်. သုးလၢဟဲထီၣ်သုးကျိၤန့ၣ် အဂံၢ်အဘါပၣ်ဃုၥ်၀ဲအါအါဂီၢ်ဂီၢ်”အဂ့ၢ် KNLAဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးကီၣ်မံးရှၢၣ်သုးကျိၤဟဲလၢဟဲထီၣ်အံၤ ပညိၣ်လဲၤထီၣ်ဆူ ကတၢတံးသုးကလၢၤတဆီ ကလဲၤထီၣ်ဆူ ဖၣ်ပူၣ်အိၣ်သူၣ်လီၤ သုးကီၣ်မံးရှၢၣ် သုးတၢ်တိၥ်ကူၣ်ကျဲၤတၢ်လီၢ်န့ၣ်လီၤ.
သုးကီၣ်မံးရှၢၣ်န့ၣ် စူးကါကဘီယူၤ၀ံၤ ဟဲဆှၢ သုးဂ့ၢ်၀ီစုက၀ဲၤတၢ်ပီးတၢ်လီတဖၣ်, တၢ်အီၣ်တၢ်အီ, ကသံၣ်ကသီပၣ်ဃုၥ် တၢ်တိစၢၤမၤစၢၤတၢ်ပီးတၢ်လီတဖၣ် ဆူဖၣ်ပူၣ်အိၣ်သူၣ်လီၤ သုးတၢ်တိၥ်ကူၣ်ကျဲၤခိၣ်သ့ၣ်တၢ်လီၢ်အဂ့ၢ် KNLAပှၤဘၣ်မူဘၣ်ဒါတဂၤလၢ ဟူးဂဲၤသုးဂ့ၢ်၀ီ ဖဲဖၣ်ပူၣ်လီၢ်က၀ီၤပူၤစံး၀ဲန့ၣ်လီၤ.
သုးကီၣ်မံးရှၢၣ်အသုးလၢ ဘၣ်ပျၢ်ကွံၥ်သုးကလၢၤတဖၣ်လၢ ခ့ၣ်အဲၣ်ယူၣ်-သုးက့ ၅ဟီၣ်က၀ီၤ, မုၢ်တြီၢ်ကီၢ်ရ့ၣ်အပူၤတဖၣ် ကဒုးမၤန့ၣ်ပၢဆှၢက့ၤတၢ်အဂီၢ် ဂုၥ်ကျဲးစၢး၀ဲဘၣ်ဆၣ် ဟဲထီၣ်ဆူတၢ်မဲၥ်ညါတန့ၢ်ဘၣ်ဒီး သုးဂ့ၢ်၀ီတၢ်ဟူးတၢ်ဂဲၤတဖၣ် အိၣ်ပတုၥ်အသးဖဲ သုးခိၣ်မီၢ်ခၠံးတီခိၣ်ရိၣ်မဲ BGFနီၣ်ဂံၢ် ၁၀၁၄သုးကလၢၤဒီးအကပိၥ်ကပၤ အိၣ်လံ၂နံၣ်ဃၣ်ဃၣ်လံန့ၣ်လီၤ.
BGF နီၣ်ဂံၢ် ၁၀၁၄ဒီး ၁၀၁၃လီၢ်က၀ီၤသုးကရၢတဖၣ် ဟံးန့ၢ်ကျိၥ်စ့အဘူးအလဲ စ့ပယီၤအကလီၢ်၁ကယၤဃၣ်ဃၣ်လၢ သုးကီၣ်မံးရှၢၣ်အအိၣ်၀ံၤ လၢဟဲထီၣ်သုးကျိၤအပူၤမၤစၢၤ၀ဲ သုးကီၣ်မံးရှၢၣ်အသုးအံၤအဂ့ၢ် တၢ်သ့ၣ်ညါဘၣ်န့ၣ်လီၤ.
