လါစဲးပထ့ဘၢၣ် ၁၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဖဲအပူၤကွံၥ် လါစဲးပထ့ဘၢၣ် ၁၂သီအနံၤ, သုးကီၣ်မံးရှၢၣ်အသုး ဟဲတ့ၢ်လီၤမ့ၣ်ပိၢ်လၢကလံၤကျါ ဖဲရၢၢ်ခၢၣ်ကီၢ်စဲၣ်, ကၠီးတီၣ်ကီၢ်ဆၣ်, သယဲးတပ့ၣ်သ၀ီအိၣ် ကၠိတၢ်သူၣ်ထီၣ်အပူၤတၢ်ဂ့ၢ်အဖီခိၣ် ပှၤလၢထံၣ်န့ၢ်၀ဲလၢနီၢ်ကစၢ်အမဲၥ်တဖၣ် ကဟ့ၣ်ထီၣ်ဘၣ် တၢ်မၤနီၤမၤဃါတဖၣ်အဂီၢ် ကီၢ်ပယီၤဘၣ်ထွဲတၢ်ဃိထံသ့ၣ်ညါသဘျ့ကရၢ (IIMM) ဃ့ထီၣ်၀ဲန့ၣ်လီၤ.
ဖဲလၢကလံၤကျါတၢ်ဒုးအပူၤ ပှၤဘၣ်သံအစှၤကတၢၢ် ၂၂ဂၤ၀ံၤ အါတက့ၢ်မ့ၢ် ကၠိဖိတဖၣ်အသိး ပှၤတစှၤန့ၢ် ၂၀ဂၤဘၣ်ဒိ၀ဲ၀ံၤ ဒ်သိးအခဲအံၤတၢ်လဲၤဒုးကၠိလၢကလံၤကျါတၢ်ဂ့ၢ်န့ၣ် ဖဲ၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ တၢ်လဲၤဒုးကၠိလၢကလံၤကျါတဖၣ်အကျါ ပၣ်ဃုၥ်၀ဲဒ်တခါအသိးစ့ၢ်ကီးန့ၣ်လီၤ.
တၢ်ကဲထီၣ်သးန့ၣ် ရၢၢ်ခၢၣ်ကီၢ်စဲၣ်ပူၤ ကမျၢၢ်ထံဖိကီၢ်ဖိလၢ အဘၣ်ကွၢ်ဆၢၣ်မဲၥ်ဘၣ်ဒီး တၢ်ဒုးတၢ်ယၤတဖၣ်, ဘၣ်တၢ်မၤသံမၤ၀ီတဖၣ်, ဘၣ်တၢ်သုးကလီၢ်သုးကျဲန့ၢ်ဆူၣ်အီၤဒီး တၢ်သၣ်၀ံၤလီၤဒိတဖၣ်အဂီၢ် နးဒိၣ်ထီၣ်၀ဲအသိး ပၥ်ကမျၢၢ်ဒ်တၢ်ခးပနီၣ်အသိး၀ံၤ မၤကလံၤကျါတၢ်ဒုး ဒုးဃီၤ၀ဲကမျၢၢ်တဖၣ်န့ၣ် မ့ၢ်ဒၣ်မၤကမၣ် သုးကွီၢ်မ့ၣ် မ့တမ့ၢ် တၢ်မၤကမၣ် ပှၤဟီၣ်ခိၣ်ဖိစဲၤသွဲၣ်ကွီၢ်မ့ၣ်အဂ့ၢ် IIMM အလံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
တၢ်လဲၤဒုးဖိသၣ်တဖၣ်န့ၣ် မ့ၢ်တၢ်လီၤရၢၢ်လီၤစၢၢ်အဃိ IIMM တခီ တၢ်မၤဘၣ်ဒိဖိသၣ်တဖၣ် တၢ်မူၤတၢ်ရၢ်အဖီခိၣ် ကပၥ်၀ဲတၢ်ဂ့ၢ်အံၤဒ်အဆိအသိး၀ံၤ ကဃိထံၣ်သ့ၣ်ညါ ကမၤဖျါထီၣ်၀ဲအဂ့ၢ် ထုးထီၣ်ပၥ်ဖျါဃၥ်၀ဲန့ၣ်လီၤ.
တကးဘၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုး မၤကလံၤကျါတၢ်ဒုးတဖၣ် ဖဲစကဲကီၢ်ခီ ယ့ၣ်အူကီၢ်ရ့ၣ်, ခၠီကီၢ်စဲၣ် မတူၣ်ပံၥ်, ကရ့ၣ်နံၣ် ဒံၣ်မီစိၤ, ယိၤဒိၣ်ကီၢ်စဲၣ်ဒီးကရ့ၣ်နံၣ်အဆၢ ဖဲၣ်ခိၣ်, ရၢၢ်ခၢၣ်ကီၢ်စဲၣ်ပၣ်ဃုၥ် ကီၢ်ခီဒီးကီၢ်စဲၣ်တဖၣ်အပူၤတၢ်ဂ့ၢ်အဖီခိၣ် ကသမံးသမိး၀ဲ တၢ်ဂ့ၢ်တၢ်ကျိၤတဖၣ်အဂ့ၢ် IIMM ထၢဖှိၣ်မၤနီၤဃၣ်၀ဲအဂ့ၢ်စံး၀ဲန့ၣ်လီၤ.
ဖဲလၢတၢ်မၤနီၣ်ထၢဖှိၣ်တၢ်ဂ့ၢ်တၢ်ကျိၤတဖၣ်အပူၤ တၢ်ဘၣ်ဒိဘၣ်ထံး, တၢ်ဟးဂူၥ်ဟးဂီၤ, ကဘီယူၤဒီး စုက၀ဲၤကျိချံပှၥ်သၣ် တၢ်ဂီၤတဖၣ် မ့တမ့ၢ် တၢ်ဂီၤမူတဖၣ်, ပှၤလၢဘၣ်ဒိဘၣ်ထံးတဖၣ်အတၢ်ဂ့ၢ်တၢ်ကျိၤ, ကလံၤကျါတၢ်ဒုးအပူၤ လၢအ၀ဲသ့ၣ်စူးကါ၀ဲ ကဘီယူၤဒီးစုက၀ဲၤအကလုၥ် တၢ်ဂ့ၢ်တၢ်ကျိၤတဖၣ်, ပှၤနီၣ်ကဘီယူၤဖိဒီး ပှၤလၢဟ့ၣ်တၢ်ကလုၢ်လၢ အပၣ်ဃုၥ်ဘၣ်ထွဲတဖၣ် တၢ်ဂ့ၢ်တၢ်ကျိၤတဖၣ် ပၣ်ဃုၥ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
Photo: AA info Desk
