လါစဲးပထ့ဘၢၣ် ၁၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
လါစဲးပထ့ဘၢၣ် ၁၃သီအနံၤန့ၣ် အ့ၣ်ယၣ်၀တံၣ်ကီၢ်ခီ, သၣ်ပီကီၢ်ဆၣ်, ခီၣ်သုးရ့ၣ်(ခလရ) ၃၀၈သုးအပူၤ သုးကီၣ်မံးရှၢၣ်အသုးဖိ ၄ဂၤဃ့ၢ်ဖျိးကွံၥ်၀ဲအဂ့ၢ် တၢ်သ့ၣ်ညါဘၣ်လၢ ပှၤလၢအိၣ်ဘူးဒီး သၣ်ပီအိၣ်သူၣ်လီၤ ခလရ ၃၀၈သုးရ့ၣ်အအိၣ်န့ၣ်လီၤ.
တၢ်ဒုးကဲထီၣ်သးအလီၢ် လ့မၠဲးနၣ်ကီၢ်ဆၣ်လၢအိၣ်ဘူးလိၥ်သးဒီး ရၢၢ်ခၢၣ်ကီၢ်စဲၣ်အံၤအပူၤ ကတဲၥ်ကတီၤလၢ ကမၤပှဲၤသုးဂံၢ်ဘါအဆၢကတီၢ် အပှၤသုးဖိ၄ဂၤ ပၥ်မၤအသးဒ်လဲၤဟးအဖှံအသိး၀ံၤ ဃ့ၢ်ဖျိးကွံၥ်၀ဲအဂ့ၢ် စံး၀ဲန့ၣ်လီၤ.
“ဃ့ၢ်ဖျိးကွံၥ်၀ဲဒၣ် ဖဲဟါ ၈နၣ်ရံၣ်ဘျဲၣ်ဃၣ်ဃၣ်အဆၢကတီၢ်အဂ့ၢ် တၢ်သ့ၣ်ညါဘၣ်န့ၣ်လီၤ. သုးကီၣ်မံးရှၢၣ်အပှၤသုးဖိလၢ ဃ့ၢ်ဖျိးကွံၥ်တဖၣ်န့ၣ် အမ့ၢ်သုးဖိလီၢ်လံၤဧါ, သုးသီပှၤသးစၢ်တဖၣ်ဧါတခီ တသ့ၣ်ညါဘၣ်ဒံးဘၣ်. ဘံၣ်ဘၢသုးလီၢ်လၤအိၣ်တဖၣ် အမဲၥ်ဟံးအဆၢကတီၢ်အဃိ ဃ့ၢ်ဖျိးကွံၥ်န့ၢ်”အဂ့ၢ်န့ၣ် ပှၤလၢအိၣ်ဘူးဒီး သၣ်ပီအိၣ်သူၣ်လီၤ ခလရ ၃၀၈ သုးရ့ၣ် စံး၀ဲန့ၣ်လီၤ.
သုးဖိလၢဃ့ၢ်ဖျိးကွံၥ်တဖၣ်အံၤ ခလရ ၃၀၈သုးရ့ၣ် သုးခိၣ်ဒိၣ်ဖိ သါနၢၤဒီးအကရၢတဖၣ် လူၤဃုကွၢ်၀ဲတၢ်လီၢ်တကူၤ၀ံၤ တုၤလါစဲးပထ့ဘၢၣ်၁၄သီအနံၤ, မုၢ်ထူၣ်အဆၢကတီၢ်ဒၣ်လဲၥ် တၢ်တက့ၤဖီၣ်န့ၢ်အီၤဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“သုးဖိလၢဃ့ၢ်ဖျိးကွံၥ်တဖၣ်န့ၣ် ကမ့ၢ်ဒၣ် ပှၤသးစၢ်တဖၣ်လီၤ. ဘၣ်မနုအဃိလဲၣ် ခလရ ၃၀၈သုးရ့ၣ်အပူၤန့ၣ် သုးအဂံၢ်အဘါတအိၣ်အါအါဂီၢ်ဂီၢ်ဘၣ်. တအဲၣ်ဒိး ဒုးတၢ်ဘၣ်အဃိ ဃ့ၢ်ဖျိးကွံၥ်၀ဲအဂ့ၢ်” ပှၤလၢအိၣ်ဘူးဒီးသုးပှၤတ၀ၢ စံး၀ဲန့ၣ်လီၤ.
သုးကီၣ်မံးရှၢၣ် အသုးလီၢ်လၤအိၣ်တဖၣ်တီခိၣ်ရိၣ်မဲ၀ံၤ ကလဲၤမၤစၢၤ၀ဲဒၣ် ဆူလ့မၠဲးနၣ်ကီၢ်ဆၣ်အဆၢကတီၢ် ကဟးထီၣ်၀ဲဒၣ်လၢ သုးသိလ့ၣ်တဖၣ်အဆၢကတီၢ် ဃ့ၢ်ဖျိးကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဘၣ်ထွဲဒီးအပှၤသုးဖိဃ့ၢ်ဖျိးကွံၥ်တၢ်ဂ့ၢ်အဖီခိၣ် ဟးလူၤဃုကွၢ်၀ဲဆူၣ်ဆူၣ်ကိၥ်ကိၥ်အသိး ဆှၢပၥ်တၢ်ကစီၣ်ဆူ တၢ်သမံသမိးတြဲၤတဖၣ်အအိၣ်အဂ့ၢ် တၢ်သ့ၣ်ညါဘၣ်လၢ ပှၤလၢအိၣ်ဘူးဒီး သုးကီၣ်မံးရှၢၣ်အသုးအအိၣ်န့ၣ်လီၤ.
လါစဲးပထ့ဘၢၣ် တၢတနွံအတီၢ်ပူၤစ့ၢ်ကီး အ့ၣ်ယၣ်၀တံၣ်ကီၢ်ခီ, သၣ်ပီကီၢ်ဆၣ် သုးကီၣ်မံးရှၢၣ် ခလရ ၃၀၈သုးရ့ၣ်အကပၤ သုးကလၢၤဒီသဒၢအပူၤစ့ၢ်ကီး သုးကီၣ်မံးရှၢၣ်အပှၤသုးဖိ ၄ဂၤ ဃ့ၢ်ဖျိးကွံၥ်၀ဲဒံးအဂ့ၢ် တၢ်သ့ၣ်ညါဘၣ်န့ၣ်လီၤ.
