လါစဲးပထ့ဘၢၣ် ၁၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ပှၤဟူးဂဲၤထံရူၢ်ကီၢ်သဲးဖိ ခၠၣ်လံၣ်ကးလၢ သးနံၣ်အိၣ်(၃၁)လၢအဆီၣ်ထွဲပှၤလၢတအဲၣ်ဒိးတၢ်ဆီတလဲသနူ(Conservative) အမဲရကၤကီၢ်ခိၣ်ထရၢးအံၤ ဘၣ်တၢ်ကူၣ်ခးသံအီၤဒီးကျိ ဖဲကီၢ်အမဲရကၤ, ယူၣ်တၣ်ကီၢ်စဲၣ် ဖၠၣ်စိမိၤကရၢၢ်တခါအပူၤ ဖဲအတဲလီၤတၢ်အဆၢကတီၢ်န့ၣ်လီၤ.
တၢ်ကဖီၣ်န့ၢ် ပှၤလၢကူၣ်ခးသံ ခၠၣ်လံၣ်ကးလၢကျိအံၤအဂီၢ် အမဲရကၤပၢၤကီၢ်သုး လူၤဃုကွၢ်၀ဲဒိၣ်ဒိၣ်မုၢ်မုၢ်န့ၣ်လီၤ. ကတီၢ်ခဲအံၤတခီ FBIကရၢ မၤန့ၢ်ဃၥ်၀ဲ ရဲၣ်ဖဲၣ်ကျိလၢ ပှၤကူၣ်မၤသံတၢ်တဂၤစူးကါ၀ဲအံၤ၀ံၤ, တၢ်မၤန့ၢ်ဃၥ်စ့ၢ်ကီး အ၀ဲအစုတ၀ံးပနီၣ်လံအဂ့ၢ် တၢ်ကစီၣ်တဖၣ်ပၥ်ဖျါဃၥ်၀ဲအဖီခိၣ် တၢ်သ့ၣ်ညါဘၣ်န့ၣ်လီၤ. ပှၤလၢကူၣ်ခးသံ ခၠၣ်လံၣ်ကးန့ၣ် အသးနံၣ်ကအိၣ်ဒၣ်ထဲသိးဒီး ခီလ့ၤကၠိဖိအသးအနံၣ်အသိးအဂ့ၢ် FBIကရၢခိၣ် obert Bohlsတယၥ်ဃၥ်၀ဲန့ၣ်လီၤ.
ခၠၣ်လံၣ်ကးန့ၣ် မ့ၢ်ပှၤတဂၢလၢအဆီၣ်ထွဲ အမဲရကၤကီၢ်ခိၣ် ဒီၣ်နၢၤထရၢးဒိၣ်ဒိၣ်မုၢ်မုၢ်အဃိ ဒီၣ်နၢၤထရၢးစ့ၢ်ကီး လၢအ၀ဲအတၢ်သံအဖီခိၣ် တၢ်သူၣ်အုးသးအုး၀ဲအဂ့ၢ် တဲလီၤ၀ဲလၢဟံၣ်၀ါအိၣ်တၢ်လီၢ်န့ၣ်လီၤ. ဘၣ်ထွဲဒီးခၠၣ်လံၣ်ကးဘၣ်တၢ်ကူၣ်ခးသံအီၤအဖီခိၣ် ပှၤလၢထီဒါ(conservative)သနူတဖၣ်အဘၢၣ်စၢၤစ့ၢ်ကီး တၢ်ထံၣ်တလီၤပလိၥ်သးတဖၣ်အိၣ်ထီၣ်၀ဲန့ၣ်လီၤ. ခၠၣ်လံၣ်ကးဘၣ်တၢ်ကူၣ်သံအီၤ၀ံၤအလီၢ်ခံမး အ၀ဲမ့ၢ်ပှၤဒ်လဲၣ်တဂၤလဲၣ်န့ၣ် အမဲရကၤပၣ်ဃုၥ် ထံကီၢ်အဂုၤအဂၤတဖၣ် အတၢ်သးစၢၢ်ဆၢဟဲအိၣ်ထီၣ်အါ၀ဲန့ၣ်လီၤ.
ခၠၣ်လံၣ်ကးန့ၣ်အသးအိၣ် (၃၁)နံၣ်ဒီး ဖဲလၢအသံ၀ဲအဆၢကတီၢ်န့ၣ် အမၢၤဒီးအဖိအိၣ်တ့ၢ်၀ဲ၂ ဂၤန့ၣ်လီၤ. ကီၢ်အမဲရကၤအပူၤ ပှၤလၢဆီၣ်ထွဲ တၢ်တအဲၣ်ဒိးတၢ်ဆီတလဲသနူ(Conservative) ပှၤဟူးဂဲၤတဖၣ်အကျါ မ့ၢ်ပှၤတဂၤလၢပှၤသ့ၣ်ညါအီၤအအါကတၢၢ်၀ံၤ တဲလီၤ၀ဲ ဘၣ်ထွဲဒီးအတၢ်ထံၣ်တၢ်ပၥ်သးတဖၣ်လၢ အပှၤတ၀ၢမံၣ်ဒံၣ်ယၣ်ပူၤ ထီဘိန့ၣ်လီၤ. ၀ံၤအလီၢ်ခံ အ၀ဲမ့ၢ်ပှၤတဂၤလၢ ကီၢ်ခိၣ်ဒီၣ်နၢၤထရၢး နၥ်အီၤဒီးပၥ်ဂံၢ်ပၥ်ဘါဘၣ်အီၤ သိၣ်မှံတဂၤန့ၣ်လီၤ.
အ၀ဲပၥ်ဖှိၣ်သူၣ်ထီၣ်တ့ၢ် Turning Point USAကရၢ အရဲၣ်ကျဲၤမၤတၢ်ရဲၣ်တၢ်ကျဲၤတခါ ဖဲ ယူၣ်တၣ်ကီၢ်စဲၣ်, ဖၠၣ်စိမိၤတခါအပူၤ လၢအ၀ဲတဲလီၤတၢ်အဆၢကတီၢ် ဘၣ်တၢ်ခးသံအီၤလၢကျိန့ၣ်လီၤ. ဖဲလၢဘၣ်တၢ်ခးသံအ၀ဲအဆၢကတီၢ်န့ၣ် အမၢၤဒီးအဟံၣ်ဖိဃီဖိတဖၣ်စ့ၢ်ကီး အိၣ်၀ဲဒၣ်ဖဲ တၢ်ရဲၣ်တၢ်ကျဲၤအံၤအပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
အ၀ဲမ့ၢ်ပှၤတဂၤလၢ ဟဲဒိၣ်ထီၣ်၀ဲဒၣ်လၢ က၀ီၤဒ့လၢအယံၥ်ဒီး ခၠံၣ်ကၣ်ကိၣ်၀့ၢ်၀ံၤ ဖဲလၢအသးအိၣ်(၁၈)နံၣ်န့ၣ် စးထီၣ် ၀ဲTurning Point USAကရၢအံၤလၢ ၦၤလၢအဆီၣ်ထွဲလ့းဘရၢၣ်သနူတဖၣ် ကဆီၣ်ထွဲက့ၤ (Conservative)သနူအဂီၢ်န့ၣ်လီၤ. Turning Point USAကရၢန့ၣ် ဖဲအပူၤကွံၥ်တၢ်ဃုထၢအပူၤ ဒ်သိး ထရၢးဒီးရံၣ်ပၣ်ကလံးကၣ်ပၣ်တံၣ်ခၢၣ်စးတဖၣ် ကမၤနၢၤတၢ်အဂီၢ် မၤစၢၤ၀ဲတၢ်ကရၢကရိတၢ်ဖံးတၢ်မၤတဖၣ်၀ံၤ မၤစၢၤဆီၣ်ထွဲ၀ဲဒိၣ်ဒိၣ်မုၢ်မုၢ်န့ၣ်လီၤ.
ကးန့ၣ် ခီဖျိလၢ အထီဒါပှၤလၢဆီၣ်ထွဲစုစ့ၣ်သနူ, အထီဒါတၢ်ဆီတလဲတၢ်အမုၥ်အခွါသနူ, တတူၢ်လိၥ်တၢ်မၤဟးဂီၤတၢ်ဒၢထီၣ်ဖိတၢ်ဂ့ၢ်, ပၥ်အဒူၣ်အဆၢကလုၥ်ဂ့ၢ်၀ီဒီး တတူၢ်လိၥ်ခီကီၢ်ပှၤမၤတၢ်ဖိတဖၣ်, တူၢ်လိၥ်ဆီၣ်ထွဲ၀ဲ ထရၢးပဒိၣ် ဖီၣ်ခီကီၢ်ပှၤမၤတၢ်ဖိတဖၣ်၀ံၤတၢ်က့ၤဆှၢအီၤတဖၣ် တကးဘၣ် အထီဒါစ့ၢ်ကီးတၢ်ပၢၤစုက၀ဲၤသနူတဖၣ်အဖီခိၣ်ဒီး အတၢ်ထံၣ်အတၢ်ပၥ်သးအိၣ်၀ဲဒ်န့ၣ်အဃိ ပှၤသ့ၣ်ညါအီၤအါန့ၣ်လီၤ. ဖဲ၂၀၂၀နံၣ်တၢ်ဃုထၢအပူၤ ကၠိဘဲၣ်ဒၣ်ဃုၥ်ဟံးန့ၢ်တၢ်ဖးတဖၣ်လၢ ထရၢးအအိၣ်အဂ့ၢ် တၢ်ရၤလီၤတၢ်ကစီၣ်ကမၣ်တဖၣ်တၢ်ဂ့ၢ်အဖီခိၣ်စ့ၢ်ကီး မ့ၢ်ပှၤတဂၢလၢဆီၣ်ထွဲဟ့ၣ်ဂံၢ်ဟ့ၣ်ဘါ၀ဲန့ၣ်လီၤ.
ခၠၣ်လံၣ်ကၣ်န့ၣ် မ့ၢ်ပှၤတဂၤလၢ အဒီသဒၢတူၢ်လိၥ်ဆီၣ်ထွဲထီဘိတပယူၥ်ဃီလၢ နီၢ်ကစၢ်တၢ်ဒီသဒၢအဂီၢ် တၢ်ပျဲစိၥ်စုက၀ဲၤတၢ်ဘျၢသဲစးလၢ ကီၢ်အမဲရကၤအပူၤန့ၣ်လီၤ.
