လါစဲးပထ့ဘၢၣ်၁၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်အသုး အစုတီၤဖီလၥ် သုးခိၣ်ဘိၣ်ဘံးတီခိၣ်ရိၣ်မဲ DKBAသုးလၢ ဟဲဆီၣ်လီၤအသး ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၁), ဖၣ်အၣ်ကီၢ်ဆၣ်, ၀ါဘိတီကျဲ-တခိၣ်တၢၣ်ကျဲဂၥ်တဲၥ်တဖၣ် ဘၣ်တၢ်ဒုးအီၤလၢဒြိအဂ့ၢ် တၢ်သ့ၣ်ညါဘၣ်န့ၣ်လီၤ.
သုခိၣ်ဘိၣ်ဘံးတီခိၣ်ရိၣ်မဲ DKBAသုးတဖၣ်အံၤ ဖဲလါစဲးပထ့ဘၢၣ်၁၃သီ, ဂီၤ၉နၣ်ရံၣ်အဆၢကတီၢ် ဘၣ်တၢ်ဟဲဒုးအီၤဒီးဒြိမ့ၣ်ပိၢ်(၃)ဖျၢၣ်၀ံၤဘၣ်ထွဲဒီးတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတၢ်အိၣ်သးတဖၣ်တၢ်တသ့ၣ်ညါဘၣ်ဒံးဘၣ်အသိး ကရၢဖဲလဲၣ်တဖု ဟဲဒုး၀ဲလဲၣ်အဂ့ၢ် တၢ်တသ့ၣ်ညါဘၣ်ဒံးဘၣ်အဂ့ၢ် စံး၀ဲန့ၣ်လီၤ.
သုးခိၣ်ဘိၣ်ဘံးတီခိၣ်ရိၣ်မဲ DKBAသုးန့ၣ် ဟဲဆီလီၤ၀ဲတၢ်သမံသမိးတြဲၤဖဲ ၀ါဘိတီကျဲ နီၢ်ဖးဒိၣ်ဒီး တတါအူအဘၢၣ်စၢၤ တခိၣ်တဲၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကျဲအံၤန့ၣ် မ့ၢ်ကျဲတဘိလၢ လီၢ်က၀ီၤကမျၢၢ်ဖိတဖၣ် လ့ၤလိၤဟးထီၣ် ဖဲတခိၣ်တဲၣ်ကျဲဂၥ်တဲၥ်ဆူ ရှီၣ်ကိ-ဒိၣ်သမံးကၢၢ်နံၤကျဲတဆီ တၢ်လဲၤဆူပ့နဲတီကျဲအသိး DKBA သုးခိၣ်ဘိၣ်ဘံးအပှၤလူၢ်ဖိလၢအမ့ၢ် ကၠီၣ်စိပၣ်ဃုၥ်ပှၤလၢပၣ်ဃုၥ်ဘျးစဲ၀ဲတဖၣ် စူးကါ၀ဲကျဲဘိအံၤဒ် တၢ်ကူၣ်လဲၢ်မၤကၤ သိလ့ၣ်လၢလဲၣ်စ့ၣ်တအိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တခိၣ်တဲၣ်ဆူ ဒိၣ်သမံးကၢၢ်နံၤန့ၣ် တၢ်ဒ့စၢၤအိၣ်ဒၣ်ထဲ ၂မံၤလၤ၀ံၤ စီၣ်ထူလၢအလဲၤကူသီခါဒီးအိၣ်ဖဲ ပ့နဲတီသီခါဖၠၣ်အံၤ ဘၣ်ထွဲဘျးစဲလိၥ်သးဒီး သုးခိၣ်ဘိၣ်ဘံးအဂ့ၢ်ဒီး အပှၤလူၢ်ဖိလၢအမ့ၢ် ကၠီၣ်စိစ့ၢ်ကီး သုးခိၣ်ဘိၣ်ဘံးက့ၤအိၣ်ကဒု၀ဲဒၣ်ဖဲ ကၠၣ်အ့ပီၣ်တီၣ်မုၢ်သီခါအအိၣ်၀ံၤအလီၢ်ခံ ဟဲက့ၤဟံးန့ၢ်ခီၣ်တဃၥ်၀ံၤ ကူၣ်လဲၢ်မၤကၤ၀ဲ သိလ့ၣ်လၢလဲၣ်စ့ၣ်တအိၣ်တဖၣ်န့ၣ်လီၤ.
သုးခိၣ်ဘိၣ်ဘံးအပှၤကရၢတဖၣ် ဟဲဆီလီၤဃၥ်အသးဖဲ တခိၣ်တဲၣ်ကျဲဂၥ်တဲၥ်န့ၣ် အကဲထီၣ်တၢ်မၤတံၥ်တၥ်တၢ်နိးတၢ်ဘျးလၢ လီၢ်က၀ီၤကမျၢၢ်လၢလ့ၤလိၤဟးထီၣ်တဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
လါစဲးပထ့ဘၢၣ် ၁၃သီအနံၤ, ဂီၤအဆၢကတီၢ် သုးခိၣ်ဘိၣ်ဘံးတီခိၣ်ရိၣ်မဲ DKBAအပှၤသုးဖိတဖၣ် ဘၣ်တၢ်ဟဲဒုးအီၤဒီးဒြိ၀ံၤအလီၢ်ခံ DKBAအသုးဒီးသုးကီၣ်မံးရှၢၣ်အပှၤသုးတဖၣ် ကမၤပှဲၤအါထီၣ်သုးအဂံၢ်အဘါတဖၣ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
