လါစဲးပထ့ဘၢၣ်(၂)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်အ့ၣ်ဒိၣ်နံရှါအပူၤဘျီၣ်ဒိၣ်ခၢၣ်စးတဖၣ်အဂီၢ်တၢ်မၤအါထီၣ်တၢ်ဒိးန့ၢ်အဘျူးအဃိတၢ်ထီဒါတၢ်ပၥ်ဖျါထီၣ်တၢ်ပၥ်သးတဖၣ်အိၣ်ထီၣ်လၢ ထံကီၢ်ဒီတဘ့ၣ်ပူၤ၀ံၤအလီၢ်ခံ တၢ်ကပတုၥ်ကွံၥ် တၢ်ဒိးန့ၢ်အဘျူးတနီၤအဂီၢ် အၢၣ်လီၤတူၢ်လိၥ်၀ဲအဂ့ၢ် အ့ၣ်ဒိၣ်နံရှါကီၢ်ခိၣ် Prabowo Subianto တဲလီၤ၀ဲမဟါအနံၤန့ၣ်လီၤ.
တၢ်ပၥ်ဖျါထီၣ်တၢ်ပၥ်သးလၢ ၀့ၢ်ခိၣ်ကၠၣ်ကၣ်တၣ်တခါအပူၤ ပှၤသိလ့ၣ်ဒိးလဲဖိတဂၤ ဘၣ်တိၢ်အသးလၢ ပၢၤကီၢ်သိလ့ၣ်ဒီး ဘၣ်သံ၀ဲအဃိ တၢ်ပၥ်ဖျါထီၣ်တၢ်ပၥ်သးတဖၣ်ဟဲဆူၣ်ထီၣ်၀ဲန့ၣ်လီၤ.
တၢ်ပၥ်ဖျါထီၣ်တၢ်ပၥ်သးတဖၣ်ဆီတလဲကွံၥ်အသးဆူ တၢ်မၤပျီၢ်မၤဂီၤတဖၣ်အသိး၀ံၤ ပဒိၣ်တၢ်သူၣ်ထီၣ်တနီၤ ဘၣ်တၢ်ဒွဲၣ်အူကွံၥ်အီၤ, ဘျီၣ်ဒိၣ်ခၢၣ်စးတနီၤ အဟံၣ်ဃီတဖၣ် ဘၣ်တၢ်မၤဟးဂီၤအီၤဒီး ဘၣ်တၢ်ဂုၥ်ဆူၣ်ဖျိဆူၣ်တဖၣ်ကဲထီၣ်၀ဲန့ၣ်လီၤ.
ဘျီၣ်ဒိၣ်ခၢၣ်စးတဖၣ်အဂီၢ် တၢ်ဟ့ၣ်အါထီၣ်၀ဲ ကျိၥ်စ့တၢ်ဆီၣ်ထွဲ ရူၣ်ပံၣ်ယၣ် (၅၀)ကကွဲၢ် ဒီလၣ်(၃၀၃၀)၀ံၤ တၢ်ပၥ်ဖှိၣ်ခဲလၢၥ်န့ၣ် ထီၣ်ဘးတုၤ ကၠၣ်ကၣ်တၣ် တၢ်မၤအလဲအစှၤကတၢၢ် အဆး(၁၀)ဃၣ်ဃၣ်အိၣ်၀ဲန့ၣ်လီၤ. လၢတၢ်န့ၣ်အဖီခိၣ် တၢ်သူၣ်တမံသးတမံတဖၣ်အိၣ်ထီၣ်၀ဲအဃိ တၢ်ပၥ်ဖျါထီၣ်တၢ်ပၥ်သးတဖၣ် အိၣ်ထီၣ်၀ဲန့ၣ်လီၤ.
တၢ်အိၣ်သးတဂၢၢ်တကျၢၤတဖၣ်အဃိ အ့ၣ်ဒိၣ်နံရှါကီၢ်ခိၣ် အတၢ်ကလဲၤဆူတရူးတၢ်ရဲၣ်တၢ်ကျဲၤ ဘၣ်ပတုၥ်ကွံၥ်၀ံၤ တၢ်ပၥ်ထီၣ်တၢ်ပၥ်သးတဖၣ်န့ၣ် တၢ်အိၣ်သးဟဲအၢထီၣ်အဃိ အထဲသိးဒီး “တၢ်ကူၣ်ဟးဂီၤထံကီၢ်ဒၣ်၀ဲ, တၢ်မၤပျီၢ်မၤဂီၤတဖၣ်”အဂ့ၢ် တဲလီၤ၀ဲန့ၣ်လီၤ.
တၢ်ဂုၥ်ဆူၣ်ပျိဆူၣ်ဒီး တၢ်မၤဟးဂုၤဟးဂီၤ စုလီၢ်ခီၣ်ခိၣ်တဖၣ်အဖီခိၣ် တၢ်ကဟံးန့ၢ်ဂ့ၢ်၀ီတုၤလီၤတီၤလီၤအဂီၢ် ဟ့ၣ်လီၤတၢ်ကလုၢ်နဲၣ်လီၤဃၥ်၀ဲဆူၣ် ပၢၤကီၢ်ဒီးပှၤဖီၣ်စုက၀ဲၤကရၢတဖၣ်အအိၣ်လံအဂ့ၢ် အ၀ဲစံးအါထီၣ်၀ဲန့ၣ်လီၤ.
မုၢ်ဖးဖီအနံၤ ဟါလီၤခီအဆၢကတီၢ် ပှၤပၥ်ဖျါထီၣ်တၢ်ပၥ်သးတဖၣ် ဒွဲၣ်အူမၤဟးဂီၤကွံၥ် လီၢ်က၀ီၤဘၣ်ထွဲပၣ်လံၣ်မၣ်တၢ်သူၣ်ထီၣ်တဖျၢၣ်၀ံၤအလီၢ်ခံ ပှၤဘၣ်သံအိၣ်ထီၣ်၀ဲ(၃)ဂၤန့ၣ်လီၤ.
မုၢ်ဘူၣ်ဒီးမုၢ်ဒဲးအနံၤတဖၣ်စ့ၢ်ကီး တၢ်ပၥ်ဖျါထီၣ်တၢ်ပၥ်သးတဖၣ်အိၣ်ထီၣ်၀ဲ၀ံၤ ကၠၣ်ကၣ်တၣ်တၢ်ခၢၣ်သးအပူၤ ပၢၤကီၢ်တဖၣ် ကမၤလီၤဖးကွံၥ်ပှၤပၥ်ဖျါထီၣ်တၢ်ပၥ်သးတဖၣ်အဂီၢ် ခး၀ဲလၢ မဲၥ်ထံလီၤဂၥ်သ၀ံတဖၣ်န့ၣ်လီၤ.
ပှၤပၥ်ဖျါထီၣ်တၢ်ပၥ်သးတနီၤစ့ၢ်ကီး က့ၤကွံၥ်၀ဲ ပၢၤကီၢ်သုးကလၢၤတဖၣ်လၢ မ့ၣ်အူပလီတဖၣ်ဒီး တၢ်ခးမ့ၣ်အူဖီတဖၣ်န့ၣ်လီၤ.
ထံကီၢ်ဒီတဘ့ၣ်အပူၤ တၢ်အိၣ်သးတၢ်ဂၢၢ်တကျၢၤဘၣ်အဃိ ကီၢ်အ့ၣ်ဒိၣ်နံရှါ စတီးတၢ်ဆါတၢ်ပှ့ၤအလီၢ်တဖၣ်စ့ၢ်ကီး လီၤစှၤကွံၥ်၀ံၤ မုၥ်ကျိၤ၀ဲၤကွၥ်အဖီခိၣ် တၢ်ဘၣ်ယိၣ်ဘၣ်ဘှီတဖၣ် ဟဲဒိၣ်ထီၣ်၀ဲန့ၣ်လီၤ.
