လါစဲးပထ့ဘၢၣ်(၂)သီ, ၂၀၂၅ နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ရဲၣ်ကျဲၤမၤဝဲ တၢ်ဒုးနၢ်ပၢၢ်လီၤလဲက့ၤတၢ်ကစီၣ်ဘၣ်ထွဲ တၢ်တြီဆၢမုၣ်/ခွါ သွံၣ်ထံ တၢ်မၤဆူၣ်မၤစိး ဒီးတၢ်ဒူၣ်တၢ်အဆၢလၢ မုၣ်/ခွါတၢ်ရ့လိၥ်ဘၣ်ထွဲ ကလီၤစှၤအဂီၢ် လံၥ်တၢ်အၢၣ်လီၤအဖီခိၣ် တၢ်ပၥ်ဂၢၢ်ပၥ်ကျၢၤလီၤတံၢ်ကဒီးတၢ်ဒီးတၢ်နဲၣ်လီၤဒုးလိၥ်ထီၣ်ဖးထီၣ်တၢ်အတၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲလါစဲးပထ့ဘၢၣ်(၁)သီ လၢယိၤဒီး ကီၢ်သူလ့ၤ ထံဆၢကီၢ်ဆၢ တၢ်လီၢ်တတီၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲ တၢ်ကစီၣ်န့ၣ်လီၤ.
တၢ်ရဲၣ်တၢ်ကျဲၤအပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ပၢဆှၢတၢ်ကမံးတံၥ်, ပှၤကတိၤတၢ်ပၢ ပဒိၣ်စီၤတီနံဒီးလၢအပၥ်ဃုၥ်ဒီးတၢ်ကစီၣ်သန့ပှၤထၢတၢ်ကစီၣ်ဖိသ့ၣ်တဖၣ်ဟဲထီၣ်ဆူတၢ်ရဲၣ်တၢ်ကျဲၤဘျီဝဲအံၤအဂ့ၢ် တၢ်သ့ၣ်ညါဘၣ်လၢ တၢ်ပၥ်ဖျါအဖီခိၣ်န့ၣ်လီၤ.
တၢ်ရဲၣ်တၢ်ကျဲၤတၢတပတီၢ် ပဒိၣ်စီၤတီနံတၢ်နဲၣ်လီၤပၥ်ဃုၥ်တၢ်ဂ့ၢ်တၢ်ကျိၤတဖၣ်ဒီး တၢ်ဂ့ၢ်တၢ်ကျိၤလၢအရ့ဒိၣ်တဖၣ် တၢ်ဒုးနၢ်ပၢၢ် လီၤလဲက့ၤတၢ်ဝံၤ ခံပတီၢ်တပတီၢ်တခီ မ့ၢ်ဝဲတၢ်ဟ့ၣ်တၢ်ဆၢကတီၢ်ဆူ တၢ်ကစီၣ်သန့ ပှၤထၢတၢ်ကစီၣ်ဖိတဖၣ် လၢကသံကွၢ်တၢ်အဂီၢ်အဂ့ၢ် စံး၀ဲန့ၣ်လီၤ.
တၢ်ရဲၣ်တၢ်ကျဲၤအပူၤ ပဒိၣ်စီၤတီနံတဲဝဲ “ကတီၢ်အံၤ တၢ်ထုးထီၣ်ရၤလီၤလံၥ်န့ၣ် အိၣ်ဝဲ(၃)ခါန့ၣ်လီၤ. တၢတခါန့ၣ် ပကထုးထီၣ်န့ၢ် ကမျၢၢ်အဂီၢ်, ခံခါတခါန့ၣ် ပကထုးထီၣ်န့ၢ် ပှၤဖီၣ်စုကဝဲၤတဖုစုၥ်စုၥ်အဂီၢ်, လၢခံတခါန့ၣ် မ့ၢ်ဝဲ ဝဲၤကျိၤပှၤဘၣ်မူဘၣ်ဒါသ့ၣ်တဖၣ်အဂီၢ် “န့ၣ် တဲဖျါထီၣ်ဝဲဒၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တကပၤ ဆဲးလီၤစုမုၢ်ကျၢၢ်တၢ်ပနီၣ် လၢတၢ်တြီဆၢမုၣ်/ခွါ သွံၣ်ထံတၢ်မၤဆူၣ် မၤစိး ဒီးတၢ်နီၤဖးမုၣ်/ခွါ တၢ်ဒူၣ်တၢ်ဆၢ ကလီၤမၢ်အဂီၢ် လံၥ်တၢ်အၢၣ်လီၤတူၢ်လိၥ်(Geneval Call) တၢ်ကရၢကရိ ဖဲ ၂၀၁၃ နံၣ်, လါယူၤလံ(၂၁)သီ အနံၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လံၥ်တၢ်အၢၣ်လီၤအဖီခိၣ် လၢတၢ်စိတၢ်ကမီၤဒိၣ်စိဒီး မၤတၢ်ပၢဟီၣ်ကဝီၤ ခဲလၢၥ်တဖၣ်အပူၤ တြီဆၢဝဲသွံၣ်ထံတၢ်မၤဆူၣ်မၤစိး လၢၥ်လၢၥ်ဆ့ဆ့ဝံၤ မုၣ်/ခွါတၢ်ဒူၣ်တၢ်ဆၢလၢ တၢ်ရ့လိၥ်တၢ်ဂ့ၢ်ကီ ကလီၤမၢ်ကွံၥ်ဝဲအဂီၢ် ဂုၥ်ကျဲးစၢးဝဲအဂ့ၢ် တၢ်ကစီၣ်တၢ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
