ပယီၤသုးန့ၣ် မၤကမၣ် တၫ်မၤလီၤမၫ်န့ၫ်ဆူၣ်တဖၣ်တပယူာ်ဃီအဂ့ၫ် KHRGတဲ၀ဲ

လါစဲးပထ့ဘၢၣ်(၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်

ပယီၤသုးအတၫ်မၤလီၫ်မၫ်န့ၫ်ဆူၣ်တၫ်လၢထံဖိကီၫ်ဖိကမျၢၫ်တဖၣ်အဖီခိၣ်ဒိၣ်ဒိၣ်မုၢ်မုၢ်ဒီးတၫ်မၤအၢမၤသီတဖၣ်န့ၣ် မ့ၫ်တၫ်မၤကမၣ်ထံဂုၤကီၫ်ဂၤတၫ်ဘျၢဖျိဖျိဖျါဖျါဒီးတၫ်ကထီဒါဘၣ်အဂီၫ် ကညီပှၤဂ့ၫ်၀ီခွဲးယာ် KHRG တဲဆီၣ်တခူထီၣ်၀ဲထံဂုၤကီၫ်ဂၤတၫ်ကရၢကရိတဖၣ်ဒီးပှၤလၢဘၣ်ထွဲတဖၣ်န့ၣ်လီၤ.

ဖဲလါအီကူာ်(၃၀)သီနံၤလၢလီၤဘၣ် ထံဂုၤကီၫ်ဂၤပှၤလၢဘၣ်လီၤမၫ်န့ၫ်ဆူၣ်အမုၫ်နံၤအပူၤ ကညီပှၤဂ့ၫ်၀ီကရၢ KHRG ထုး ထီၣ်ဘိးဘၣ်ရၤလၤ၀ဲဒီးကီၫ်ပယီၤမုၫ်ထီၣ်ကလံၤထံးတကပၤ ပယီၤသုးန့ၣ် တၫ်မၤလီၤမၫ်န့ၫ်ဆူၣ်တဖၣ် မၤ၀ဲဒိၣ်ဒိၣ်မုၢ်မုၢ်အဂ့ၫ် KHRGတဲဃာ်၀ဲလီၤ.

ကီၫ်ပယီၤမုၫ်ထီၣ်ကလံၤထံး(ကညီကီၫ်စဲၣ်)အပူၤ ပယီၤသုးန့ၣ် တဟ့ၣ်ပလီၫ်ကမျၢၫ်ဘၣ်အမဲာ်ညါ ဖီၣ်၀ဲ,သဲးစးတၫ်ဘျၢ တၫ်ဒီသဒၢတအိၣ်ဘၣ်အမဲာ်ညါ ဖီၣ်စၢဃာ်၀ဲတဖၣ်,သုးကလၢၤပူၤ(မ့တမ့ၫ်)လၢဃိၥ်တဖၣ်အပူၤ ဖီၣ်ဃာ်တၫ်တၫ်မၤအသးတဖၣ်န့ၣ် ကညီပှၤဂ့ၫ်၀ီကရၢKHRGန့ၣ် တုၤလၢကနံၤအံၤ ဒိးန့ၫ်၀ဲအိၣ်အဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲ လီၤ.

လီၤဆီဒၣ်တၫ် သးနံၣ်(၁၅)နံၣ် တုၤ (၂၅)နံၣ်အဘၢၣ်စၢၤ သးစၫ်ပိာ်ခွါတဖၣ် စံးအၢစံးသီ၀ဲလၢ ဘၣ်ထွဲဒီးတၫ်ပၢၫ်ဆၢ သုးဖိတဖၣ်အဃိ ဖီၣ်န့ၫ်ဆူၣ်တၫ်အါထီၣ်၀ဲန့ၣ် ထံၣ်ဘၣ်၀ဲအဂ့ၫ် KHRGတဲ၀ဲလီၤ.

KHRGအတၫ်မၤနီၣ်တဖၣ်အဖီခိၣ် ပှၤလၢဘၣ်လီၤမၫ်တဖၣ်န့ၣ် သုးကီၣ်ကးဖီၣ်အီၤ၀ံၤအလီၫ်ခံ သုးဖိအဂီၫ် တၫ်သူ၀ဲဒ်ပှၤ၀ံတၫ်ဖိ,ပှၤကညီတၫ်ဒီသဒၢ,ပှၤနဲၣ်ကျဲ,ပှၤမၤပျီမ့ၣ်ပိၫ်ဒီးတၫ်တဖၣ်အံၤန့ၣ် မ့ၣ်တၫ်မၤကမၣ် ထံဂုၤကီၫ်ဂၤပှၤဟီၣ် ခိၣ်ဖိတၫ်ဒိသူၣ်ဒိသးတၫ်ဘျၢတဖၣ်အဂ့ၫ် တၫ်ဘိးဘၣ်ရၤလီၤအပူၤ ပာ်ဃုာ်၀ဲလီၤ.

တၫ်ကဲထီၣ်အသးအါတက့ၫ်န့ၣ် မ့ၫ်ပယီၤသုးတကပၤ အတၫ်မၤကမၣ်တဖၣ်လီၤဘၣ်ဆၣ် ကညီကီၫ်စဲၣ်ပူၤ ပှၤဖီၣ်စု က၀ဲၤကရၢတနီၤစ့ၫ်ကီး မၤကမၣ်တၫ်မၤလီၤမၫ်န့ၫ်ဆူၣ်အိၣ်၀ဲန့ၣ် မၤန့ၫ်ဃာ်တၫ်စရီတဖၣ်အဂ့ၫ် KHRGပာ်ဖျါ၀ဲလီၤ.

တၫ်မၤလီၤမၫ်န့ၫ်ဆူၣ်အတၫ်ပိာ်ထွဲထီၣ်အခံန့ၣ် အၢသီဒီးကီၫ်ပယီၤမုၫ်ထီၣ်ကလံၤထံး ကမျၢၫ်တဖၣ်အဂီၫ်ဒု မ့ၫ်တၫ်ကွၫ် ဆၢၣ်မဲာ်လၢအဆူၣ်အကိၤဒီးပှၤလၢဘၣ်တၫ်မၤကမၣ်အီၤတဖၣ်န့ၣ် ကွၫ်ဆၢၣ်မဲာ်ဘၣ်တၫ်မၤအၢမၤသီလၢတၫ်တဆိကမိၣ်၀ဲတဖၣ်၀ံၤဟံၣ်ဖိဃီဖိတဖၣ် ဒိးန့ၫ်ဘၣ်သးတၫ်ဆါတဖၣ်,တၫ်ပျံၤတၫ်ဖုးတဖၣ်, တၫ်သူၣ်အုးသးအုးတဖၣ်ဒီး တၫ် အိၣ်သးလၢတဂၢၫ်တကျၢၤတဖၣ်န့ၣ်လီၤ.

ထံဂုၤကီၫ်ဂၤတၫ်ကရၢကရိဒီးပှၤလၢဘၣ်ထွဲတဖၣ်တကပၤ တၫ်ဒုးတပျုၫ်တပျီၫ်တၫ်,တၫ်ဘၣ်သုးလီၫ်သုးကျဲဒီဖုဒီဂီၫ်, တၫ်မၤလီၤမၫ်န့ၫ်ဆူၣ်တၫ်ဒီးတၫ်ကမၣ်အဂၤလၢသုးမီၤစိရိၤမၤကမၣ်အံၤအဖီခိၣ် ပှၤကီၫ်ပယီၤဖိ ပှၤဂ့ၫ်၀ီခွဲးယာ်ဒီးဟီၣ် ခိၣ်ဖိတၫ်ဒိသူၣ်ဒိသးတၫ်ဃံးတၫ်စ့ၤတဖၣ် ကအိၣ်ထီၣ်အဂီၫ် ဒ်ပှၤမၤကမၣ်တၫ်အသိး တၫ်ကပာ်ပနီၣ်အီၤအဂီၫ် KHRGတဲဆီၣ်တခူထီၣ်၀ဲလီၤ.

တကးဘၣ် သုးမီၤစိရိၤအတၫ်မၤအၢမၤသီအဂီၫ် တၫ်ကဘၣ်ဒီၣ်တဲာ်ကွံာ်ကျိာ်စ့တၫ်ဆီၣ်ထွဲ အဂီၫ်,တၫ်ကတြီဃာ်တၫ် ဆါန့ၫ်အီၤကျိချံတၫ်စုက၀ဲၤ,သုးခိၣ်နၫ်တဖၣ်,ခီပနံာ်လၢမၤသကိးတၫ်ဒီးသုးတဖၣ်ဒီးကျိာ်စ့တၫ်ဟဲနုာ်တဖၣ် တၫ်ကကးတံာ်ဟံးန့ၫ်ဂ့ၫ်၀ီတၫ်ဂ့ၫ်တဖၣ်ပာ်ဃုာ် တၫ်ဂ့ၫ်(၈)ထံၣ် ကညီပှၤဂ့ၫ်၀ီကရၢ KHRGတဲဆီၣ်တခူထီၣ်ဃာ်၀ဲ ထံဂုၤကီၫ်ဂၤ တၫ်ကရၢကရိတဖၣ်ဒီးပှၤဘၢဘၣ်ထွဲတဖၣ်န့ၣ်လီၤ.